AMÓS 4

1Uyarichej kay nisqayta, Samaria orqospi tiyakoj warmis: Qankunaqa Basanmanta wira wakas jina kankichej. Qankuna ñak'arichinkichej wajchasta, pisichikojkunata waqachinkichej. Qosasniykichejtataj kamachinkichej: Apamuychej vinota ujyanaykupaj, nispa. 2Señor Tata Diosqa juran santo kayninrayku: Qhawaychej, jamonqa uj p'unchay, chay p'unchaypitaj presos apasqa kankichej, ganchoswan jap'ichisqas, wawasniykichejpis anzueloswan t'islusqas kanqanku. 3Perqa q'asasninta sinrulla ujmanta uj wasaykunkichej, wijch'usqataj kankichej Hermón orqoman, nispa nin Tata Diosqa. 4Riychej Betelman, Gilgalman ima, chaypitaj juchallikuychej; astawan astawan contraypi oqharikuychej. Tutamanta apamuychej uywa wañuchisqa jaywanasta, sapa chunkamanta ujta rantisqaykichejtataj apaychej sapa kinsa p'unchaymanta. 5Mana levadurayoj t'antasta q'olachiychej agradecekuna ofrendata jina; ni pej nisqallan jaywanasta apamunankuta niychej. Chayta ruwaspa, qankunaqa kusikunkichej, icharí? nispa nin Tata Diosqa. 6Noqa yarqhayta apachimorqaykichej tukuy llajtasniykichejman; Noqa mikhunamanta pisicherqaykichej, tukuy llajtasniykichejpi. Chaywampis qankunaqa mana Noqaman kutirikamuwankichejchu, nispa nin Tata Diosqa. 7Paratapis manallataj parachimporqaykichejchu, kinsa killa junt'ata manaraj cosecha kashajtin. Uj llajtaman parachimorqani, uj llajtamantaj mana; wakin chajraspaj paracherqani, wakintaj ch'akiporqanku paramanta jina. 8Runasqa llajtamanta llajta rerqanku yakuta mask'aspa, manataj tarerqankuchu ch'akiyninkuta thasnunankupaj jina. Chaywampis qankunaqa mana Noqaman kutirikamuwarqankichejchu, nispa nin Tata Diosqa. 9Ch'aki wayrawan castigarqaykichej, chajrasniykichejtapis sikaswan tukuykucherqani. Huertasniykichejta ch'akicherqani, jinallataj uva sach'asniykichejtapis. Langostaswan mikhuracherqani higo sach'asniykichejta, olivo sach'asniykichejta ima. Qankunatajrí mana Noqaman kutirikamuwarqankichejchu, nispa nin Tata Diosqa. 10Wañuchej onqoyta apachimorqaykichej, imaynatachus Egiptoman apachimorqani, jinata. Saqerqani wayna runasniykichej wañuchinaku maqanakupi wañuchisqa kanankuta, saqellarqanitaj enemigosniykichej caballosniykichejta apakapunankuta. Muskhicherqaykichej wañusqaspa asnasqankuta jarasniykichejpi. Chaywampis qankunaqa manapuni kutirikamuwarqankichejchu, nispa nin Tata Diosqa. 11Sonqo nanayta phiriykorqaykichej, imaynatachus Sodomata, Gomorratawan ruwarqani, ajinata. Ninamanta orqhosqa brasas jina karqankichej. Qankunatajrí mana kutirikamuwarqankichejchu, nispa nin Tata Diosqa. 12Chayrayku Israel, qantapis kikillantataj ruwasqayki; ajinata ruwanasuy kajtintaj, wakichikuy Diosniykiwan tinkukoj jamunaykipaj. 13Tata Diosmin ruwarqa orqostaqa, jinallataj wayratapis; runamantaj imatachus yuyasqanta rejsicherqa. Payqa k'anchay kajta laqhaman tukuchin, kay pachaj aswan patasnejtataj purin; Tukuy Atiyniyoj Señor Tata Dios, chaymin sutenqa.

will be added

X\