1 Kay jinata Tata Diosqa Moab jallp'api Moisesman kamacherqa uj tratota israelitaswan ruwananta, Horeb Orqopi tratota ruwasqanmanta qhepata. 2 Moisesqa israelitasta tantachispa, nerqa: Qankunaqa rikorqankichej imaynatachus Tata Diosqa Egiptopi Faraonta ruwasqanta, tukuy kamachisninta, jallp'asninta ima. 3 Qankunaqa chay imasta rikorqankichej, jatuchaj t'ukuna ruwaykunata, señalesta, milagrosta ima. 4 Chaywampis kunankama Tata Diosqa entiendej sonqota manaraj qosunkichejchu, nitaj ñawista chay imasta rikunaykichejpaj, nillataj ninristapis uyarinaykichejpaj. 5 Noqaqa tawa chunka watas junt'ata ch'in pampaspi pusaykacharqaykichej. Chay purisqaykichejpitaj ni p'achasniykichej, nitaj juk'utasniykichejpis thantakorqachu. 6 Chaypacha qankunaqa t'antata mana mikhorqankichejchu, manallataj vinota, ni ima machachikoj ujyanatapis ujyarqankichejchu, yachanaykichejpaj Tata Diosqa qankunaj Diosniykichej kasqanta. 7 Kay jallp'aman chayamojtinchejkama, noqanchejwan maqanakoj llojsimorqanku Hesbonmanta Sehón rey, Basanmanta Og sutiyoj rey ima, paykunatataj atiparqanchej. 8 Chaymantataj jallp'asninkuta jap'ikapuspa, qoporqanchej Rubén aylluman, Gad aylluman, Manasés khuskan ayllumanwan. 9 Chayrayku qankunaqa waqaychaychej, junt'aychejtaj kay trato ruwasqata, tukuy ima ruwasqasniykichejpi allin risunaykichejpaj. 10 Kunanqa tantasqa kashankichej tukuyniykichej Señorniykichej Tata Diospa ñawpaqempi: Sapa ayllumanta kamachejkuna, kurajkuna, yachayniyojkuna, tukuy qharis, 11 wawas, warmis, qankunawan tiyakoj forasteros, llant'eros, yakuta aysajkunapiwan. 12 Ajinaqa qankuna juraspa yaykunkichej, kunan kay tratota Señorniykichej Tata Dios qankunawan ruwashan, chayman. 13 Chantaqa kunanmantapacha qankuna Tata Diospa ayllun kankichej, Paytaj qankunaj Diosniykichej kanqa, qankunaman nisusqaykichejman jina, imaynatachus ñawpa tatasniykichej Abrahamman, Isaacman, Jacobman ima juraspa nisqanman jina. 14 Tata Diosqa nin mana qankunallawanchu kay tratota juraspa ruwasqanta, 15 manachayqa ruwashallantaj, pikunachus manaraj kunan noqanchejwanchu Señorninchej Tata Diospa ñawpaqempi kashanku, chaykunawampis. 16 Qankunaqa sumajta yachankichej imaynatachus Egiptopi tiyakusqanchejta, imaynatachus waj nacionespa jallp'asninkunejta pusamuwasqanchejtataj. 17 Chay nacionespi rikorqanchej millay ruwasqasninkuta, lantisninkutapis k'ullumanta, rumismanta, qorimanta ima ruwasqasta chay runas yupaychanku, chaykunata. 18 Kunanqa qankuna ukhupi ama kachunchu Señorninchej Tata Diosta qhesachaj qhari, chayrí warmi, chayrí familia, chayrí ima ayllupis, chay nacionespa diosninkukunata yupaychajqa. Ama qankuna ukhupi kachunchu chay jina runa uj venenoyoj saphi jina jayata poqojqa. 19 Sichus chay jina runa kay juramentota uyarisqanmanta qhepata sumaj runa kasqanta yuyakuspa ninman: Allillampuni riwanqa tukuy imatachus ruwasqayta ruwajtiypis, nispa chayqa, tukuyniykichej chay runanejta chinkachisqa kankichej. 20 Tata Diosqa mana munanqachu chay runata perdonayta, manachayqa k'ajaj phiñakuynimpi chay runata castiganqa. Kay libropi qhelqasqa kaj tukuy maldicionestaj payman urmamonqa. Jinamanta, Tata Dios chay runaj sutinta kay pachamanta chinkachenqa. 21 Tata Diosqa chay runata tukuy Israel ayllumanta ñak'ariypaj t'aqanqa; chay tukuy maldicionesqa payman chayanqa, kay trato ruwasqa ley libropi qhelqasqa kasqanman jina. 22 Qhepaman kajkuna mirayniykichej, forasteros ima rikonqanku chay imaymana nanaykunata, onqoykunata ima, Tata Diosqa kay jallp'aman apachimonqa, chaykunata. 23 Tukuy kay jallp'apeqa rikonqanku azufrellata, kachillata, ruphasqa jallp'ata imalla. Chaypi mana imatapis tarponqankuchu, nitaj imapis poqoyta atenqachu. Manapuni ima qhorallapis wiñanqachu, imaynachus karqa Sodoma, Gomorra, Adma, Zeboim llajtaspi, mayqenkunatachus Tata Diosqa sinch'i phiñakuyninwan chinkarparicherqa, chaykunapi. 24 Chayrayku tukuy naciones tapukonqanku: Imaraykutaj Tata Diosqa chay jinata ruwan kay jallp'awanri? Imatataj niyta munan kay jina sinch'i phiñakuyninri? nispa. 25 Kutichenqankutaj: Paykunaqa qonqaporqanku ñawpa tatasninkoj Señorninku Tata Dioswan tratota ruwasqankumanta, paykunata Egiptomanta orqhomushajtin. 26 Paykunaqa qonqorikuspa, waj dioskunata yupaychamunku, mayqenkunatachus ni jayk'ajpis rejsejchu kanku, nitaj yupaychajchu kanku, chaykunata. 27 Chayrayku Tata Diosqa phiñakun kay naciompaj, jallp'ampa patanmantaj chayachimun tukuy maldicionesta, kay libropi qhelqasqa kashan, chaykunata. 28 Kay runastaqa Tata Dios may sinch'i phiñakuyninwan qharqon jallp'asninkumanta, wijch'umuntaj waj jallp'asman, imaynatachus rikushankichej jina, nispa nenqanku. 29 Mana yachasqanchej pakasqa imasqa Señorninchej Tata Diospallata. Diosninchej sut'inchawasqanchej imasrí noqanchejpata, wawasninchejpatawan ima wiñaypaj kanku junt'ananchejpaj, kay leypi ima kamachisqaschus kashan, chaykuna.
