ECLESIASTÉS 11

1T'antaykita yaku pataman churay, uj mashkha p'unchaymantataj tarikapullankitaj. 2Qanchisman chayrí pusajman rak'iray, imaraykuchus mana yachankichu ima sajrachus chay jallp'a pataman jamunanta. 3Sichus para phuyus rikhurimunku chayqa, paraqa jallp'a pataman urmamonqapuni. Sichus uj sach'a wichaynejman, chayrí uranejman urman chayqa, pachan urmasqampi qhepakun. 4Wayrata qhawajqa mana tarpunchu, phuyusta qhawajpis mana cosechanchu. 5Qanqa mana yachankichu maynintachus wayra risqanta, nillataj yachankichu uj warmej wijsampi imaynatachus uj wawa wiñasqanta. Kikillantataj qanqa mana yachankichu tukuy imata ruwaj Diospa ruwasqasninmanta. 6Tutamanta mujuta tarpunki, ch'isiyaykuytapis ama tiyaykullaychu, imaraykuchus mana yachankichu mayqenchus aswan allin kananta, kaychus, jaqaychus, chayrí iskayninchus allin kananta. 7Cheqamanta k'anchayta rikunaqa sumajpuni, intita rikunapis sumajllataj. 8Uj runaqa unay watastapis kawsachun, may jinatapis kusikuchun, yuyarikunampuni tiyan ashkha laqhayay p'unchaykuna kananmanta. Qhepaman chay tukuy imas jamunan kashan, chaykunapis qhasi manakajlla. 9Wayna, mayta kusikuy tiempoykipi; wayna kashaspa, imaschus allin kajwan kusikuy. Sonqoykej munasqampi puriy, imastachus rikusqaykipitaj. Chaywampis yachay, chay tukuymanta Dios cuentata mañasunanta. 10Sonqoykimanta phutikuyta wijch'uy, tukuy sajra kajtataj ukhuykimanta karunchay, imaraykuchus wayna kayqa qhasi manakajlla.

will be added

X\