DEUTERONOMIO 20

1Wañuchinaku maqanakuman llojsejtiykichej, sichus enemigosniykichej rikhurisonqachej ashkha caballosniyoj, carretasniyoj, qankunamanta aswan ashkha soldadosniyoj ima chayqa, ama paykunamanta manchachikunkichejchu. Egiptomanta orqhomusorqachej, chay Señorniykichej Tata Diosqa qankunawan kashan. 2Maypachachus maqanakunaykichejña kashajtintaj, sacerdoteqa soldadosman rispa, nenqa: 3Uyariychej, israelitas: Kunanqa enemigosniykichejwan maqanakamunkichej. Ama iskayrayankichejchu, amataj manchachikunkichejchu, nitaj kharkatitinkichejchu, nillataj mancharikunkichejchu, 4imaraykuchus Señorniykichej Tata Diosqa qankunawan kashan. Payqa qankunarayku enemigosniykichejwan maqanakuspa, yanapasonqachej atipanaykichejpaj, nispa. 5Chaymantá kurajkunaqa soldadosman nenqanku: Sichus mayqenniykichejpis mosoj wasita ruwakuspa, manaraj chaypi tiyakun chayqa, kunampacha chay wasinman tiyakapoj kutipuchun. Pajtataj maqanakupi chay mosoj wasiyoj wañunman, ujtaj chay wasinta ch'allanman. 6Sichus mayqenniykichej uvas huertata churarqa, manarajtaj imatapis chaymanta mikhurerqa chayqa, kutipuchun wasinman chay plantasqanmanta mikhunampaj. Pajtataj maqanakupi wañunman, wajtaj rispa chay uvasta pallakamunman. 7Sichus mayqenniykichej casarakunampaj parlasqa kanman chayqa, wasinman kutipuspa, casarakuchun. Pajtataj maqanakupi wañojtin, wajtaj chay warmiwan casarakunman. 8Chantá kurajkunaqa soldadosman nillanqankutaj: Sichus mayqenniykichej manchachikun, manataj kallpan tiyan chayqa, wasinman kutipuchun, maqanakojkunata ama iskayrayachinampaj, nispa. 9Kurajkuna parlayta tukojtinkutaj, soldadosta kamachejkunaqa paykunaj ñawpaqenkuta wañuchinaku maqanakuman renqanku. 10Uj llajtaman maqanakunaykichejpaj chayaspa, ñawpajta ninkichej chay llajtayojkuna qankunawan uj tratota ruwanankuta. 11Sichus chay llajtayojkuna nisqaykichejta uyarispa, saqenkuman llajtankuman yaykunaykichejta chayqa, wata runasniykichej kanqanku, sinch'i trabajosta ruwaspa. 12Sichus nisqaykichejta mana uyarispa, maqanakuytapuni munanku chayqa, maqanakuyta qallarinkichej. 13Chantá Señorniykichej Tata Dios chay llajtasta makisniykichejman jaywasojtiykichej, qankunaqa tukuy qharista ni uj puchuyojta espadawan wañurachinkichej. 14Chaymantaqa kay imasta jap'ikapunkichej: Warmisninkuta, wawasninkuta, uywasninkuta, imaschá chay llajtaspi tiyan, chay imasta ima. Mikhunkichejtaj enemigosniykichejpa kapuyninkumanta, Señorniykichej Tata Dios qopusunkichej, chaymanta. 15Ajinallatataj ruwankichej qankunamanta karupi kaj llajtaswampis, mayqenkunachus mana chay qayllaykichejpi kaj llajtasmantachu kanku, chaykunawan. 16Chaywampis Señorniykichej Tata Dios qosonqachej, chay kikin jallp'aspeqa tukuy kawsayniyojkunata wañuchinkichejpuni. 17Kaykunata ni uj puchuyojta tukuchinkichej: Hititasta, amorreosta, cananeosta, ferezeosta, heveosta, jebuseosta ima, Señorniykichej Tata Dios kamachisusqaykichejman jina. 18Ajinata paykunata chinkachejtiykichej, paykuna mana yachachisonqachejchu chay millay ruwaykunata, diosninkoj sutimpi ruwaj kanku, chaykunata, ama Señorniykichej Tata Diospa contranta juchallikunaykichejpaj. 19Maypachachus unayta uj llajtata muyuykunkichej chay llajtata jap'ikapunaykichejpaj chaypacha, ama sach'asninta k'utunkichejchu. Chaykunaqa kanqa poqoykunanta mikhunaykichejpaj. Chantapis chay sach'asqa runaschu kanku contrankuta maqanakunaykichejpaj? 20Manachayqa mana poqoyniyoj sach'asllata urmachiyta atinkichej. Chaykunamanqa jark'achinasta ruwakunkichej, ima llajtawanchus maqanakushankichej, chayman qayllanaykichejpaj, chay llajtata jap'ikapunaykichejkama.

will be added

X\