1 Chaymanta kuraj kaj sacerdoteqa Estebanta taporqa: Ajinachu kayqa? nispa. 2 Estebantaj kuticherqa: Wawqesníy, tatas ima, uyariwaychej. Tatanchej Abraham Mesopotamiapi kashajtin, manaraj Harán jallp'aman tiyakoj ripushajtin, Jatun Atiyniyoj Diosqa payman nerqa: 3 Ripuy kay jallp'aykimanta, aylluyki ukhumantawan, Noqa rikuchisqayki, chay jallp'aman, nispa. 4 Ajinamanta Abrahamqa Caldeospa jallp'anta saqespa, Harán jallp'aman tiyakoj riporqa. Tatan wañupusqanmanta qhepamantaj, Diosqa payta pusamorqa kay jallp'aman, maypichus qankuna kunan tiyakushankichej, chayman. 5 Diosqa kay jallp'api mana payman herenciata qorqachu ni chaki sarunan chhikallantapis. Chaywampis Diosqa Abrahammampuni kay jallp'ata qonanta nerqa, paypaj kanampaj, wañupojtimpis miraynimpaj qhepakunampaj. Chayta Dios nishajtenqa, manaraj Abrahampataqa wawampis karqarajchu. 6 Dios payman nillarqataj: Qampa mirayniykeqa waj karu naciompi wata runas kanqanku. Chaypi runasqa mirayniykita tawa pachaj watasta mayta ñak'arichenqanku. 7 Chay ñak'arichej naciontaqa Noqa juchachaspa, castigasaj. Qhepamantaj mirayniykeqa chay nacionmanta llojsimuspa, kay jallp'api yupaychawanqanku, nispa. 8 Chantá Diosqa Abrahamwan circuncisión nisqa tratota ruwarqa. Ajinamanta Abrahamqa churin Isaacta circuncidarqa, nacekusqanmanta pusaj p'unchayninman. Isaacpis churin Jacobta circuncidarqa, Jacobpis kikillantataj chunka iskayniyoj aylluspa tatasninkuta circuncidarqa. 9 Jacobpa churisnin, ñawpa tatasqa wawqenku Joseta chejnispa, wata runata jina payta venderqanku, Egipto nacionman apasqa kanampaj. Diostajrí Josewan karqa, payta waqaychaspa. 10 Diosqa Joseta tukuy ñak'ariyninmanta orqhorqa. Allin ñawiwan qhawananta, yachaytawan ima qorqa Egiptomanta reypa ñawpaqempi, paytaj Joseta churarqa Egiptota kamachinampaj, ajinallatataj wasimpipis kamachinampaj. 11 Chaypacha manchay ñak'arina yarqhay karqa Egiptopi, Canaanpi ima; ñawpa tatasninchejpis mikhunata mana tariyta aterqankuchu. 12 Jacobtaj Egiptopi trigo kasqanta uyarispa, ñawpa tatasninchejta kacharqa ñawpaj kutipi. 13 Iskay kuti risqankupitaj, Joseqa wawqesninman rejsichikorqa. Ajinapi Faraonqa Josejpa ayllusninta rejserqa. 14 Chaymanta qhepamantaj Joseqa tatan Jacobta wajyacherqa, tukuy ayllusninwan Egiptoman jampunanta. Tukuyninkupi qanchis chunka phishqayoj karqanku. 15 Ajinamanta Jacobqa Egiptoman tiyakoj urayk'orqa, chaypitaj wañuporqa. Paypa qhepantataj churisnin, ñawpa tatasninchej wañupullarqankutaj. 16 Unay watasninmantaj paykunaj tullusninkuta aparqanku Sichem nisqa jallp'aman. Chaypitaj chay tullusta p'amparqanku Hamor ayllumanta Abrahampa rantisqan jallp'api. 17 Dios imatachus Abrahamman nerqa miraynimpaj ruwananta, chay p'unchay junt'akunampaj qayllamushajtin, israelitasqa Egiptopi manchay ashkhaman mirarqanku. 18 Chantá Egiptopi waj rey sayarerqa; payqa mana rejserqachu pichus José kasqanta. 19 Chay reytaj ñawpa tatasninchejta chejnispa, manchayta paykunata ñak'aricherqa. Chayrayku kamacherqa israelitasmanta nacej qhari wawasta wijch'umunankuta ama kawsanankupaj. 