1 Moisesqa Moab ch'in pampamanta Nebo Orqoman wicharerqa, Pisga Orqo puntaman. Chaytaj kashan Jericó chimpapi. Chaymantapacha Tata Diosqa payman rikucherqa tukuynin Galaad jallp'asta Dan jallp'askama. 2 Chaymantataj rikucherqa Neftalí jallp'asta, Efraín jallp'asta, Manasés jallp'asta ima. Rikuchillarqataj tukuy Judá jallp'astapis Jatun Qochakama. 3 Chaymantaqa rikuchillarqataj Neguevta, Jordán Valleta, palmeras llajtatawan, Jericó pampasta ima Zoarkama. 4 Chantá Tata Diosqa payman nerqa: Kay ari, chay jallp'aqa, Abrahamman, Isaacman, Jacobman, mirayninman ima juraspa qonayta nerqani, chay. Noqa saqeyki chay jallp'ata kikin ñawisniykiwan rikunaykita. Chaywampis mana chaymanqa yaykunkichu, nispa. 5 Ajinata Diospa kamachin Moisesqa Moab jallp'api wañuporqa, Tata Diospa nisqanman jina. 6 Diosqa payta p'ampaykorqa Moab Valle jallp'api, Bet-peorpa chimpampi. Chay cheqataqa ni pipis kunankama rejsinchu. 7 Payqa wañuporqa pachaj iskay chunkayoj watasniyoj. Chaypacha payqa sumaj ñawisniyojraj, sumaj kallpayoj ima karqa. 8 Israelitasqa Moab ch'in pampapi maytapuni Moisesmanta waqarikorqanku kinsa chunka p'unchay junt'ata. 9 Nunpa churin Josueqa sumaj yachaywan junt'a karqa, Moisés paypa umanman makisninta churasqanrayku. Israelitasqa payta kasorqanku, ruwarqankutaj Tata Diosqa Moisesman kamachisqanman jina. 10 Chaymantaqa manaña ujtawan Israelpeqa Moisés jina waj profeta karqachu; Tata Diosqa paywan uyapura parlaj. 11 Chaymantaqa manaña karqachu Tata Dios kamachejtin pipis pay jina Egiptopi milagrosta ruwaj, may jina t'ukunasta ima Faraonpa contranta, tukuy jallp'ampa contranta ima. 12 Manañapuni pipis Moisés jinaqa karqachu israelitas ukhupi, pay jina may atiywan milagrosta, t'ukuna imasta, jatuchaj imastapis ruwajqa.
