DEUTERONOMIO 27

1Chantá Moiseswan, tukuy kurajkunawan israelitasta kay jinata kamacherqanku: Kasuychej tukuy kamachisqasta, kunan qoshaykichej, chaykunata. 2Maypachachus Jordán Mayuta chimpaspa, chayankichej Señorniykichej Tata Dios qosonqachej, chay jallp'aman chaypacha, jatuchaj rumista oqharinkichej, calwantaj lluch'iykunkichej. 3Chay rumispi kay tukuy kamachisqasniyta qhelqankichej chay jallp'aman chayaytawankama, maypichus lechewan misk'iwan yaku jina purishan, chayman. Chay jallp'ata Señorniykichej Tata Dios qosonqachej ñawpa tatasniykichejman nisqanman jina. 4Ajinata Jordán Mayuta chimpaytawankama, kunan kamachisqasuykichejman jina chay rumista sayachinkichej Ebal Orqo patapi, calwan lluch'ispa. 5Chaypitaj Señorniykichej Tata Diospaj uj rumi altarta ruwankichej mana ch'eqospalla. 6Ajinamanta altartaqa mana ch'eqosqa rumismanta Señorniykichej Tata Diospaj ruwankichej. Chay patapitaj q'olachina jaywanasta Señorniykichej Tata Diosman jaywankichej. 7Chantá jaywallankichejtaj allinyakuy jaywanastapis. Chaypitaj Señorniykichej Tata Diospa ñawpaqempi mikhunkichej, kusikunkichejtaj. 8Kunan qankunaman willashani, kay kamachisqastaqa chay rumispi sumaj sut'ita qhelqankichej, nispa nerqa Moisesqa. 9Chantá Moisesqa, sacerdote levitaswan khuska israelitasman kay jinata nillarqankutaj: Ch'inyakuychej, israelitas, uyariychejtaj kayta: Kunan qankunaqa Señorniykichej Tata Diospa ayllunman tukunkichej. 10Chayrayku qankunaqa Payta uyarinaykichej tiyan; kamachisqasninta, leyesnintawan junt'anaykichej tiyan, kunan kamachishaykichej, chaykunata. 11Chay p'unchaypacha Moisesqa israelitasman kay jinata kamacherqa: 12Jordán Mayuta chimpajtiykichejkama, bendicionta parlarinankupajqa Gerizim Orqoman wicharenqanku kay ayllus: Simeón ayllu, Leví ayllu, Judá ayllu, Isacar ayllu, José ayllu, Benjamín ayllu ima. 13Maldicionta parlarinankupajtaj Ebal Orqoman wicharenqanku kay ayllus: Rubén ayllu, Gad ayllu, Aser ayllu, Zabulón ayllu, Dan ayllu, Neftalí ayllu ima. 14Chantá levitasqa sinch'ita parlaspa, tukuy israelitasman kay jinata nenqanku: 15Maldecisqa kachun imallamantapis lantita ruwajqa, pakayllamanta yupaychanampaj. Chay runaj makinwan ruwasqanqa Tata Diospa ñawpaqempi ancha millay, nispa. Chayta uyarispataj, israelitas nenqanku: Ajina kachun, nispa. 16Maldecisqa kachun pichus tatanta, mamanta pisipaj qhawajqa. Tukuy israelitastaj nenqanku: Ajina kachun, nispa. 17Maldecisqa kachun qayllampi kaj runa masimpa jallp'anman lindenta suchuchejqa. Tukuy israelitastaj nenqanku: Ajina kachun, nispa. 18Maldecisqa kachun uj ciegota ñanninmanta pantachejqa. Tukuy israelitastaj nenqanku: Ajina kachun, nispa. 19Maldecisqa kachun juiciopi runaspaj mana cheqanta ruwajqa, forasteropaj, chayrí viudapaj, chayrí wajcha wawaspaj ima. Tukuy israelitastaj nenqanku: Ajina kachun, nispa. 20Maldecisqa kachun tatampa warminwan puñuykojqa, p'enqaypi tatanta rikhurichisqanrayku. Tukuy israelitastaj nenqanku: Ajina kachun, nispa. 21Maldecisqa kachun ima animalwampis warmiwan jina kajqa. Tukuy israelitastaj nenqanku: Ajina kachun, nispa. 22Maldecisqa kachun tatanmanta pananwan, chayrí mamanmanta pananwan puñuykojqa. Tukuy israelitastaj nenqanku: Ajina kachun, nispa. 23Maldecisqa kachun warmimpa mamanwan puñuykojqa. Tukuy israelitastaj nenqanku: Ajina kachun, nispa. 24Maldecisqa kachun runa masinta pakayllamanta wañuchejqa. Tukuy israelitastaj nenqanku: Ajina kachun, nispa. 25Maldecisqa kachun mana juchayoj runata wañuchinampaj qolqeta jap'ejqa. Tukuy israelitastaj nenqanku: Ajina kachun, nispa. 26Maldecisqa kachun Diospa kay tukuy nisqasninta mana kasojqa, manataj ruwajqa. Tukuy israelitastaj nenqanku: Ajina kachun, nispa.

will be added

X\