DEUTERONOMIO 6

1Kaykuna kanku kamachisqas, leyes, imachus ruwana, Señorniykichej Tata Dios niwasqasnin qankunaman yachachinaypaj, chaykunata junt'anaykichejpaj, ima jallp'atachus jap'ikunkichej, chaypi. 2Ajinamanta qankuna, wawasniykichejwan, allchhisniykichejwan Señorniykichej Tata Diosta manchachikunkichej, kasuspa tukuy kawsayniykichejpi leyesninta, kamachisqasninta ima, unayta kawsakunaykichejpaj. 3Uyarikuychej ari israelitas, tukuy sonqowantaj kaykunata ruwaychej. Ajinamanta allin risonqachej, lechewan, misk'iwan yaku jina purishaj, chay jallp'api; chaypitaj ashkhata mirankichej, imaynatachus ñawpa tatasniykichejpa Señornin Tata Dios nisorqachej, chayman jina. 4Israelitas, uyariychej ari: Señor Tata Diosmin Diosninchejqa; Pay k'atalla Señorqa. 5Munakuychej Señorniykichej Tata Diosta tukuy sonqoykichejwan, tukuy almaykichejwan, tukuy kallpaykichejwantaj. 6Kay tukuy ima nisqayta sumajta sonqoykichejpi jap'iychej. 7Sapa kuti wawasniykichejman yachachinkichej. Kay kamachisqasmanta willaychejpuni wasiykichejpi, jinallataj ñampi purishaspapis, chantá puñunapaj siriykushaspapis, jatarishaspapis. 8Kay kamachisqastaqa apaykachaychej señalesta jina makisniykichejman wataykukuspa, chantá frenteykichejman k'askachikuspa ima. 9Chantá wasi punku sayantaspi qhelqaychej, punkusniykichejpipis. 10Señorniykichej Tata Dios pusasonqachej chay jallp'asman, mayqenkunatachus ñawpa tatasniykichej Abrahamman, Isaacman, Jacobman ima juraspa nerqa qonanta, chayman. Chay jallp'aqa jatuchaj k'acha llajtasniyoj. Mana qankunachu chaykunataqa ruwarqankichej. 11Chantapis chay wasisqa tukuy k'acha imaswan junt'a kanku. Chaykunata manallataj qankunachu churarqankichej. Chay jallp'aqa yaku pujyusniyoj. Chaytaqa mana qankunachu allarqankichej. Chay jallp'aqa uva sach'asniyoj, olivo sach'asniyoj ima. Chaykunatapis manallataj qankunachu plantarqankichej. Chaywampis chay poqoykunata sajsakunaykichejkama mikhunkichej. 12Chaypacha amapuni Tata Diosta qonqapunkichejchu, imaraykuchus Paymin Egiptomantaqa orqhomusorqachej wata runas kashajtiykichej. 13Señorniykichej Tata Diosta manchachikuychej. Pay sapallanta yupaychaychej. Juraspapis, Tata Diospa sutillanta oqhariychej. 14Qayllaykichejpi nacionespa lantisninkuta amapuni yupaychankichejchu. 15Señorniykichej Tata Diosqa qankunawan kashan. Payqa manchay celoso. Payqa sinch'ita phiñakuspa, chinkarparichisunkichejman. 16Ama Señorniykichej Tata Diosta pruebaman churankichejchu, Masah nisqa cheqapi ruwarqankichej, jinataqa. 17Allinta waqaychaychej Señorniykichej Tata Diospa kamachisqasninta, leyesninta ima nisusqaykichejman jina. 18Tata Diospa ñawpaqempi imachus cheqan kajta ruwaychej, allin risunaykichejpaj, sumaj jallp'ata jap'ikunaykichejpaj, Tata Diosqa juraspa nerqa ñawpa tatasniykichejman qonanta, chaypi. 19Ajinamanta Tata Diosqa enemigosniykichejta ñawpaqeykichejmanta qharqonqa, nisqanman jina. 20Wawasniykichej tapusonqachej: Imatataj niyta munan kay kamachisqas, leyes, imastachus Tata Diospa nisqasnin, chayrí Tata Diospa kamachiwasqanchej imari? nispa. 21Chantá qankuna ninkichej: Noqaykoqa Egiptopi Faraonpa wata runasnin karqayku; chaymanta Tata Diosqa jatun atiyninwan orqhomuwarqayku. 22Chaypacha Tata Diosqa noqayku rikushajtiyku, Egiptopi ruwarqa señalesta, milagrosta, may t'ukuna ruwaykunata Faraonpa contranta, jinallataj tukuy runasnimpa contrankutapis. 23Chaymanta orqhospa, kayman pusamuwarqanchej kay jallp'ata qopunawanchejpaj, imaynatachus Tata Diosqa ñawpa tatasninchejman juraspa nerqa, ajinata. 24Chay qhepata Tata Diosqa kamachiwarqanchej kamachisqasninta allinta junt'ananchejta, Payllata manchachikunanchejta, allin rinawanchejpaj, allinta kawsananchejpaj kunankama jina. 25Ajinaqa sumaj kanman tukuy kamachisqasninta allinta junt'ananchej Señorninchej Tata Diospa ñawpaqempi, niwasqanchejman jina.

will be added

X\