DEUTERONOMIO 19

1Maypachachus Señorniykichej Tata Dios chay nacionesta chinkachenqa, jallp'asninkutataj qopusonqachej, tiyakunkichejtaj llajtasninkupi, wasisninkupipis chaypacha, 2Señorniykichej Tata Dios qopusonqachej, chay jallp'api kinsa llajtasta ajllankichej. 3Chay llajtasman rej ñankunatapis sumajta pichankichej. Chantapis, Señorniykichej Tata Dios qopusonqachej, chay jallp'astaqa kinsaman t'aqankichej. Ajinamantaqa mayqen runa wañuchillapis chay llajtaman ayqeyta atenqa pakakunampaj. 4Sichus mana yuyasqallamanta uj runata wañuchin chayqa, mana paywan phiñanasqa kaspa, chay runaqa chay llajtaman ayqeyta atenqa. 5Ajinaqa iskay runas monteman llant'aj rejtinku, sichus ujninku ch'ejtashajtin, chaypacha hachaqa cabonmanta ch'utaspa, hachayojpa wawqenta wañuchinman chayqa, chay runaqa atin chay kinsa llajtasmanta ujninman ayqekuyta, jinamanta ama wañuchisqa kanampaj. 6Sichus uj pakakuna llajtalla kanman chayqa, ancha karu kasqanrayku chay wañoj runaj ayllun manchay phiñasqa kaspa, chay runa wañuchita taripanman, ñampitaj wañurparichinman mana juchayoj kajtimpis, imaraykuchus manapuni ñawpajmanta paykunapura chejninakorqankuchu. 7Chayrayku kamachiykichej kinsatapuni llajtasta ajllanaykichejta. 8Señorniykichej Tata Dios jallp'aykichejta jatunyachejtin, tukuynin jallp'asta qopusojtiykichej ñawpa tatasniykichejman nisqanman jina, 9chaypacha kinsa pakakuna llajtastawan yapankichej chay kinsa llajtasman ñawpajta karqaña, chaykunaman. Chayqa kanqa sichus junt'ankichejpuni, kay qoshaykichej kamachisqasta Señorniykichej Tata Diosta munakuspa, ñannintapuni purispataj, chayqa. 10Ajinamanta mana jich'akonqachu mana juchayojpa yawarnin, Señorniykichej Tata Dios jap'ikapunaykichejpaj qosonqachej, chay jallp'aspi. Jinamanta runa wañuchisqamantaqa mana juchachasqachu kankichej. 11Ichapis mayqellampis runa masinta chejninman, wateqaytawantaj maqanman wañuchinankama. Jinapi pay ayqekunman ujnin kaj pakakuna llajtaman. 12Chaypacha ayqekojpa llajtanmanta kaj kuraj runasqa kamachenqanku chay ayqekojta presochaspa, wañojpa qayllan kaj ayllunman jaywanankuta wañuchisqa kanampaj. Chay runataqa ama khuyankichejchu. 13Ajinamanta pichankichej israelitas ukhupi mana juchayoj runaj yawarnin jich'akusqanmanta. Chaytachus ruwankichej chayqa, tukuy imapi allin risonqachej. 14Maypichus Señorniykichej Tata Dios qosonqachej chay jallp'aspi, qayllaykichejpi kaj runaspa jallp'ankoj lindesninkuta ama ñit'inkichejchu; imaynachus ñawpajmantapacha karqa, jinallapuni kanan tiyan. 15Mayqen runaj contrampi, ima laya jucharaykullapis mana uj runallachu testigo jina sayayta atin. Chay juchallikojta juchachanapajqa kanankupuni tiyan kinsa, chayrí iskayllapis rikojkuna. 16Sichus uj sajra sonqo runa llullakuspa sayarinman sut'inchanampaj imastapis runa masimpa contrampi chayqa, 17chay iskaynin runas quejanakojkuna Tata Diospa ñawpaqenman, sacerdotespa ñawpaqenman, chantaqa juezkunajpa ñawpaqenman ima renqanku, pikunachus runasta uyarinankupaj chay p'unchaypi kashajkunaman. 18Chay juezkunaqa allintapuni qhawanqanku yachanankukama imaynapunichus kasqanta. Sichus chay runaqa runa masimpa contranta llullakushan chayqa, 19kikillantataj payta ruwaychej, imaynatachus payqa runa masinta ruwayta munasharqa, ajinata. Ajinamanta chay jina sajra kajta qankuna ukhumanta chinkachinkichej. 20Wajkunapis chayta yachaytawan manchachikonqanku, manañataj chay jina sajrata ruwanqankuchu. 21Chay jina runastaqa amapuni khuyankichejchu. Manachayqa kay jinata kutichiychej: Runamanta runata, ñawimanta ñawita, kirumanta kiruta, makimanta makita, chakimantataj chakita.

will be added

X\