DEUTERONOMIO 18

1Leví aylloqa sacerdote ayllu nisqa mana jallp'asniyojchu, nitaj herenciayojchu kanqa israelita masisninku ukhupi. Paykunaqa kawsanqanku Tata Diosman apasqa jaywasqasmanta, Tata Diospa herencianmanta. 2Paykunaqa mana herenciayojchu kanqanku israelita masisninku ukhupi. Paykunaj herenciankoqa Tata Diosllamin, imaynatachus nisqanman jina. 3Israelitasqa Tata Diosman jaywanapaj torosta, ovejasta ima apamusqankumanta, kaykuna sacerdotespaj kanqa: Wasa aychas, uya aycha, wijsa aycha ima. 4Jinallataj sacerdotespaj kanqa kaykuna ñawpaj poqoykunata israelitas apamusqankumanta: Trigo, vino, aceite, ñawpaj ruthuy millmas ima. 5Señorniykichej Tata Diosqa ajllakun paykunata, mirayninkutawan Israel ayllus chawpimanta Tata Diospa ñawpaqempi sayaspa, sirvinankupaj wiñaypaj. 6Levitasqa israelitas ukhumanta mayqen llajtallamantapis jamuspa tukuy sonqo Tata Diospa ajllakusqan cheqaman, 7paykunaqa Señorninku Tata Diospa sutimpi atenqanku sacerdote ruwanasta ruwayta, imaynatachus tukuy levita masisninku Tata Diospa ñawpaqempi ruwanku, ajinata. 8Mikhunankupajqa, imatachus tukuy levitas mikhunku, chayllatataj jap'enqanku. Chantá jap'illanqankutaj tatasninkoj herenciantapis. 9Maypachachus yaykunkichej, Señorniykichej Tata Dios qosonqachej, chay jallp'aman chaypacha, ama chaypi kaj runas jina millay ususninkuta ruwayta yachaqakunkichejchu. 10Amapuni ni mayqenniykichej wawasniykichejta jaywanata jina qonkichejchu ninapi q'olachispa. Amapuni ni mayqenniykichej adivino kaychejchu, nitaj qhepaman imachus kananmantapis yachaj tukunkichejchu. Ama layqapis kankichejchu, 11ama mayqentapis layqachinkichejchu, ama adivinosta tapukunkichejchu, amallataj aysirista tapukunkichejchu. 12Tata Diosqa millachikun chaykunata ruwajkunamantaqa. Señorniykichej Tata Diosqa chay nacionesta ñawpaqeykichejmanta qharqonqa chay millaykunata ruwayta yachasqankurayku. 13Qankunaqa Diospa ñawpaqempi cheqan sonqoyojpuni kanaykichej tiyan. 14Chay nacionesqa, mayqenkunajtachus jallp'asninkuta jap'ikapunkichej, chaykuna layqasta, adivinosta ima uyarinku. Señorniykichej Tata Diosqa manapuni munanchu qankunaqa chayta ruwanaykichejta. 15Señorniykichej Tata Diosqa qankuna ukhumanta uj profetata noqata jina sayarichipusonqachej, qankunataj Payta kasunkichej. 16Qankunaqa chaytapuni Señorniykichej Tata Diosmanta Horeb Orqopi mañakorqankichej. Maypachachus chaypi ujllapi tantakorqankichej chaypacha, nerqankichej: Mana ujtawan uyariyta munaykuchu Señorniyku Tata Diospa parlamusqanta, nitaj kay jina jatun ninata rikuyta munaykuchu, ama wañunaykupaj, nispa. 17Tata Diostaj niwarqa: Nisqankoqa walejpacha. 18Noqaqa paykunapaj uj profetata ayllu masinku ukhumanta rikhurichisaj qan kikiykita jina, paykunaman Noqaj nisqayta ninampaj, imatachus paykunaman kamachisqayta ima. 19Sichus pi runapis mana uyariyta munan imatachus chay profeta sutiypi parlanqa chayqa, chay runamanta Noqa cuentata mañasaj. 20Sichus mayqen profeta runa wapuykachaspa Noqaj sutiypi parlayta munanqa, Noqa mana kamacherqanichu, chayta, chayrí waj dioskunaj sutinkupi parlanqa chayqa, chay profetaqa wañuchisqa kanqa. 21Ichapis sonqoykichejpi niwajchej: Imaynapitaj yachasqayku chay parlasqayqa mana Tata Diospa Simi Nisqanchu kasqantari? nispa. 22Sichus chay profeta Tata Diospa sutimpi parlasonqachej, chay nisqan mana junt'akun chayqa, ajinamanta yachankichej chaytaqa mana Tata Dioschu nisqanta. Chay profeta jinata parlan wapuykachaspalla; paymantataj ama manchachikuychejchu.

will be added

X\