DEUTERONOMIO 7

1Señorninchej Tata Diosqa pusasonqachej, maypichus jallp'ata jap'ikunkichej, chayman. Ñawpaqeykichejmanta Tata Dios qharqonqa qanchis jatuchaj nacionesta, qankunamanta aswan jatuchajta, aswan atiyniyojtataj: Hititasta, gergeseosta, amorreosta, cananeosta, ferezeosta, heveosta, jebuseosta ima. 2Maypachachus Señorninchej Tata Dios chay nacionesta makisniykichejman jaywasonqachej atipanaykichejpaj chaypacha, paykunata kantumanta chinkarparichinkichej. Amapuni paykunawan ni ima tratota ruwankichejchu, nitaj khuyarillankichejpischu. 3Ama paykunawan aylluchanakunkichejchu. Ama casarachinkichejchu churisniykichejta ususisninkuwan, nitaj ususisniykichejta churisninkuwan. 4Manachayqa paykunaqa wawasniykichejta Tata Diosmanta karunchachinkuman waj dioskunata yupaychachispa. Chaytachus ruwankichej chayqa, Tata Diospa sinch'i phiñakuynin pataykichejpi kanqa ujllapi chinkarparichinasuykichejpaj. 5Qankunaqa altaresninkuta thuñinkichej, yupaychana rumisninkuta, yupaychana k'ullusninkutawan p'akirankichej. Jinallataj lantisninkutapis ninawan q'olaykuchinkichej. 6Qankunaqa Señorniykichej Tata Diospaj t'aqasqa ayllu kankichej. Paymin ajllakusorqachej kay jallp'a patapi tukuy ayllus ukhumanta, Paypaj may sumaj ajllasqa ayllun kanaykichejpaj. 7Tata Diosqa qankunata munakusunkichej, ajllakusunkichejtaj, mana qankuna waj nacionmanta aswan sumaj nación kasqaykichejraykuchu. Qankunaqa aswan juch'uy nación karqankichej tukuy nacionesmanta nisqaqa. 8Tata Diosqa ajllakusorqachej munakususqaykichejrayku. Chayrayku Egiptopi ñak'arishajtiykichej, Faraonpa makimpi kashajtiykichejtaj, Payqa jatun atiyninwan orqhomusorqachej, ñawpa tatasniykichejman imatachus juraspa nisqanta junt'ananrayku. 9Chayrayku yachaychej ari, Señorniykichej Tata Diosqa Pay k'atalla cheqa kaj Dios kasqanta. Yachallaychejtaj cheqan Dios kasqanta, ima trato ruwasqantapis junt'asqanta may chhika miraykunakama, Payta munakojkunaman, kamachisqasnintataj junt'ajkunaman ima. 10Chantá Payta chejnikojkunata kay pachamanta chinkarparichin, juchasninkuman jina pagachikuspa. Payta chejnikojkunataqa usqhayllata castigan. 11Chayrayku kamachisqasninta, leyesninta, imatachus nisqasninta ima kasuychej, kay p'unchaypi qankunaman junt'anaykichejpaj qoykichej, chaykunata. 12Sichus qankuna Tata Diospa kamachisqanta uyarispa waqaychankichej, junt'ankichejtaj chayqa, Señorniykichej Tata Diospis qankunawan junt'allanqataj trato ruwasqanta, khuyakuynintataj rikuchisonqachej, ñawpa tatasniykichejman nisqanman jina. 13Qankunata munakusonqachej, bendecisonqachej, ashkhatataj mirachisonqachej. Bendecillanqataj wawasniykichejta, cosechasniykichejta, trigosniykichejta, vinoykichejta, aceiteykichejta, waka uñasniykichejta, oveja uñasniykichejtapis, ima jallp'atachus ñawpa tatasniykichejman juraspa qonanta nerqa, chaypi. 14Qankunaqa bendecisqa kankichej tukuy nacionesmanta astawan. Qankuna ukhupeqa mana ima warmipis ni qharipis kanqachu mana wawasniyojqa, nillataj uywasniykichej ukhupipis kanqachu mana uñasniyojqa. 15Tata Diosqa qankunaj ñawpaqeykichejmanta tukuy laya onqoykunata chinkachenqa. Yachankichej jina Egiptoman apachimorqa, chay wañuchej onqoykunata mana qankunaman apachimonqachu. Manachayqa enemigosniykichejta chaykunawan ñak'arichenqa. 16Tata Diosqa makisniykichejman jaywasonqachej, chay tukuy ayllusta qankuna tukuchinaykichej tiyan. Paykunata ama khuyankichejchu, diosninkukunatapis ama yupaychankichejchu, ama qankuna misk'anaykichejpaj. 17Ichapis sonqoykichejpi niwajchej: Kay nacionesqa noqaykumanta aswan ashkha kanku. Imaynamantataj paykunata qharqosunmanri? nispa. 18Qankunaqa ama paykunata manchachikunkichejchu. Yuyarikuychej imatachus Señorniykichej Tata Diosqa Faraonpa contranta, tukuynin egipciospa contrankutawan ruwasqanta. 19Yuyarikuychej may chhika t'ukuna ruwanasninta rikusqaykichejta, señalesta, milagrosta, jatun atiynintawan. Ajinatamari qankunataqa Egiptomanta orqhomusorqachej. Chay kikillantataj Tata Diosqa ruwanqa tukuy nacioneswan, qankuna manchachikushankichej, chaykunawan. 20Chantapis, pikunachus qankunamanta pakakoj ayqekusonqachej, chaykunaman Tata Diosqa wayronqosta apachimonqa tukukunankukama. 21Chayrayku paykunaj ñawpaqenkupeqa amapuni q'ewakunkichejchu, imaraykuchus Señorniykichej Tata Diosqa qankunawan kashan. Paymin jatun Diosqa, manchachikunataj. 22Señorniykichej Tata Dios pisimanta pisi chay nacionesta ñawpaqeykichejmanta qharqonqa. Qankunaqa mana paykunata ujllapi tukuchiyta atiwajchejchu, imaraykuchus k'ita phiña animalesqa miraykunkuman, qankunataj chaykunawan atipachikuwajchej. 23Señorniykichej Tata Diosqa chay nacionesta makisniykichejman jaywasonqachej; tukuyninkutapuni tukuchenqa. 24Reyesninkutapis Tata Diosqa makisnillaykichejmantaj churasonqachej. Qankunaqa mentasqa kayninkuta kay jallp'a patamanta chinkachinkichej, nitaj pipis kutichikamusonqachejchu. Ajinamanta tukuyninkuta chinkarparichinkichej. 25Lantisninkuta ninapi q'olachinkichej. Ama munapayankichejchu, nitaj apakapunkichejchu paykunaj lantisninkupi kaj chay qolqenkuta, qorinkutapis. Chaykunatachus ruwankichej chayqa, juchaman urmankichej. Chaytaj Tata Diospa ñawpaqempeqa manamin allinchu, millay jucha kasqanrayku. 26Qankunaqa amapuni wasiykichejman apakapunkichejchu ima millay kajllatapis, ama chinkachisqa kanaykichejpaj. Chay tukuy imasninkoqa chinkachinapaj nisqaña. Chayrayku chaykunata chejninaykichej tiyan.

will be added

X\