1 Sichus mayqenkuna imamantapis ch'ajwaspa, siminakushanku chayqa, richunku juezkunaman justiciata tarinankupaj. Ajinamanta mana juchayoj kajqa llimphu llojsenqa, juchayoj kajtaj juchachasqa kanqa. 2 Sichus chay juchachasqa runaqa jasut'inapaj jina kanman chayqa, juezqa chay runata pampaman winkuchispa, kamachenqa ñawpaqempi juchanman jina seq'onankuta. 3 Tawa chunkakamalla seq'oyta atinkichej, chaymanta astawanqa amaña; ama chay llajta masiykichejta chaymanta astawanqa seq'onkichejchu. Pajtataj qankunaj ñawpaqeykichejpi p'enqachiwajchej. 4 Trillaj bueymanqa ama ñukuta churankichejchu. 5 Sichus uj runaqa wawqe masintin tiyakunman, ujnin kajtaj mana wawayoj wañupunman chayqa, chay viudaqa mana waj runawan casarakuyta atinchu. Qosampa wawqellanwan casarakuyta atin, ajinamanta wañoj wawqempa sutin ama chinkanampaj. 6 Chay warmejpata kuraj kaj churenqa ñawpaj qosampa churin jina qhawasqa kanqa. Ajinamanta chay warmej ñawpaj qosampa sutin Israel ukhumanta mana chinkanqachu. 7 Sichus chay qhareqa wawqempa warminwan casarakuyta mana munanman chayqa, chay warmeqa llajtamanta kurajkunaman rispa, kay jinata nenqa: Wañoj qosaypa wawqenqa mana munanchu wawqempa sutin Israel ukhupi kananta; mana noqawan casarakuyta munanchu, nispa. 8 Chantá llajtamanta kurajkuna chay qharita wajyaspa, paywan parlanqanku. Chay qharitaj kurajkunaman ichapis ninman: Manapuni chay warmiwan casarakuymanchu, nispa. 9 Chaypacha wañoj wawqempa warmin chimpaytawan, tukuy kurajkuna qhawashajtinku, chay qharej ujnin juk'utanta chakinmanta lluch'onqa; uyampitaj thoqaykuspa, nenqa: Ajinata ruwana wawqempa mirayninta chinkachiyta munaj qhariwanqa, nispa. 10 Jinamanta chay runaj ayllun Israel ukhupi sutichasqa kanqa, Juk'utas Lluch'usqa, nisqa. 11 Ichapis iskay qharis maqanakushajtinku, ujnin kajpa warmin paykunaman qayllaykunman qosanta jark'akuyta munaspa, chantataj chay qosanta maqaj qharejpa khapanmanta jap'iykunman. 12 Ajina kajtenqa, chay warmej makinta khuchunkichej mana khuyaspa. 13 Wayaqaykichejpeqa ama iskay pesasta apaykachankichejchu, ujta jatunta, ujtataj juch'uyta. 14 Nillataj wasisniykichejpi iskay tupus kachunchu, ujnin jatun, ujnintaj juch'uy. 15 Manachayqa uj rejlla kanan tiyan, imatapis cabalta pesanaykichejpaj, jinallataj tupunaykichejpajpis. Jinamanta unayta kawsakunkichej, Señorniykichej Tata Dios jallp'asta qosonqachej, chaypi. 16 Chay jinata ruwajkunataqa, ch'awkiyajkunatapis Señorniykichej Tata Dios chejnin. 17 Qankunaqa yuyarikuychej imatachus amalecitas ruwasusqaykichejta, Egiptomanta llojsimushajtiykichej. 18 Chay ñanta sayk'usqa jamushajtiykichej, paykunaqa qankunawan maqanakoj sayaykamusorqachej mana Diosta manchachikuspa, qhepapi kajkunatapis munasqankuman jina wañuracherqanku. 19 Chayrayku, Señorniykichej Tata Dios qayllaykichejpi kaj tukuy enemigosniykichejmanta kacharichisojtiykichej, ima jallp'apichus herenciaykichejta qopusonqachej, chaymantaqa amalecitasta chinkachinkichej. Amapuni qonqankichejchu.
