1 Chaypacha nacionniykita qhawaj kuraj kaj ángel Miguelqa rikhurimonqa. Chaypachaqa llakiy kanqa. Chay jina llakeyqa manapuni jayk'ajpis karqachu runas kasqankumantapacha. Chay tiempo chayamojtintaj, aylluykimantaqa libropi sutisninku qhelqasqa kajkunalla salvasqa kanqanku. 2 Jallp'aj sonqompiña puñojkunamanta ashkhas rijch'arimonqanku, ujkunaqa wiñayta kawsanankupaj, wakinkunataj wiñaj p'enqaypi, wiñay phutiypitaj kanankupaj. 3 Yachayniyoj runasqa cielo jina lliphipirenqanku, ashkha runasman cheqa kajta yachachejkunataj wiñaypaj lliphirenqanku ch'askas jina. 4 Qantajrí Daniel, kay imastaqa sonqoykipi pakay, sellaykuytaj librota tukukuy p'unchay chayamunankama. Ashkha runas kayman jaqayman puriykachanqanku, aswan yachayniyoj kayta munaspa, nispa niwarqa chay parlajqa. 5 Noqa Daniel, rikorqani iskay waj runasta, mayoj sapa chimpampi ujtakama sayashajta. 6 Ujnintaj taporqa linomanta p'achayoj runata, pichus mayoj chawpimpi yaku patapi sayashajta: Mayk'ajtaj tukukonqa kay t'ukuna imasri? nispa. 7 Jinapi linomanta p'achayoj runaqa makisninta janaj pachaman oqharispa, kawsaj Diospa sutimpi juraspa nerqa: Kinsa wata khuskanniyojmanta, maypachachus Diospa ayllumpata atiynin manaña atipasqachu kanqa chaypacha, kay tukuynin imasqa tukukonqa, nispa. 8 Noqataj uyarerqani imatachus nishajta, manataj imatapis entiendeyta aterqanichu. Chantá tapurerqani: Wiraqochíy, kay tukuy imas qhepaman imataj kanqari? nispa. 9 Paytaj kutichiwarqa: Daniel, ñanniykita rillaypuni, kay imasqa pakasqallapuni kanqanku, tukukuy p'unchay chayamunankama. 10 Ashkhastaj kanqanku llimphuchasqas, rit'iyachisqas, allinchasqastaj. Sajra runastaj sajra imasta ruwallanqankupuni, mana unanchakuspa imachus kasqanta. Yachayniyoj runastajrí tukuy imata allinta unanchakonqanku. 11 Waranqa iskay pachaj jisq'on chunkayoj p'unchaykuna pasanqanku, Diosman sapa p'unchay jaywana kajta saqechisqankumantapacha Diospa Templompi millay lanti churasqa kasqanmantawan. 12 Kusikuyniyojmin pichus chay waranqa kinsa pachaj kinsa chunka phishqayoj p'unchaykuna junt'akunankama Diospi atienekuspa suyajqa. 13 Qantaj, Daniel, purillaypuni tukukuykama, chantá samarikunki. Qhepa p'unchaykunapitaj jatarikunki t'inkaykita jap'ikapunaykipaj.
