DEUTERONOMIO 15

1Sapa qanchis watamanta manusqaykichejta perdonankichej. 2Chay perdonanaqa kay jina kanqa: Runa masisninkuman manojkunaqa manusqasninkuta perdonanqanku. Chaymantaqa amaña mañanqankuchu qopunankuta imatachus runa masisninkuman, chayrí llajta masisninkuman manusqankuta. Chay wataqa Tata Diospa sutinrayku manu qonqapuna wata nisqa kanqa. 3Forasteromantaqa mañakapuyta atinkichej imatachus manusqaykichejta qopunanta. Llajta masiykichejtarí perdonankichejpuni imatachus manusqaykichejmanta. 4Jinamanta qankunaj chawpiykichejpi mana wajchas kanqankuchu, Señorniykichej Tata Diostaj sumajta bendecisonqachej, ima jallp'atachus herenciata jina jap'ikapunaykichejpaj qosunkichej, chaypi. 5Ajina kanqa sichus qankuna Señorniykichej Tata Diospa nisqasninta uyarinkichej, junt'ankichejtaj kay kamachisqasninta kunan qoshaykichej, chaykunata chayqa. 6Arí, Señorniykichej Tata Dios bendecisonqachej nisusqaykichejman jina. Ashkha nacionesman manunkichej; qankunarí mana manukunkichejchu. Ashkha nacionesta kamachinkichej, qankunatatajrí ni mayqen naciompis kamachisonqachejchu. 7Sichus mayqen llajta masiykichej wajchayapunman chayqa, mayqen llajtasnillaykichejpipis Señorniykichej Tata Dios qosonqachej chay jallp'api, ama sonqoykichejta rumiyachinkichejchu, nitaj mich'as kankichejchu chay llajta masisniykichej pisichikoj runaswan. 8Paykunamanqa imachus tiyapususqaykichejta qorillankichej; imatachus pisichikunku, chaytapis manurinkichej. 9Ama sajra yuyayniykichejwan atipachikunkichejchu, kay jinata yuyaspa: Qanchis kaj wataqa chayamushanña, manus perdonana wata, nispa. Pajtataj sajra ñawiwan qhawawajchej wajcha llajta masiykichejta. Mana manojtiykichejrí, chay wajchaqa Tata Diosman qankunaj contraykichejta qhaparikonqa, qankunataj juchachasqa kankichej. 10Chay llajta masiykichejta yanapariychejpuni, ama sonqoykichejta nanachikuspa. Kay jinata ruwasqaykichejmanta Señorniykichej Tata Diosqa tukuy ima ruwasqaykichejpi aswan ashkhata qopusonqachej. 11Kay pachapeqa wajchasqa kallanqapuni. Chayrayku noqaqa kamachiykichej kay jinata: Qankunaqa tukuy sonqo llajta masisniykichejmanta pisichikojkunata, wajchastawan yanapaychej, nispa. 12Sichus chay hebreo llajta masiykichejmanta qharipis, chayrí warmipis qankunaman vendekuspa wata runaykichejpaj yaykupunman chayqa, sojta watallata wata runaykichej kanqa; qanchis kaj watapeqa kacharipunkichej. 13Payta kacharipushaspataj, ama ch'usaj makillataqa kacharipunkichejchu. 14Ovejasniykichejmanta qorinkichej, jinallataj trigota, vinota ima; imastachá Señorniykichej Tata Dios qosunkichej, chaykunamanta qankunapis Payman qorillankichejtaj. 15Ama qonqankichejchu Egiptopi wata runasllataj qankunapis kasqaykichejmanta, maynejmantachus Señorniykichej Tata Dios kacharichimusorqachej, chaypi. Chayrayku kunanqa noqa kay kamachisqata qoykichej. 16Sichus chay wata runa mana ripuyta munan qanta, familiaykitawan munakusqanrayku, qanwantaj allin risqanrayku chayqa, 17uj yarwiwan ninrinta wasiykichej punku sayantapi takaspa, jusk'unkichej. Jinamanta chay runaqa wiñaypaj wata runaykichej kanqa. Kikillantataj warmi kamachiykichejwampis ruwankichej. 18Ripuyta munajtinrí, wata runaykichejta kacharipunaykichejmanta ama pesachikuychejchu. Paykunaqa peonman paganaykichejpa khuskannillanmanta trabajapusorqachej sojta watasta; chaynejtataj Señorniykichej Tata Diosqa ashkhata bendecisonqachej tukuy ima ruwasqaykichejpi. 19Tukuy phiwi orqo uñasta, wakasmanta, ovejasmanta ima Señorniykichej Tata Diosman qopunkichej. Ama llank'achinkichejchu chay phiwi torillosta. Amallataj phiwi corderoj millmasninta ruthunkichejchu. 20Chaykunataqa tukuy familiaykichejwan khuska sapa wata Señorniykichej Tata Diospa ñawpaqempi mikhunkichej, maypichus Pay ajllakonqa uj cheqata, chaypi. 21Sichus chay uywaqa wist'u kanqa, chayrí ciego, chayrí imallampis imanasqa kanman chayqa, ama chaytaqa Tata Diosman jaywankichejchu. 22Chaykunataqa, may llajtapichus tiyakunkichej, chayllapi mikhuyta atinkichej, llimphupaj qhawasqa, mana llimphupaj qhawasqa kashaspapis, taruka aychapis kanman jina. 23Chaywampis yawartaqa amapuni mikhunkichejchu, manachayqa jallp'aman yakuta jina sururparichinkichej.

will be added

X\