DEUTERONOMIO 23

1Tata Diospa tantakuyninmanqa mana yaykuyta atenqankuchu capasqa kajkuna, chayrí runtusninku nanachisqa kajkuna. 2Tata Diospa tantakuyninmanqa mana yaykuyta atenqankuchu Diospa mana munasqan casarakuymanta nacekojkuna nitaj k'ipa wawas, ni chunka mitakamapis. 3Tata Diospa tantakuyninmanqa manallataj jayk'ajpis yaykonqankuchu amonitas, moabitaspis, ni chunka mitamanta qhepamampis. 4Paykunaqa mana yakullatapis jaywarisorqachejchu, nitaj t'antallatapis, maypachachus paykunaj jallp'ankuta Egiptomanta llojsimuspa pasasharqankichej chaypacha. Chantapis paykunaqa Mesopotamiapi Petormanta Beorpa churin Balaamman pagarqanku, qankunata maldecichiyta munaspa. 5Señorniykichej Tata Diostaj Balaamta mana uyarerqachu, manachayqa chay maldicionninta bendicionman tukucherqa qankunapaj, Pay munakususqaykichejrayku. 6Chaynejta ama paykunata yanapaychejchu, nitaj allin kayninkuta ni jayk'ajpis mask'aychejchu. 7Edomitastaqa ama chejnikunkichejchu, imaraykuchus paykunaqa ayllullaykichejtaj kanku. Nitaj egipciostapis chejninkichejchu, imaraykuchus paykunaj llajtankupi forasteros jina tiyakorqankichej. 8Chaykunamantaqa kinsa mitamanta qhepaman kajkuna Tata Diospa tantakuyninman yaykuyta atenqanku. 9Enemigosniykichejwan maqanakoj rispaqa, amapuni mana allin kajtaqa ruwankichejchu. 10Sichus tuta puñuypi qharej mujun llojsinman chayqa, jaramanta jawaman llojsichun, amataj yaykumuchunchu. 11Tardeyaykuyta yakuwan mayllakuchun, inti chinkaykuytataj jaraman yaykupuchun. 12Jisp'anaykichejpajqa jaramanta jawapi uj cheqata señalankichej. 13Chantá chumpiykichejpi warkhusqata allanapaj uj k'aspita apaykachankichejpuni, jawaman llojsispataj chay k'aspiwan t'oqota ruwankichej. Chaymantaj jatun jisp'ayniykichejta jallp'awan p'ampankichej. 14Señorniykichej Tata Diosqa qankunaj chawpiykichejpi kashan, chay jaraykichejpi ima kajtimpis yanapanasuykichejpaj, enemigosniykichejtapis atipayta yanapanasuykichejtapis. Chay jaraykichejqa llimphupuni kanan tiyan, Dios ama chaynejpi ima ch'ichitapis rikunampaj. Manachus jina kanqa chayqa, Dios qankunamanta karunchakonqa. 15Pi wata runapis patronninmanta qankunaman ayqekamusojtiykichej, ama payta ñawpa patronninman kutichinkichejchu. 16Chay wata runaqa saqeychej qankunawan kakojta, may llajtapichá tiyakuyta munan, chaypi. Amataj pipis payta llakichichunchu. 17Israel ukhupi mana kanqachu phisu warmis, nitaj khuchi qharispis, imaynatachus cheqan Diospi mana creejkunaqa templosninkupi ruwanku, ajinata. 18Ama saqenkichejchu runas apanankuta Señorniykichej Tata Diospa wasinman khuchichakuspa ganasqanku qolqeta, ni qharis nitaj warmis Tata Diosman qosaj nisqankuta junt'anankupaj. Chay jina ruwaykunataqa Tata Dios mana rikuyllatapis munanchu. 19Llajta masiykichejman qolqeta manusqaykichejmanta ama interesta mañankichejchu, nitaj mikhunamantapis, chayrí waj imasta mañarisqaykichejmantapis. 20Forasteroman qolqeta manuyta atinkichej interesniyojta; llajta masiykichejmantarí amapuni interesta mañankichejchu. Ajinamanta imatapis ruwajtiykichej, Señorniykichej Tata Dios bendecisonqachej, maypichus tiyakunkichej, chaypi. 21Imatachus Señorniykichej Tata Diosman qonaykichejta ninkichej, chaytaqa usqhayllata junt'anaykichejpuni tiyan. Chaymantaqa allinta yachakuychej: Señorniykichej Tata Diosqa cuentata mañasonqachejpuni chay qosaj nisqaykichejmanta. Manachus jinata ruwankichej chayqa, juchayoj rikhurinkichej. 22Sichus imatapis Diosman mana qoyta munankichej chayqa, mana juchayojchu kankichej. 23Chaywampis imatachus Tata Diosman qonaykichejta nerqankichej, chay nisqaykichejta junt'anaykichejpuni tiyan. 24Runa masiykichejpa huertanman yaykurispaqa, mashkhatachus atisqaykichejta uvasta mikhuyta atinkichej; jinapis ama canastapi apakunkichejchu. 25Runa masiykichejpa trigo chajranman yaykurispaqa, trigo umasta makillaykichejwan p'itiyta atinkichej. Chaywampis ama hosewanqa ruthunkichejchu.

will be added

X\