1 Qankunaqa Señorniykichej Tata Diospa wawasnin kankichej. Piniykichej wañupojtenqa, cuerpoykichejta ama q'allurakunkichejchu, nitaj chujchasniykichejta umaykichejpa ñawpaqenmanta ruthunkichejchu. 2 Qankunaqa Señorniykichej Tata Diospa ajllakusqasnin kankichej. Pay ajllakusorqachej tukuy naciones ukhumanta, uj k'ata ayllun Paypaj t'aqasqa kanaykichejpaj. 3 Ama mikhunkichejchu imachus ch'ichipaj qhawasqa kajta. 4 Kay animalesmanta qankunaqa mikhuyta atinkichej: Wakasta, ovejasta, cabrasta, 5 wajrayoj tarukasta, mana wajrayoj tarukasta, gamo sutiyoj tarukasta, monte cabrasta, imaymana laya tarukasta ima. 6 Ajinaqa tukuy kutipakoj, chaki sillusnin iskayman palqasniyoj animalesta mikhuyta atinkichej. 7 Kay animalesmanta mana mikhuyta atinkichejchu, kutipakojkunapis kachunku, chayrí chaki sillusninku iskayman palqasniyojpis kachunku: Camellosta, castilla qowi jina liebreta, qowista ima. Chaykunajta chaki sillusninku mana iskayman palqasqachu. Chaykunata qankunaqa ch'ichi animalesta jina qhawankichej. 8 Khuchistapis ama mikhunkichejchu. Chaykunaj chaki sillusninkoqa iskayman palqasqa chaypis, mana kutipakunkuchu. Qankunaqa chay tukuy animalesmanta ama mikhunkichejchu aychasninkuta, ni wañojtinkupis aychasninkuta llankhankichejchu. 9 Yakupi kajkunamanta mikhuyta atinkichej aletasniyojkunata, escamasniyojkunatawan. 10 Mana aletasniyojkunata, mana escamasniyojkunata imaqa ama mikhunkichejchu. Chaykunataqa ch'ichipaj qhawankichej. 11 Tukuy llimphupaj qhawasqa phuruyoj phawajkunamanta mikhuyta atinkichej. 12 Kaykunallata ama mikhunkichejchu: Ankasta, tullu p'akej ankasta, yaku ankasta, 13 suwintusta, imaymana laya mamanista, 14 imaymana laya qharqañasta, 15 surista, ch'useqasta, gaviotasta, imaymana laya wallpa suwasta, 16 jukusta, ibiskunata, jatun kunkayoj pilista, 17 jatun chhuruyoj yaku pilista, suweq'arasta, cormorán nisqasta, 18 pariwanasta, imaymana laya jak'ajllusta, chiñista ima. 19 Tukuy phawaj khurusta ch'ichipaj qhawankichej. Chaykunata ama mikhunkichejchu. 20 Tukuy phawajkuna llimphupaj qhawasqa kajkunata mikhuyta atinkichej. 21 Payllamanta wañoj animalesta amapuni mikhunkichejchu, imaraykuchus qankunaqa Señorniykichej Tata Diospa ajllakusqasnin kankichej, Paypaj t'aqasqa. Qankunaj llajtaykichejpi tiyakoj forasteroman chay aychasta qoyta atinkichej; paykunaqa atillanku mikhuyta. Atillankichejtaj vendeyta karumanta forasteroman. Ñuñushaj cabra uñataqa ama mamampa lechempi chayachinkichejchu. 22 Sapa wata chajrasniykichejpi poqojta sapa chunkamanta ujninta Tata Diosman qonkichej, mana qonqaspa. 23 Chayqa kanqa granosmanta, vinomanta, aceitemanta ima. Jinallataj wakasmanta, ovejasmanta phiwi uñasta ima Tata Diosman qonkichej. Chaykunata qankunaqa mikhunkichej Señorniykichej Tata Diospa ñawpaqempi, may cheqapichus sutin kanampaj ajllakonqa, chay cheqapi. Ajinamanta Señorniykichej Tata Dios tuta p'unchay jatumpaj qhawayta yachaqakunkichej. 24 Sichus chay cheqaqa wasiykichejmanta ancha karu, kanman chay chunkamanta ujninta apanaykichejpaj Señorniykichej Tata Diospa bendicionninta jap'iytawankama chayqa, 25 chay chunkamanta ujninta t'aqapusqaykichejta vendespa, waqaychankichej chay qolqeta, maypichus Tata Diospa ajllakusqan, chay cheqaman apanaykichejpaj. 26 Jinapi imaschus chaynejpi tiyan, chayta rantikunkichej munasqaykichejman jina: Wakasta, ovejasta, vinota, chayrí ima poqosqa ujyanatapis. Chaytaqa qankuna Señorniykichej Tata Diospa ñawpaqempi mikhunkichej munasqaykichejman jina, sumajta kusikuspa tukuy aylluykichejwan khuska. 27 Qankunaj llajtaykichejpi tiyakoj levitastaqa amapuni jayk'ajpis mana imayojta saqerpayankichejchu, imaraykuchus paykunaqa mana qankuna jina jallp'ayojchu kanku. 28 Sapa kinsa wata pasayta, poqochisqaykichejmanta sapa chunkamanta ujninta t'aqaspa, llajtasniykichejpi jallch'ankichej. 29 Chay imastataj levitasman qopunkichej llajtasniykichejman jamojtinku, mana jallp'asniyoj kasqankurayku. Chantapis qollankichejtaj llajtasniykichejpi tiyakoj forasteroman, wajchasman, warmi sapasman ima. Paykuna atenqanku mikhuyta sajsakunankukama. Ajinata ruwajtiykichej, Señorniykichej Tata Diosqa bendecisonqachej tukuy ima ruwasqaykichejpi.
