DEUTERONOMIO 10

1Chaymantaqa Tata Dios niwarqa: Qan kikiyki ch'eqospa, iskay p'alta rumista ruway, ñawpajta karqa, chaykuna jina. Chantá orqoman wicharimuy Noqaman. Chaymantataj ruwallaytaj maderamanta uj cajonta. 2P'akisqayki rumispi chay qhelqasqataqa watejmanta kay rumispi qhelqallasajtaj. Chaytataj chay cajompi waqaychanki, nispa. 3Jinata niwajtin, acacia maderamanta uj cajonta ruwarqani; p'alta rumistapis ch'eqospa ruwallarqanitaj. Chaykunata oqharikuspataj, ujtawan orqoman wicharerqani. 4Chantá Tata Diosqa chay rumisman qhelqarqa chay chunka kamachisqasta, orqopi kashaspa nina chawpimanta parlamusorqachej, chaykunata, tukuyninchej tantasqa kashajtinchej. Chaymantataj chay rumista jaywawarqa. 5Noqataj orqomanta urayk'amuspa, chay rumista arca nisqa, chay cajonman churaykorqani, Tata Dios kamachiwasqanman jina. Kunankamapis chaypi kakushan. 6Chantá israelitas purirerqanku Beerot-bene-jaacamanta Moseraman. Chaypi Aaronqa wañuporqa, kikimpitaj p'ampakorqa. Churin Eleazartaj cuentanmanta sacerdote kayninman yaykorqa. 7Jaqaymanta rerqanku Gudgodaman, chaymantataj Jotbataman, maypichus ashkha yaku karqa, chayman. 8Chaypacha Tata Diosqa Leví aylluta ajllakorqa, Dioswan trato ruwasqa arcata apaykachanankupaj, jinallataj Tata Diospa ñawpaqempi sirvinankupaj, sutimpi israelitasta bendecispa. Chaytaqa kunankama ruwashallankupuni. 9Chayrayku levitas herenciataqa mana wawqesninku jinachu jap'ikunku, imaraykuchus herenciankoqa Tata Dioslla, nisqanman jina. 10Noqaqa ñawpaj kutipi jina, tawa chunka p'unchaykunata, tawa chunka tutastawan orqopi kamorqani. Chay kutipitaj Tata Diosqa uyariwaspa, manaña qankunata chinkachiyta munarqachu. 11Niwarqataj: Rispa, israelitasta pusay, ima jallp'atachus tatasniykichejman qonayta nerqani, chayman, chay jallp'ata jap'ikapunaykichejpaj, nispa. 12Kunanqa israelitas, imatataj mañakusunkichej Señorniykichej Tata Diosri? Payqa munan Payta manchachikunaykichejta, Paypa ñannintataj purinaykichejta. Munallantaj Payta munakunaykichejta sirvinaykichejtataj tukuy sonqoykichejwan, tukuy almaykichejwan ima. 13Chantá munallantaj kamachisqasninta, leyesninta ima junt'anaykichejta, tukuy imapi allin rinasuykichejpaj. 14Cielopis, aswan patapi janaj pachapis, kay pachapis, kaypi imaschus kajpis Señorniykichej Tata Diospata kanku. 15Chaywampis Tata Diosqa qankunaj tatasniykichejta munakorqa, tukuy ayllus ukhumantataj paykunaj mirayninkuta ajllakorqa. Chaykunataj qankuna kankichej kunankama. 16Chayrayku Dioswan trato ruwasqaykichej señalta sonqoykichejman churaychej, amataj k'ullusllapuni kaychejchu. 17Señorniykichej Tata Diosqa dioskunaj Diosnin, señorkunaj Señornin. Payqa jatun Dios, may atiyniyoj, manchachikunataj. Tukuyta uj rejllata qhawan nitaj piwampis lluk'ichikunchu. 18Payqa cheqan ruwaynimpi wajcha wawasman kutikun, warmi sapasmampis. Chantá munakuywan mikhunata qon, p'achallichintaj forasterota. 19Qankunapis forasterota munakuychej ari, yuyarikuspa qankunapis Egiptopi forasterollataj kasqaykichejta. 20Señorniykichej Tata Diosta manchachikuychej, Pay sapallanta sirvispa. Payllaman sayasqa kaychej. Juramentotapis ruwanaykichej kajtenqa, paypa sutinrayku juraychej. 21Paymin yupaychanaykichejqa; Paylla Diosniykichejqa, pichus qankuna rikushajtiykichej, chay jatuchaj t'ukuna imasta ruwarqa qankunarayku, chay. 22Maypachachus ñawpa tatasniykichej Egiptoman chayarqanku chaypachaqa, qanchis chunkalla karqanku. Kunanrí qankunata Señorniykichej Tata Dios ashkhata mirachisunkichej cielopi ch'askas chhikata jina.

will be added

X\