DEUTERONOMIO 31

1Moisesqa tukuynin israelitasman ujtawan parlaspa, nerqa: 2Noqaqa pachaj iskay chunka watasniyojña kani. Manaña kallpay kanchu kayman jaqayman rinaypaj. Chantapis Tata Diosqa niwarqa mana Jordán Mayuta chimpanayta. 3Chaywampis Señorniykichej Tata Diosqa ñawpaqeykichejta chimpanqa. Risqaykichejman jinataj chay nacionesta chinkachenqa, jallp'asninkuta jap'ikapunaykichejpaj. Josué ñawpaqeykichejta chimpaspa, pusasonqachej kurajniykichej jina, Tata Dios nisqanman jina. 4Imaynatachus Tata Diosqa ruwarqa amorreospa reyesninkuwan, Sehonwan, Ogwan ima, ajinallatataj chay nacioneswan ruwanqa paykunata chinkachinankama. 5Tata Diosqa chay nacionesta makisniykichejman jaywaykusojtiykichej, qankunaqa paykunawan ruwanaykichej tiyan noqaj kamachisqayman jina. 6Qankunaqa sumajta kallpachakuspa, sinch'ita sayaychej. Ama manchachikuychejchu chay runasta nitaj kharkatitiychejchu, imaraykuchus Señorniykichej Tata Diosqa qankunawan kashan. Paymin qhawasonqachejpuni, manataj saqerpayasonqachejchu, nispa nerqa Moisesqa. 7Chantá Moisesqa Josueta wajyaspa, tukuy israelitaspa ñawpaqenkupi kay jinata payman nerqa: Kunanqa sumajta kallpachakuspa, sinch'ita sayay. Qanqa pusanayki tiyan kay runasta chay jallp'aman, mayqentachus Tata Dios juraspa nerqa qonanta ñawpa tatasninkuman, chayman. Qampuni chay jallp'asta paykunaman rak'iranki. 8Tata Diosqa ñawpaqeykita renqa, qanwantaj kanqa. Payqa qhawasonqapuni, manataj saqerpayasonqachu. Ama manchachikuychu, nitaj kharkatitiychu. 9Moisesqa kay leyta qhelqaspa, jaywarqa sacerdote levitasman, Diospa Trato Ruwasqan arcata apajkunaman, israelitaspa tukuy kurajninkukunamanwan. 10Chantá kamacherqa: Sapa qanchis watapi, Perdonana watapi, Ch'ujllas nisqa fiesta tiempopi, 11tukuy israelitas Señorniykichej Tata Diospa ñawpaqempi, Tata Dios ajllakonqa, chay cheqapi tantakunkichej. Chantá kay leyta leenkichej tukuy israelitas uyarinankuta. 12Chaymantaqa, tukuy runas tantakamunanku tiyan, qharis, warmis, wawas, llajtasniykichejpi tiyakoj forasteros ima, kay leymanta leejta uyarinankupaj, Señorniykichej Tata Diosta jatunchayta yachaqakunankupaj, manchachikuspa chay leypi tukuy nisqanman jina ruwanankupajtaj. 13Ajinata wawasniykichej, pikunachus chay imasta mana rejsejkunaqa uyarispa yachanqanku Señorniykichej Tata Diosta manchachikuyta tukuy kawsayninkupi, ima jallp'apichus tiyakonqanku, chaypi, Jordán Mayuta chimpasqankumantaña. 14Chantá Tata Diosqa Moisesman nerqa: Wañupunayki hora qayllaykamushanña. Josueta wajyamuy, iskayniykichejtaj Dioswan Tinkukuna Toldoman rinkichej. Noqa payman kamachisaj imatachus ruwananta, nispa. Jinamanta Moiseswan Josuewanqa Dioswan Tinkukuna Toldoman rerqanku. 15Chaypi Tata Diosqa jatun chhoqo phuyu ukhupi paykunaman rikhurerqa, chay phuyutaj sayaykorqa Dioswan Tinkukuna Toldo punkupi. 