1 Maypachachus yaykunkichej Señorniykichej Tata Dios herenciaykichejpaj jallp'ata qopusonqachej chayman, chaypitaj tiyakapunkichej chaypacha, 2 chay jallp'aj ñawpaj poqoyninta sapa cosechamanta Tata Diospaj t'aqankichej. Chayta apankichej canastapi, may cheqatachus Señorniykichej Tata Dios ajllakonqa sutin jatunchasqa kanampaj, chayman. 3 Chaypitaj sacerdote mit'ampi kashajman qayllaspa, rimarinkichej: Noqaqa kunan nini Señorniy Tata Diospa ñawpaqempi chay jallp'aman yaykusqayta, mayqentachus Señorninchej Tata Dios ñawpa tatasninchejman juraspa nerqa qonawanchejta, chayman, nispa. 4 Chantá sacerdoteqa chay apasqaykichej canastata jap'ispa, churanqa Señorniykichej Tata Diospa altarnimpa ñawpaqenman. 5 Qankunataj Señorniykichej Tata Diospa ñawpaqempi kay jinata nillankichejtaj: Ñawpa tatayqa uj arameo forastero karqa. Egiptoman ripuspa, chaypi tiyakorqa ayllun pisilla kashajtin. Chantaqa miraynin jatun nacionman tukorqa. Chay aylloqa atiyniyoj, ashkha runasniyojtaj karqa. 6 Chaypitaj egipciosqa mayta ñak'arichiwarqayku, llakichiwarqayku, sinch'itataj trabajachiwarqayku. 7 Chaypacha mañakorqayku ñawpa tatasniykojpa Señornin Tata Diosmanta yanapanawaykuta. Paytaj mañakusqaykuta uyariwarqayku, rikorqataj llakiyniykuta, ñak'ariyniykutapis. 8 Jinata Tata Diosqa Egiptomanta orqhomuwarqayku jatun atiyninta rikuchispa, sinch'i manchachiywan, señaleswan, milagroswan ima. 9 Chaymantataj kayman pusamuwarqayku, qowarqaykutaj lechewan misk'iwan purishaj jallp'ata. 10 Chayrayku kunan apamuni Tata Diospa qowasqan jallp'aj ñawpaj poqoyninta, nispa rimarinkichej. Chantá chay canastata Señorniykichej Tata Diospa ñawpaqenman churaspa, Payta yupaychankichej. 11 Chaymantaqa Señorniykichej Tata Dios tukuy imasta qosusqaykichejmanta mayta kusikunkichej tukuy familiaykichejwan, qanwan tiyakoj levitaswan, jinallataj llajtaykichejpi tiyakoj forasteroswan ima. 12 Kinsa wata kajpi, chay chunkamanta ujninta qona watapi tukuy poqochisqaykichejmanta sapa chunkamanta ujninta t'aqankichej. Chay t'aqasqaykichejtaqa qonkichej levitasman, llajtaykichejpi tiyakoj forasterosman, wajcha wawasman, viudasman ima, paykuna llajtaykichejpi sajsakunankukama mikhunankupaj. 13 Chaymantataj Señorniykichej Tata Diospa ñawpaqempi rimarinkichej: Imatachus Señorniyku Tata Diospaj t'aqasqaykuta wasiykumanta orqhomuspa, qoykuña levitasman, forasteros kaypi tiyakojkunaman, wajcha wawasman, viudasman ima, niwasqaykuman jina kamachiwasqasniykuta kasuspa; mana qonqaspa, tukuyninta junt'ayku. 14 Chay t'aqasqaykumantaqa mana mikhuykuchu wañusqayoj llakisqa kashaspapis, nitaj mana llimphupaj qhawasqa kashaspapis, nillataj wañusqaspa sutinkupi mikhuykuchu. Señorniyku Tata Dios niwasqaykuta kasuyku, kamachiwasqasniykuman jina tukuy imata ruwaspa. 15 Kunanqa qhawarimuy janaj pachamantapacha, tiyakunki chaymantapacha, bendeciytaj Israel aylluykita, kay qowasqayku jallp'aykutapis, lechewan, misk'iwan yaku jina purishan, chayta, ñawpa tatasniykuman nisqaykiman jina, nispa rimarinkichej. 16 Señorniykichej Tata Dios kunan kamachisunkichej kay leyesta, kay kamachisqasnintataj junt'anaykichejta. Chaykunataqa tukuy sonqoykichejwan, tukuy almaykichejwan ima kasuychej. 17 Kunanqa ninkichejña Tata Diosqa Diosniykichej kasqanta, ninkichejtaj ñankunanta purinaykichejta, nillankichejtaj kasunaykichejtapuni leyesninta, kamachisqasninta ima, nisqasninta junt'aspa. 18 Tata Diospis kunanqa nillantaj qankunalla Paypa ayllun kasqaykichejta nisusqaykichejman jina, kamachillantaj nisqasninta junt'anaykichejta. 19 Tukuy ruwasqan nacionesmanta qankunata aswan pataman churasonqachej, Payqa yupaychasqa, rejsisqa, jatunchasqataj kanampaj. Ajinaqa qankunalla Señorniykichej Tata Diospa ajllasqa ayllun kankichej nisqanman jina.
