1 Abib killata sumajta waqaychankichej, Señorniykichej Tata Diosman Pascua fiestata ruwaspa, imaraykuchus chay killapi Señorniykichej Tata Dios Egiptomanta tuta orqhomusorqachej. 2 Chay Pascua fiestapeqa Señorniykichej Tata Diospaj ñak'ankichej wakasta, ovejasta ima, maypichus Tata Dios ajllakonqa uj cheqata sutin jatunchasqa kanampaj, chaypi. 3 Chay jaywasqa uywataqa mana levadurayoj t'antatawan mikhunkichej. Chay t'antataqa qanchis p'unchay junt'ata mikhunkichej, imaraykuchus chayqa llakiy t'anta. Qankunaqa ajinata usqhay usqhayta Egiptomanta llojsimorqankichej. Chayrayku qankunaqa kawsanaykichejkama yuyarikunkichejpuni ima p'unchaypichus Egiptomanta llojsimusqaykichejta. 4 Chay qanchis p'unchaykunapeqa wasisniykichejpi ama levaduraqa kachunchu tukuy jallp'aykichejpi. Tata Diosman jaywanata jaywankichej, chay aychataj q'ayantimpaj ama puchonqachu. 5 Señorniykichej Tata Dios mayqen llajtatachus qosunkichej, chay llajtapeqa ama Pascua jaywanata jaywankichejchu. 6 Manachayqa jaywankichej, maypichá Señorniykichej Tata Diosqa sutin jatunchasqa kanampaj ajllakonqa, chayllapi. Chaytaqa jaywankichej ch'isiyaykuyta, imaraykuchus qankunaqa ajina ch'isiyaykuyta Egiptomanta llojsimorqankichej. 7 Chay jaywasqa aychasta kankaspa mikhunkichej, maypichus Tata Diosqa ajllakonqa sutin jatunchasqa kanampaj, chaypi. Q'ayantintaj wasiykichejman ripunkichej. 8 Sojta p'unchayta mikhunkichej mana levadurayoj t'antata, qanchis kaj p'unchaypitaj Diospa sutimpi tantakunkichej Señorniykichej Tata Diosta jatunchanaykichejpaj; chay p'unchaypitaj amapuni ima trabajollatapis ruwankichejchu. 9 Qanchis semanaña kajtin, trigo ruthuy qallarikusqanmantapacha, 10 Semanas nisqa fiestata Señorniykichej Tata Diospaj ruwankichej. Señorniykichej Tata Dios qosusqaykichejman jina, chay imasmanta ofrendasta munasqaykichejman jina qonkichej. 11 Qankunaqa kusikunkichej Señorniykichej Tata Diospa ñawpaqempi, maypichus Pay uj cheqata ajllakonqa, chaypi. Chaytataj ruwankichej wawasniykichejwan, kamachisniykichejwan khuska, chantapis llajtaykichejpi tiyakoj levitaswan, forasteroswan, wajcha wawaswan, warmisapaswan ima. 12 Yuyarikuychej qankunapis Egiptopi wata runas kasqaykichejta; chayrayku kay kamachisqasniytaqa junt'aychejpuni. 13 Trigosniykichejta oqhariyta, uvasniykichejta ch'irwaytapis tukuytawan, qanchis p'unchaykunata Ch'ujllas nisqa fiestata ruwakunkichej. 14 Chaypeqa kusikunkichej wawasniykichejwan, kamachisniykichejwan khuska, chantapis llajtaykichejpi tiyakoj levitaswan, forasteroswan, wajcha wawaswan, warmisapaswan ima. 15 Chay jinata qanchis p'unchayta Señorniykichej Tata Diosta yupaychaspa kusikunkichej, maypichus Pay uj cheqata ajllakonqa, chaypi. Ajinamanta kusikuychejpuni Señorniykichej Tata Dios bendecisusqaykichejrayku tukuy cosechasniykichejpi, tukuy ruwanasniykichejpi ima. 16 Señorniykichej Tata Diospa ñawpaqenman tukuy qharisqa watapi kinsa kutita rikhurenqanku, may cheqatachus Tata Diosqa ajllakonqa, chaypi, kay fiestaspi: Mana Levadurayoj T'anta nisqa fiestapi, Semanas nisqa fiestapi, Ch'ujllas nisqa fiestapipis. Mana mayqellampis ch'usaj makeqa mana imayojqa Tata Diosman qayllaykonqachu. 17 Sapa ujniykichej ofrendasniykichej oqharisqa jamunkichej, ima kapuykunatachus Señorniykichej Tata Dios qosunkichej, chayman jina. 18 Sapa ayllupi juezkunata, kurajkunatawan ajllaychej, maykunapichus Señorniykichej Tata Dios llajtasta qosonqachej, chaypi. Ajinamanta paykunaqa runasman justiciata ruwanqanku. 19 Ama justiciataqa cheqan kajmanta q'ewinkichejchu, amataj wakillanman kutikunkichejchu. Amallataj qolqewan lluk'ichikunkichejchu. Chay lluk'iykunaqa aswan yachayniyoj runastapis pantachin, cheqan runaspa nisqasninkutapis waj jinaman tukuchin. 20 Cheqan kajllatapuni ruwanaykichej tiyan, Señorniykichej Tata Dios herenciapaj qosunkichej, chay jallp'api tiyakunaykichejpaj. 21 Señorniykichej Tata Diospaj altarninta ruwaspaqa, chaypa ñawpaqempi ama ima yupaychana k'ullutapis sayachinkichejchu, chayrí sach'atapis plantankichejchu. 22 Yupaychana rumistaqa ama oqharinkichejchu; chaykunata Señorniykichej Tata Diosqa chejnimpuni.