16Chaymantá Tata Diosqa Moisesman nerqa: Qanqa wañupunkiña, kay israelitastaj waj nacionespa diosninkukunata yupaychaspa juchallikonqanku, kunan yaykonqanku, chay jallp'api. Jinamanta paykunaqa qonqapuwanqanku, paykunawan ruwasqay tratotataj p'akenqanku. 17Chayrayku sinch'i phiñakuyneyqa paykunaj contranta k'ajarenqa. Paykunataqa saqerparisaj; mana paykunata qhawarisajchu, ni ima kashajtimpis. Chay chhika nanaykuna, llakiykuna ima patankuman jamojtintaj, paykuna nenqanku: Manachu kay llakiykunaqa jamuwanchej manaña Diosninchej noqanchejwan kasqanrayku? nispa. 18Chaypachataj Noqaqa astawan paykunamanta karunchakusaj, chay tukuy ima millay sajra kajta ruwasqankumanta, waj dioskunata yupaychaspa. 19Kunanqa kay takiyta qhelqaspa, israelitasman yachachiy, chayta takirikunankupaj. Chay takiytaj Noqamanta uj testigo jina kanqa israelitaspa contrankupi. 20Paykunataqa ima jallp'atachus ñawpa tatasninkuman juraspa qonayta nerqani, chayman pusaykusaj. Chay jallp'apeqa lechewan, misk'iwan yaku jina purishan. Chaypi sumajta sajsaykuytawan, wirayaykuytawantaj, waj dioskunaj qhepankuta rispa, yupaychanqanku. Noqata qhesachawanqanku, ruwasqay tratotataj p'akenqanku. 21Chay chhika nanaykuna, llakiykuna ima patankuman jamojtintaj, kay takeyqa juchasninkumanta paykunata yuyarichenqa. Qhepaman mirayninkupis yuyarikuspa, chayta takillanqankutaj. Noqaqa rejsiniña paykunaj yuyayninkuta, qonayta nerqani, chay jallp'aman manaraj paykunata pusaykushaspa, nispa nerqa Tata Diosqa. 22Chay kikimpacha Moisesqa chay takiyta qhelqaspa, israelitasman yachacherqa. 23Nunpa churin Josuemantaj Tata Diosqa kay jinata kamacherqa: Qanqa sumajta kallpachakuspa, sinch'ita sayay. Qanmin israelitastaqa pusaykunki, paykunaman qonayta nerqani, chay jallp'aman, Noqataj qanwampuni kasaj, nispa. 24Moisesqa chay leyesta uj libroman qhelqayta tukuytawan, 25Diospa Trato Ruwasqan arcata apajkuna levitasman nerqa: 26Kay librota jap'ispa, churaychej Señorniykichej Tata Diospa Trato Ruwasqan arcajpa qayllanman, chaypi uj testigo jina contraykichejpi kanampaj. 27Noqa rejsiykichej qankunaqa mana kasukoj rumi sonqo runas kasqaykichejta. Kunan noqa qankunawan kashajtiypis, Tata Diospa contranman tukunkichej. Q'aya minchha wañupojteyqa, imaynachus kankichejpis? 28Kunanqa kayman pusamuwaychej sapa ayllumanta kuraj kamachejkunata, kurajniykichejkunatawan, kay imasmanta paykunaman parlanaypaj, paykunaj contrankutataj cielojpa ñawpaqempi, kay pachaj ñawpaqempipis ninaypaj. 29Noqaqa yachani wañupusqaymanta qhepamanqa millayman tukuspa, saqenaykichejta chay ñanta, qhatinaykichejta nerqaykichej, chayta. Chantaqa yachallanitaj qhepamanqa sinch'i llakiykuna jamusunaykichejta, Tata Diospa ñawpaqempi sajra kajta ruwasqaykichejmanta, chay imaswan Payta phiñachispa. 30Chaymanta Moisesqa kay takiyta israelitaspa ñawpaqenkupi qallariyninmanta tukukuyninkama leerqa.

will be added

X\