DEUTERONOMIO 17

1Señorniykichej Tata Diosman jaywanapaj ama apankichejchu iman imanasqa torosta, chayrí ovejasta. Chayqa millay Paypajqa kanman. 2Ichapis mayqen llajtallapipis Señorniykichej Tata Dios qosonqachej, chaypi kanman uj qhari, chayrí warmi, Señorniykichej Tata Diospa ñawpaqempi mana allin kajta ruwaj, tratonta mana junt'aspa. 3Ichapis waj dioskunata yupaychaj rinman, chaykunaman qonqorikunman, chayrí intiman, killaman, ch'askasmampis, Tata Diospa kamachisqanta p'akispa. 4Sichus chaymanta imallatapis uyariwajchej chayqa, allinta tapurispa yacharqoychej jinachus, manachus kasqanta. Ichapis chay jina millaytapuni israelitas ukhupi ruwanqanku. 5Jina kajtenqa, chay juchallikojta, qharipis warmipis kachun, llajtaj punkumpi kashaj juezkunaman pusankichej. Chantá rumiswan ch'anqaykuspa wañurparichinkichej. 6Iskay, chayrí kinsa rikojkuna kajtin, chay runata wañuchinkichej. Sichus uj runalla rikoj tiyan chayqa, ama chay ch'atasqa runata wañuchinkichejchu. 7Chay rikojkunaraj ñawpajta ch'anqaykunanku tiyan, chaymantaraj tukuy runas ch'anqaykullanqankutaj chay runa wañunankama. Ajinata qankuna ukhumanta chay jina sajra kajta chinkachinkichej. 8Sichus uj juiciopi mana atinkichej sut'inchayta, wañuchiymantachus kajtin, chayrí jallp'ata jap'inamantachus, maqanakuymantachus, chayrí llajtaykichejpi ima ch'ajwa kasqanmantachus chayqa, Señorniykichej Tata Dios ajllakonqa, chay cheqaman wicharinkichej. 9Chaypi kaj sacerdote levitaman, pichus juez kashan chaymanwan willamunkichej, paykunataj pichus juchayoj kasqanta sut'inchanqanku. 10Qankunataj ruwankichej imatachus juezkuna nisonqachej, Tata Dios ajllakonqa, chay cheqapi; allinta ruwankichej paykuna nisusqaykichejman jina. 11Qankunaqa kikintapuni ruwankichej chay juezkuna nisusqaykichejman jina, mana ladoyaspa ni pañaman, nitaj lloq'eman. 12Sichus pipis machu machuykachaspa mana ruwanman Tata Diospa kamachin sacerdotej nisqanman jina, chayrí juezpa nisqanman jina chayqa, wañuchisqa kachun. Ajinamanta qankunaqa israelitas ukhumanta chay jina sajra kajta chinkachinkichej. 13Chayta runas yachaspa manchachikuyniyoj kanqanku; manaña jinata runaykachaspa imatapis ruwanqankuchu. 14Señorniykichej Tata Dios ima jallp'atachus qosonqachej, chayman jap'ikapoj yaykunkichej, chaypitaj tiyakuspa, ichapis niwajchej: Reyniyoj kayta munanchej kamachinawanchejpaj, imaynatachus qayllanchejpi kaj naciones reyniyoj kanku, ajinata, nispa. 15Ajina kajtenqa, reyta churakunkichej Señorniykichej Tata Dios qankuna ukhumanta ajllasqanta. Ama forasterota reyniykichejpaj churankichejchu, mana qankunaj llajta masiykichej kajtaqa. 16Chay reyqa ama ashkha caballosta rantichunchu, nitaj Egiptomampis runasta kachachunchu astawan caballosta rantejta. Tata Diosqa nisorqachejña: Amaña jayk'ajpis Egiptoman kutirinkichejchu, nispa. 17Amallataj ashkha warmisniyoj kachunchu, ama sonqompi Tata Diosmanta karunchakunampaj. Amallataj ancha ashkha qolqeyoj, qoriyoj kachunchu. 18Rey kaspañataj, qhelqachenqa paypaj uj libropi, kay leyta thallichispa sacerdotes levitas jallch'asqanku libromanta. 19Chay librotaqa pay jap'ispa, sapa p'unchay leenqa yachanampaj Señornin Tata Diosta manchachikuyta, jinamanta junt'anampaj kay leyta, kamachisqatawan. 20Ajinamanta mana yuyakonqachu llajta masisninmanta aswan sumaj runa kasqanta, nitaj pañaman, nitaj lloq'eman Diospa kamachisqanmantapis ladoyanqachu. Ajinamanta chay rey, chantá churisnimpis unayta Israel ukhupi kamachenqanku.

will be added

X\