DEUTERONOMIO 24

1Uj qhari uj warmiwan casarakuytawan, sichus qhepaman warminta qhesachan, paypi ima p'enqaytapis tarispa, manaña payta munan chayqa, uj t'aqakuy papelta warminman jaywachun, chantá payta kachapuchun. 2Jinamanta chay warmeqa ripuspa, waj qhariwanñataj casarakuyta atin. 3Sichus qhepan kaj qosanñataj payta chejninman chayqa, uj t'aqakuy papelta payman jaywanqa, jinaspataj kachaponqa. Chayrí sichus chay qhepa kaj qosan wañupun chayqa, 4ñawpaj kaj qosanqa manaña atenqachu paywan ujtawan casarakuyta, chay warmej honran t'akasqa kasqanrayku. Chay jina ruwayqa millay kanman Tata Diospa ñawpaqempi. Ama juchawan ch'ichichankichejchu, Señorniykichej Tata Dios qosunkichej, chay jallp'ata. 5Sichus uj qhari chaypachallaraj casarakun chayqa, amaraj wañuchinaku maqanakuman richunchu, nitaj ima junt'anata ruwachichunkuchu uj wata junt'ata, wasimpi karikunampaj warminta kusichispa. 6Ama pejpatapis molino ruminta prendata jina jap'ikunkichejchu, ni patan kajta nitaj uran kajta. Jinatachus ruwankichej chayqa, chay runaj kawsayninta prendata jap'ishawajchej jina kanman. 7Sichus mayqellampis israelita masinta suwaspa apan mana munashajta wata runan kanampaj, chayrí vendemunampaj, chayta ruwashaspataj jap'ichikun chayqa, chay apaj runa wañuchisqa kanqa. Ajinamanta chay sajra kajta qankuna ukhumanta chinkachinkichej. 8Lepra onqoymantaqa ruwaychej imaynatachus sacerdote levitas kamachisusqaykichejman jina. Chaytaqa kikintapuni ruwaychej, imaynatachus noqa paykunaman kamachisqayman jina. 9Qankunaqa allinta yuyarikuychej imaynatachus Tata Diosqa Mariata leprawan onqoykuchisqanta, Egiptomanta llojsimushajtiykichej. 10Sichus imallatapis runa masiykichejman manurinkichej chayqa, ama wasinman yaykunkichejchu prendata oqharej. 11Jawallapi suyankichej imatapis orqhomuspa prendata qosunaykichejpaj. 12Sichus chay runa wajchalla kanman chayqa, ama tutantinta chay prendata jap'ikunkichejchu. 13Inti chinkaykuyta prendanta qopunkichejpacha, chaywan qhataykukuspa puñukunampaj. Jinapi payqa bendecisonqachej, chay ruwasqaykichejtaj Señorniykichej Tata Diospa ñawpaqempi allimpaj qhawasqa kanqa. 14Peonniykichej wajcha mana kapuyniyoj runawanqa maychus kajta ruwankichej, qankunaj llajta masiykichejpis kachun, chayrí llajtaykichejpi tiyakoj forasteropis kachun. 15Chay kikin p'unchaypacha, manaraj inti chinkaykushajtin, trabajachisqaykichejmanta pagonta qopuychej. Payqa wajchamin; chay qolqeta suyashan kawsakunampaj. Chaytachus ruwankichej chayqa, mana Tata Diosman qankunaj contraykichejta qhaparenqachu, qankunataj mana juchachasqachu kankichej. 16Mana pipis wañuchisqa kanqachu wawampa juchanrayku, nitaj pipis wañuchisqa kanqachu tatampa juchanrayku. Manachayqa sapa uj wañuchisqa kanqa juchanrayku. 17Ama forasteropajqa imachus mana cheqan kajtaqa ruwankichejchu, ni wajcha wawaspajpis, amallataj viudasmantapis p'achasninkuta prendapaj jap'ikapunkichejchu. 18Qankunaqa ama qonqaychejchu Egiptopi wata runas kasqaykichejta, Señorniykichej Tata Dios chaymanta orqhomususqaykichejta ima. Chayrayku noqaqa kamachiykichej kay tukuy imasta junt'anaykichejta. 19Sichus ruthuytawan apashaspa uj marq'ata qonqaspa saqerparinkichej chayqa, amaña chayta oqharej kutinkichejchu. Saqeychej mayqen forasteropis oqharikunanta, chayrí uj wajcha wawa, chayrí uj viuda, Señorniykichej Tata Dios bendecisunaykichejpaj tukuy ruwasqasniykichejpi. 20Aceitunasta pallaspañaqa, amaña chajmankichejchu; saqeychej forasteros, wajcha wawas, viudas ima chajmakunankuta. 21Uvasta pallaspañaqa, amaña chajmankichejchu; saqeychej forasteros, wajcha wawas, viudas ima chajmakunankuta. 22Qankunaqa ama qonqaychejchu Egipto jallp'api wata runas kasqaykichejta. Chayrayku chay tukuy imasta kamachiykichej junt'anaykichejta.

will be added

X\