DEUTERONOMIO 13

1Ichapis qankuna ukhupi Diosmanta sut'inchaj uj runa rikhurinman, chayrí mosqoykunamanta willaj, paytaj ninman ima señalchus, ima milagrochus kananta. 2Chay nisqan junt'akojtin, pay nisunkichejman: Kunanqa jaku, waj dioskunata sirvikamunachej mayqenkunatachus mana rejserqankichejchu, chaykunata, nispa. 3Chayta nejtin, amapuni chay sut'inchajta, chayrí willajtapis uyarinkichejchu. Chaykunataqa Señorniykichej Tata Dios kachamusunkichej, yachanampaj cheqamantachus manachus Payta munakushasqaykichejta tukuy sonqoykichejwan, tukuy almaykichejwantaj. 4Qankunaqa Señorniykichej Tata Diospa qhepanta puriychej. Payta manchachikuychej, kamachisqasnintataj junt'aychej. Paypa parlasqanta uyariychej; Payta sirviychej; Paywampuni ujchasqa kaychej. 5Chay sut'inchajqa, chayrí mosqoykunamanta willajqa wañuchisqa kanqa, Señorniykichej Tata Diospa contranta ruwanaykichejta munasqanrayku. Chay Señorniykichej Tata Diosqa Egiptomanta orqhomusorqachej wata runas kashajtiykichej. Chantapis chay runaqa munarqa t'aqakunaykichejta, mayqen ñantachus Señorniykichej Tata Dios kamachisorqachej purinaykichejta, chaymanta. Chay runata wañuchispaqa, qankuna ukhumanta chay sajra kajta chinkachinkichej. 6Ichapis kikin wawqeyki, chayrí churiyki, chayrí ususiyki, chayrí munasqa warmiyki, chayrí aswan sumaj kawsaqeyki pakayllamanta nisunkiman: Jaku waj dioskunata yupaychamuna, nispa. Chay dioskunataqa nitaj qankuna, nitaj tatasniykichejpis rejserqankichejchu. 7Chay dioskuna kanku muyuyniykichejpi kaj nacionespata, qayllapi kajkunajta, karupi kajkunajtapis. 8Ama chay nisqanta kasunkichu nitaj uyarinkipischu. Ama payta perdonankichu, nitaj khuyapayankichu, nillataj payta pakaykunkichu. 9Manachayqa chay jinata parlajtaqa wañuchiy. Qampuni ñawpajta rumiswan ch'anqaykunki, qhepaykitataj tukuy runas ch'anqaykullanqankutaj. 10Payta rumiswan ch'anqaykunki wañunankama, Señorniyki Tata Diosmanta karunchasuyta munasqanrayku, pichus Egiptomanta orqhomusorqa wata runallapuni kashajtiyki, Paymanta. 11Chayta uyarispa, tukuy israelitas manchachikuywan manaña ujtawan qankuna ukhupi chay jina sajra kajta ruwanqankuchu. 12Ichapis mayqen llajtallapipis Señorniykichej Tata Dios tiyakunaykichejpaj qosonqachej, chay cheqaspi uyariwajchej nejta: 13Diosta mana kasoj runas rikhurimuspa, chay llajtapi tiyakojkunata pantachisqanku kay jinata: Jaku, waj dioskunata yupaychamuna, qankuna mana rejserqankichejchu, chaykunata, nispa. 14Chaytaqa qankuna allinta yacharimunkichej sumajta tapukuspa. Sichus cheqatapuni chay sajra kajta qankuna ukhupi ruwashanku chayqa, chay llajtapi tiyakoj runasta, 15tukuy uywasninkutawan khuska espadawan wañurachinkichej. Chantá tukuy kapuyninkutapis chinkachinkichej. 16Chay kapuyninkutaqa llajta plazaman tantaspa, llajtantinta ninawan kanaykunkichej. Chantapis tukuy chay imasqa q'olachisqa jaywana Tata Diospaj kanqa. Jinamanta chay llajtaqa wiñaypaj raqaylla kanqa; ni jayk'ajpis watejmanta oqharisqa kanqachu. 17Qankunaqa chay tukuy imas chinkachisqapuni kananmanta ama imatapis jap'ikapunkichejchu. Sichus chay llajtata, kapuynintawan chinkachinkichejpuni chayqa, Tata Diospa sinch'i phiñakuynenqa tiyaykonqa, qankunatataj khuyasonqachej, ashkhatataj mirachisonqachej, tatasniykichejman juraspa nisqanman jina. 18Ajina kanqa Señorniykichej Tata Diosta kasusqaykichejrayku tukuy kamachisqasninta junt'aspa, cheqan kajtataj Señorniykichej Tata Diospa ñawpaqempi ruwaspa.

will be added

X\