AMÓS 9

1Tata Diosta altar qayllapi sayashajta rikorqani, niwarqataj: Wasi sayantasta wajtay, punkus thalakunankama; runasman urmaykamuspa, runaspa umankupi phirikuchunku. Puchojkunataqa espadawan wañurachisaj; jinamanta mana pipis kanqachu pakakoj, nitaj ayqejpis. 2Jallp'aj sonqompipis pakakuchunku, chaymanta paykunata orqhomusaj. Cielokamapis wicharichunku, chaymanta urayk'uchimusaj. 3Carmelo Orqo puntamampis pakakamuchunku, chaymampis risaj mask'aj; ukhu mama qochaman pakakamuchunku chaypis, chay ukhupi purej katarita kachaykusaj paykunata khaninampaj. 4Waj nacionesman enemigosninku paykunataqa presosta apanqanku chaypis, chayman espadayta kachasaj paykunata wañurachimunampaj. Paykunataqa qhawallasajpuni, manataj allimpajchu, manachayrí sajrapaj. 5Tukuy Atiyniyoj Señor Tata Diosqa jallp'ata llankhan, jallp'ataj unuyan, chaypi tiyakojkunataj waqanku. Jallp'aqa oqharikonqa, tiyaykonqataj, imaynatachus Egiptopi Nilo Mayu ashkhayantaj, pisiyantaj, jinata. 6Tata Diosqa janaj pachapi wasinta churan, cielotataj kirpanawan jina jallp'a pataman k'umpuykun. Paymin mama qochamanta yakusta wajyaspa, jallp'a pataman jich'amun. Payqa Tata Dios, chaymin sutin. 7Tata Diosqa kay jinata nin: Noqapajqa israelitaspis, etiopespis ujlla kankichej. Imaynatachus Egiptomanta pusamorqaykichej, ajinallatataj filisteostapis Cretamanta pusamorqani, arameostapis Kirmanta pusamorqani, nispa. 8Señor Tata Diosqa qhawamushan kay juchasapa reinota. Chantá nin: Kay sajra reinota kay jallp'a patamanta chinkachisaj; Jacobpa ayllunmanta kajkunallata mana tukuynintachu chinkachisaj, nispa nin, Tata Diosqa. 9Chantá kamachisaj Israelpa ayllunmanta kajkuna tukuynejman suysusqa kanankuta, imaynatachus runasqa trigota suysunapi suysunku, mana uj trigo granollatapis pampaman urmachispa, ajinata. 10Aylluy ukhupi tukuy juchasapas kajkuna espadawan wañuchisqa kanqanku, pikunachus ninku: Mana ima sajrapis qhatiriwasunchu, nitaj taripawasunchu, nispa, chaykuna. 11Uj p'unchay jamushan, chay p'unchaypitaj Davidpa ayllunta urmasqa kasqanmanta oqharisaj, watejmantataj sayarichisaj, imaynachus ñawpajta karqa kikinta. 12Edommanta puchojkuna, tukuy llajtasmantawan puchojkuna Noqajta karqanku, paykunaqa watejmanta Israelpata kanqa. Tata Dios ajinataqa nin, chaytaj junt'akonqapuni. 13Jamushan p'unchaykuna, chay p'unchaykunapitaj trigota oqharishallajtinkuraj, llank'ana tiempo chayamonqa. Manaraj uvasta ch'irwayta tukushajtinku, ñapis trigo tarpuna tiempo chayamonqaña. Vinoqa tukuy orqosta, kinraykunata ima yaku jina purirenqa. 14Chantá karu nacionman preso apasqa kasqanmanta Israel aylluyta pusakampusaj. Watejmanta sayarichenqanku thuñisqa llajtasninkuta, chaypitaj tiyakonqanku; watejmanta uva sach'asta plantanqanku, vinotataj ujyanqanku. Huertasta ruwanqanku, chaykunapi poqojtataj mikhonqanku. 15Chay kikin jallp'ankupi paykunata tiyachisaj, manañataj ni jayk'aj qosqay jallp'ankumanta presos apasqachu kanqanku, nispa nin Señorniyki Tata Diosqa.

will be added

X\