DEUTERONOMIO 30

1Kay tukuy nisqasniy qankunaman jamojtin, bendicionchus, chayrí maldicionchus, ñawpaqeykichejpi churasqay, chaykuna, chay nacionespi, maymanchus Señorniykichej Tata Dios wijch'usonqachej, chaypi, 2ichapis kaykunapi umachakuwajchej. Ichapis qankuna, wawasniykichej ima Tata Diosman kutiriykuwajchej, kasuspa tukuy sonqoykichejwan, tukuy almaykichejwampis, kunan noqa kamachishaykichej chayman jina. 3Chaypacha Señorniykichej Tata Diosqa kutichimusonqachej karu llajtasmanta, khuyakusonqachejtaj. Ujtawantaj tantamusonqachej chay tukuy nacionesmanta, maykunamanchus wijch'usorqachej, chaykunamanta, 4kay pachaj k'uchunkamapis ch'eqerasqa kashajtiykichej. Chaykunamantapacha Señorniykichej Tata Diosqa kutirichimusonqachej. 5Jinamanta Tata Diosqa ujtawan kutichimusonqachej, tatasniykichej jap'ikorqanku, chay jallp'aman, qankunataj ujtawan chay jallp'asta jap'ikapunkichej. Chaypi Tata Diosqa qhapajyachisonqachej, mirachisonqachejtaj ñawpa tatasniykichejmanta astawan. 6Señorniykichej Tata Diosqa llimphuchanqa sonqoykichejta, mirayniykichejpa sonqosninkutapis, Payta munakunaykichejpaj tukuy sonqoykichejwan, tukuy almaykichejwampis, ajinamanta kawsanaykichejpaj. 7Señorniykichej Tata Diosqa chay tukuy maldicionesta enemigosniykichejmanñataj chayachenqa, pikunachá chejnikuspa qhatiykachasorqachej, chaykunaman. 8Qankunaqa Tata Diosman kutirikunkichej, kasuspataj tukuy kamachisqasninta allinta ruwankichej, kunan kamachishaykichej, chaykunata. 9Chaymantataj Tata Diosqa qhapajyachisonqachej tukuy ruwasqasniykichejpi; ashkha wawasniyoj kankichej, ashkha uywasniyoj ima. Cosechasniykichejta Tata Diosqa sumajta poqochenqa. Ajinapuni kanqa; Señorniykichej Tata Dios ujtawan kusikonqa qankunapaj allinta ruwaspa, imaynatachus ñawpa tatasniykichejpaj ruwarqa, ajinata. 10Chayqa kanqa, maypachachus Señorniykichej Tata Diosta kasojtiykichej, chantá kamachisqasninta, kay leyesninta ima junt'ajtiykichej, kay libropi qhelqasqa chayta, chantá Paymantaj kutirikojtiykichej tukuy sonqoykichejwan, tukuy almaykichejwan ima. 11Kay kamachisqata kunan qoshaykichej, chayqa ruwanapaj jinalla, nitaj qankunamantaqa karupichu kashan. 12Manamin chay kamachisqaqa janaj pachapichu kashan, ninaykichejpaj: Pitaj kunanqa janaj pachaman wicharipuwasun urayk'uchimunampaj, rejsichinawanchejpajtaj, chayman jina ruwananchejpaj? nispa. 13Manataj mama qochaj chimpampichu kashan ninaykichejpaj: Pitaj mama qochata chimpapuwasun apampunawanchejpaj, rejsichinawanchejpajtaj, chayman jina ruwananchejpaj? nispa. 14Manachayqa kay kamachisqaqa qayllaykichejpipuni kashan, simiykichejpi, sonqoykichejpi ima, junt'ayta atinaykichejpaj. 15Kunan noqaqa ñawpaqeykichejpi churani kawsayta, allin kajtawan; chantá churallanitaj wañuyta, mana allin kajtawan. 16Sichus kunan kasunkichej, kamachishaykichej, chaykunata Señorniykichej Tata Diosta munakuspa, ñankunanta purispa, junt'aspa kamachisqasninta, leyesninta, nisqasnintawan ima chayqa, chaypacha kawsankichej, ashkha wawasniyojtaj kankichej. Señorniykichej Tata Diosqa bendecisonqachej, ima jallp'apichus tiyakunkichej, chaypi. 17Chantá sichus chaykunamanta sonqoykichejta karunchankichej, aysachikunkichejtaj waj dioskunaman qonqorikuspa yupaychanaykichejpaj chayqa, 18kunan noqaqa niykichej chinkachisqapuni kanaykichejta, manataj unaytachu tiyakunkichej, chay jap'ikusqaykichej jallp'api Jordán Mayuta chimpasqaykichejmanta. 19Kunanqa noqa janaj pachaj ñawpaqempi, kay pachaj ñawpaqempipis kayta niykichej: Ñawpaqeykichejman churani kawsayta, wañuytawan chantá bendicionta, maldiciontawan, chaykunamanta ajllakunaykichejpaj. Kawsayta ajllakuychej ari, jinamanta qankuna, wawasniykichej ima kawsanaykichejpaj. 20Señorniykichej Tata Diosta munakuychej, kasuychejtaj; Payllata qhatiychej, imaraykuchus Paymin kawsayniykichejqa, unayta tiyakunaykichejpaj chay jallp'api, Señorniykichej Tata Dios juraspa qonanta nerqa ñawpa tatasniykichej Abrahamman, Isaacman, Jacobman ima, chaypi.

will be added

X\