COLOSENSES 4

1Patrones, wata runasniykichejwan cheqan runas kaychej, cheqantataj ruwaychej, yachaspa qankunapis janaj pachapi Dueñoyoj kasqaykichejta. 2Mana sayk'uspa Diosmanta mañakuychej, yuyayniykichejta mana waj imasman churaspa. Jinallataj graciasta qoychej mañakuyniykichejpi. 3Noqaykupajpis mañapullawaykutaj Señor wakichinampaj Paypa Simi Nisqanta willarayta atinaykupaj, Cristoj pakasqa yachayninta rejsichispa. Chayta willarasqayrayku noqapis presochasqa kashani. 4Mañapuwaychej noqa maychus kajta parlaspa, Payta sut'ita rejsichinaypaj. 5Allin yachaywan kawsaychej mana creejkunaj ñawpaqenkupi, ama tiempota usuchispa. 6K'acha simiwan parlaychej, kachiwan kachinchasqata jina. Jinallataj yachaychej imaynatachus sapa ujman kutichinaykichej kasqanta. 7Munasqa hermanonchej Tiquicoqa tukuy imata willasonqachej noqamanta. Payqa cheqa yanapajmin, Señorpitaj kamachi masiy. 8Payta qankunaman kachamuni imaynachus kasqaykuta willasunaykichejpaj, sonqoykichejtataj kallpachanampaj. 9Munasqa sumaj hermanonchej Onesimotapis paytawan kachamushani; payqa qankunamanta ujniykichej. Paykunaqa willasonqachej imachus kaypi kasqanta. 10Aristarcopis napaykamusunkichej; payqa noqawan presochasqa kashan. Jinallataj Bernabejpa primon Marcospis napaykamullasunkichejtaj. Willarqaykichejña: Sichus qankunaman chayamonqa chayqa, tukuy sonqo payta wajyarikuychej, nispa. 11Jesús sutiwan sutichasqa Justopis napaykamullasunkichejtaj. Judiosmantaqa paykunalla Diospa Reinompaj trabajopi yanapawanku, sonqochawankutaj. 12Qankunamanta ujnin kaj, Cristoj kamachin Epafras napaykamusunkichej. Payqa mañapusunkichejpuni Diosmanta, sinch'ita sayanaykichejpaj sumaj wiñasqas, Diospa munayninta junt'aspa. 13Noqa testigo kani: Epafrasqa qankunallapipuni yuyan, jinallataj Laodiceamanta kajkunapi, Hierapolismanta kajkunapiwan. 14Munasqa doctor Lucaswan, Demaspiwan napaykamusunkichej. 15Laodiceapi kaj hermanosta napaykapuwayku, jinallataj Ninfasta, wasimpi kaj iglesiatawan. 16Qankuna kay cartata leeytawan, Laodiceaman apachiychej; Laodiceaman qhelqasqay cartata qankunaman apachimojtinkutaj, qankunapis leellaychejtaj. 17Arquipoman niripuwaychej: Imatachus Señormanta ruwana jap'isqaykita junt'ay tukuychanaykikama, nispa. 18Noqa Pabloqa makiywan qhelqamuykichej kay napaykuykunata. Carcelpi wisq'asqa kasqaymanta yuyarikuychej. Diospa qhasilla k'acha yanapaynenqa qankunawan kachun.

will be added

X\