1 Manaraj wañupushaspa, Diospa ajllasqan runa Moisesqa israelitasta bendecerqa kay jinata: 2 Tata Diosqa Sinaimanta jamorqa. Seirmantapacha k'anchamorqa. Parán Orqomantapacha lliphipimorqa. Cades Meribamantapacha jamorqa, paña makimpi nina ley aparisqa israelitaspaj. 3 Tata Diosqa ayllunta munakun. Tukuy Paypaj t'aqasqa kajkuna makimpi kashanku. Paykunaqa chakisninman k'umuykunku, Paypa nisqasnintataj jap'ikunku. 4 Moisesqa leyta qowarqanchej Jacobpa ayllumpaj, herenciata jina. 5 Tata Diosqa Jesurunpi rey karqa, maypachachus llajtamanta kurajkuna Israel ayllunwan tantakorqanku chaypacha, nispa nerqa Moisesqa. 6 Moisesqa Rubenmanta nerqa: Rubén ayllu kawsachun, amataj wañuchunchu, nillataj qhari runasnin pisislla kachunkuchu, nispa. 7 Judamanta nerqa; Tata Dios, uyariy Judajpa qhaparikamusqanta; tantaykapuy llajta masisninwan. Makisninwan jark'akuchun, Qantaj payta yanapay, enemigosninwan maqanakushajtin. Atiyniykiwan tukuy sajramanta jark'ay. Enemigosninwan maqanakushajtin, yanapay, nispa. 8 Moisesqa Levimanta nerqa: Tata Dios, Tumimwan, Urimwanqa ajllakusqayki cheqan runapaj kachun. Paytaqa Masah sutiyoj cheqapi pruebaman churarqanki, paywantaj Meriba yakus kantupi churanakorqanki. 9 Payqa tatasninta nerqa: Mana jayk'ajpis rikorqaykichejchu, nispa. Jinallataj wawqesnintapis: Qankunata mana rejsiykichejchu, nispa. Wawasnintapis nillarqataj: Mana yachanichu pikunachus kasqaykichejta, nispa. Levitasqa nisqasniykita junt'arqanku. Israel aylluwan trato ruwasqaykita sumajta waqaycharqanku. 10 Paykuna yachachenqanku Jacobman imatachus kamachisqaykita, Israelmantaj leyniykita. Ñawpaqeykiman inciensota apamonqanku, altarniykimantaj uywasmanta q'olachina jaywanata. 11 Bendeciy, Tata Dios, kallpakusqankuta. May munakuywan jap'iy imastachus ruwasqankuta. Enemigosninkoj wasasninkuta sinch'ita nanachiy, amaña ujtawan jatarimunankupaj payta chejnikojkuna, nispa nerqa Moisesqa. 12 Benjaminmanta nerqa: Tata Diospaj may munasqa kajqa ni imamanta llakiyniyoj kawsakuchun, imaraykuchus Patapi Kaj Diosqa payta wiñaypajpuni jark'akun. Tata Diospa waqaychaynimpi tiyakonqa, nispa. 13 Moisesqa Josemanta nerqa: Tata Diosqa jallp'anta bendecichun, cielomanta sumaj paraswan, jallp'a ukhumanta yakus llojsimojkunapiwan. 14 Sapa wata chajrasninta astawan sumajta poqochipuchun. Sapa sach'amanta aswan sumaj poqoykunata oqharichun. 15 Chay ñawpa orqosmanta sumaj poqoykunawan bendecisqa kachun, unay lomasmanta aswan sumaj poqoykunawan. 16 Jallp'anqa aswan sumaj poqoywan junt'a kachun. Larwashaj khishkarara ch'awjra ukhumanta parlaj Diosqa payta bendecichun. Chay tukuy imas jamuchun Josejpa ayllunman, pichus wawqesnin ukhumanta ajllasqa karqa, chayman. 17 Jatun kaynenqa phiwi uña toroj jatun kaynin jina. Payqa sinch'i kallpayoj búfalo nisqa k'ita toro jina. Payqa tukuy nacionesta wajraspa qhatiykachanqa kay pachaj k'uchusninkama. Ajina kanqanku Efraínpa ashkha miraynin, jinallataj Manasespa miraynimpis, nispa nerqa Moisesqa. 18 Zabulonmanta, Isacarmantawan nerqa: Zabulonqa qhatoj rispa, kusikuchun, Isacarwantaj purisqasninkupi jarakuspa, kusikuchunku. 19 Paykunaqa nacionesta orqonkuman wajyanqanku. Chaypi maychus kaj q'olachina jaywanasta jaywanqanku. Ima qhapajyaykunachus mama qochapi tiyan, chaykunawan kusikonqanku. Mama qocha kantus t'iyupi qhapaj imasta tarispa, kusikonqanku, nispa nerqa Moisesqa. 20 Moisesqa Gadmanta nerqa: Bendecisqa kachun Gadpa jallp'anta jatunyachejqa. Gadqa león jina winkuykun; wateqaspa, runaj makinta, umantawan sik'irparin. 21 Aswan sumaj kaj jallp'ata paypaj ajllakorqa. Kurajman jina payman jallp'ata qorqanku. Israel ayllu masisnimpa ñawpaqenkuta jallp'aman yaykorqa. Tata Diospa kamachisqasninta junt'arqa. Tukuy imatapis Israel ayllu ukhupi cheqanta ruwarqa, nispa nerqa Moisesqa. 22 Danmanta nerqa: Danqa uj león uña jina. Basanmantapacha phinkimorqa, nispa. 23 Moisesqa Neftalimanta nerqa: Neftalitaqa Tata Dios allinta qhawan. Tata Diosmanta ashkha bendicionesta jap'in. Paypa jallp'anqa qochamanta uranejman kanqa, nispa. 24 Asermanta nerqa: Aserqa bendecisqa kachun Jacobpa churisnimpa chawpinkupi, wawqesnimpajpis sumaj munasqa kachun. Aceitewan chakisninta joq'ochakuchun. 25 Wasi punku aldabasnenqa fierromanta, broncemantawan kachun. Wañupunankama kallpayoj kachun. 26 Jesurunpa Diosninmanqa ni ima diospis rijch'akunchu. Chay Diosqa janaj pachamanta phuyus patapi rikhurimun Israel ayllunta yanapanampaj. 27 Israel ayllu, wiñaypaj kawsaj Diosqa qampa pakakunayki. Qanta jap'isunki wiñay atiyniyoj makisninwan. Enemigosniykita ñawpaqeykimanta ayqechenqa, Qantataj kamachisonqa paykunata tukuchinaykita. 28 Israelpa miraynenqa ni pita manchachikusqa kawsakonqa. Chay jallp'asninkupeqa trigo, uvas ima sumajta poqonqa. Parapis ni jayk'aj pisenqachu. 29 Qanqa, Israel, may jina kusikuyniyoj kanki. Pitaj qan jinari? Qantaqa Tata Diospuni salvasunki. Payqa imamantapis jark'akusunki, yanapasunkitaj. Paymin atipana espadaykeqa. Enemigosniykeqa qanman k'umuykamusonqanku, qantaj wapuykachasqankuta tukuchinki.
