ECLESIASTÉS 1

1Kay nisqasqa Willarajpata, Davidpa churin Jerusalenpi kaj reypata. Chaytaj nin: 2Qhasi manakajlla, qhasi manakajlla. Tukuy imapis qhasi manakajlla, nispa. 3Kay pachapi runaqa chay jina sinch'i trabajasqanmanta imatataj tarin? 4Runaqa mirashantaj, wañushantaj, kay pachataj kikillampuni sayan. 5Inteqa ujnejmanta llojsimun, ujnejmantaj chinkaykun; chaymantaqa usqhayllata kutirin ujtawan llojsimunampaj. 6Wayraqa uranejman rin, wichaynejmantaj muyuykamun. Ajinata wayraqa muyuykamuspa, muyuykamullantaj kutin kutinta. 7Tukuy mayusqa mama qochallamampuni rishanku; chaywampis mama qochaqa mana junt'aykunchu. Yakusqa, maymantachus jamorqanku, chayllamantaj kutirinku watejmanta jamunankupaj. 8Tukuy imaqa sayk'uchikullan; chaytaqa mana pipis sut'inchayta atinchu. Ñaweqa rikusqanwan mana sajsakunchu, nitaj ninripis uyarisqanwan sayk'unchu. 9Imachus ñawpajta kajqa kikillampuni kanqa. Imachus ruwasqa kajqa kikillampuni ruwasqa kanqa. Mana ima mosoj ruwaypis kay pachapi kanchu. 10Imallapis kanmanchu ninapaj: Kayqa mosoj, nispa? Chayqa unayniyojña; manaraj noqanchej kashajtinchej, karqañapuni. 11Ñawpa imasqa qonqasqa kanku; kikillantaj qhepaman kajkunapis mana yuyarisqachu kanqanku. 12Noqa Willarajqa Jerusalenpi Israelpa reynin karqani. 13Noqaqa tukuy sonqoywan, tukuy yachaywantaj mask'aspa, yachayta munarqani kay pachapi tukuy ima ruwakusqanmanta. Kay sinch'i ruwanata Diosqa runasman qorqa, chayta ruwaspa kawsanankupaj. 14Kay pachapi, imaschus ruwakushan, chay imasta allinta qhawarqani. Repararqani chay tukuy imasqa qhasi manakajlla, wayra jap'iyta munay jinalla kasqanta. 15Imachus wist'u kajqa manaña cheqanchakuyta atinchu. Imachus pisej kajqa manaña yupakuyta atinchu. 16Noqataj sonqoypi nerqani: Noqaqa may pataman oqharikuni; Jerusalenpi noqamanta ñawpajta tukuy kamachejkunamanta nisqaqa aswan yachayniyoj kani. Noqaqa sonqoypi entiendej churakorqani jatun yachayta, yuyayniyoj kaytawan. 17Tukuy sonqoywan yachaqaj churakorqani imachus jatun yachay kasqanta, jinallataj imachus pawisqa kay, wampu kaywan kasqantapis. Chantá repararqani chay imasta yachanaqa wayrata jap'iyta munay jinalla kasqanta. 18Cheqamanta ashkha imasta yachayqa uj uma nanay jina. Pichus ima yachayta yapajqa astawan llakiyta yapallantaj.

will be added

X\