ECLESIASTÉS 4

1Noqa rikuni kay pachapi runasqa kallpankuman atienekuspa, wajkunaj contrampi sajrata ruwasqankuta. Jinallataj rikorqani wajcha runaspa waqasqankuta, manataj pipis sonqochaykurej kasqantawan. Enemigosninkoqa may atiyniyoj karqanku, nitaj pipis paykunata sonqochaykurej karqachu. 2Chayrayku noqaqa nerqani wañupojkunaqa aswan kusisqa kasqankuta, kawsashajkunamanta nisqaqa. 3Chaywampis manaraj nacejkunaqa aswan kusisqaraj kanku chay iskaymanta nisqaqa, pikunachus mana rikunkurajchu ima sajrachus kay pachapi ruwakun, chaykuna. 4Chantá reparallanitaj, tukuy ima ruwaykuna, sumajta imasta ruwaypis kasqanta runapura envidiawan jap'inakusqankuraykulla. Chaypis qhasi manakajllataj, wayra jap'iyta munay jinalla. 5Wampu runaqa makisninta simp'aykukuspalla chukun, ajinamantataj mana allin kawsayman chayan. 6Aswan walej uj makillata junt'achiy, mana anchata phutikuspa, iskay makita mayta phutikuspa junt'achinamanta nisqaqa; chayqa wayra jap'iyta munay jinalla. 7Ujninman qhawarispataj, rikorqani, waj imapis kay pachapi qhasi manakajlla kasqanta. 8Uj sapan kaj runaqa karqa, mana wawasniyoj nitaj wawqeyoj. Chaywampis payqa ni jayk'aj samarikorqachu ima ruwaymantapis. Qhapajyayta munaspallapuni, mana sayk'orqachu, nitaj tapurikumpischu: Pipajtaj kay jinata trabajashani, mana mikhusqa, mana ujyasqari? nispa. Chaypis qhasi manakajlla, jatun llakiytaj. 9Aswan walej iskay ukhu kayqa sapalla kanamanta nisqaqa, imaraykuchus iskayninkumantaqa astawan ganakuyta atinku. 10Sichus ujnin urman chayqa, ujnin kaj aysarin. Sichus ujqa sapallan kashaspa urman chayrí, mana pipis aysarejqa kanmanchu. 11Jinallataj iskay ukhuchus puñunkuman chayqa, purajmanta q'oñichinakuyta atinku. Sichus pipis sapallan puñunman chayrí, mana q'oñichakuyta atinmanchu. 12Pipis uj runallataqa atipanman, iskay ukhutarí mana atipayta atinmanchu. Kinsanchasqa ch'ankullaqa mana p'itikullanmanchu. 13Uj wajcha yachayniyoj waynaqa aswan walej, uj wampu machu rey, pichus manaña yuyaychasqatapis jap'ikunchu, chaymanta nisqaqa. 14Chay waynaqa aswan walej, kamachinampaj carcelmanta llojsimorqa chaypis, chayrí reinompeqa khuyay wajcha nacerqa chaypis. 15Kay pachapi rikorqani, reypa cuentanmanta yaykoj wajcha waynawan tukuy runasta purishajta. 16Chay waynatataj ashkha mana yupay atina runas qhaterqanku; chaywampis qhepaman jamojkunaqa paywan amichikorqanku. Chaypis qhasi manakajllataj, wayra jap'iyta munay jinalla.

will be added

X\