20 Chay tiempollapitaj Moisés nacekorqa, paytaj Diospajqa k'acha wawa karqa. Kinsa killankamataj tatampa wasimpi uywasqa karqa. 21 Chantá saqerparisqa kashajtin, Faraonpa ususin tarikuspa, wawanta jina uywakaporqa. 22 Ajinamanta Moisesqa yachachisqa karqa Egipto runaspa tukuy yachachiyninkupi. Chayraykutaj may sumaj atiyniyoj karqa parlanapaj, ruwanapaj ima. 23 Moisés tawa chunka watayojña kashajtin, sonqon aysarerqa israelita ayllu masisninta waturikamunampaj. 24 Chayaspataj, rikorqa uj Egipto llajtayoj runa uj israelitata maqashajta. Moisestaj israelitaman kutikuspa, chay egipcio runata wañurparicherqa. 25 Moisesqa yuyarqa israelita wawqesnin umachakunankuta, Dios paynejta chay ñak'ariymanta paykunata orqhonanta. Paykunatajrí chaytaqa mana umachakorqankuchu. 26 Q'ayantintaj Moisesqa rikorqa iskay israelitastañataj maqanakushajta. Allinyachiyta munaspa, paykunata nerqa: Qhari masis, qankunaqa wawqes kankichej; imaraykutaj qankunapura maqanakushankichejri? nispa. 27 Runa masinta maqajtaj Moisesta tanqarparispa, nerqa: Pitaj qanta churasunki kamachejniyku, juezniykutaj kanaykipaj? 28 Kunanqa, noqatañatajchu wañuchiwayta munanki, imaynatachus qayna egipciota wañucherqanki, ajinata? nispa. 29 Moisestaj chayta uyarispa, Egiptomanta ayqerikaporqa Madián jallp'aman. Chaypitaj forastero jina kakorqa, iskay qhari wawasniyoj kanankama. 30 Tawa chunka watas qhepaman, Moisés ch'impi kashajtin, Sinaí Orqopi nina larwashaj khishkarara ch'awjrapi uj ángel payman rikhurerqa. 31 Moisesqa t'ukorqa chayta rikuspa. Imachus kasqanta allinta qhawanampaj qayllaykushaspataj, Diospa parlamusqanta uyarerqa: 32 Noqa kani ñawpa tatasniykej Diosnin, Abrahampa Diosnin, Isaacpata, Jacobpata ima, nispa. Moisesqa mancharikuywan kharkatitispa, mana qhawariyllatapis munarqachu. 33 Señortaj payta nerqa: Juk'utasniykita lluch'ukuy, imaraykuchus maypichus sayashanki, chayqa Diospaj t'aqasqa cheqa, may santomin. 34 Cheqamanta Noqa rikuni Egiptopi israelita wawasniy ñak'arisqankuta, llakiyta ayqosqankuta ima uyarillanitaj. Chayrayku urayk'amuni chaymanta paykunata kacharichinaypaj. Kunanqa jamuy ari, Egiptoman kachasqayki, nispa. 35 Kaymin chay Moisesqa, pitachus israelitas qhesachaspa, nerqanku: Pitaj qanta churasorqa kamachejniyku, juezniykutaj kanaykipajri? nispa, chay. Paytamin Dios kacharqa paykunaj kamachejninku, kacharichejninkutaj kanampaj, chay larwashaj khishkarara ch'awjrapi rikhurej angelnejta. 36 Moisesqa israelitasta orqhomorqa Egiptomanta milagrosta, señalesta ima ruwaspa Egipto naciompi, Puka Qocha nisqapi, ch'in pampaspi ima tawa chunka watas junt'ata. 37 Kaymin chay Moisesqa, pichus israelitasman nerqa: Qankuna ukhullamantataj Dios sayarichenqa uj profetata noqata jina, paytataj uyarinkichej, nispa, chay. 38 Israelitas ch'in pampapi kashajtinku, kay Moiseswan angelqa parlasharqa Sinaí Orqopi, tatasninchejwan ima. Kay Moisesllataj Diosmanta jap'erqa kawsay simi nisqasta, noqanchejman qonawanchejpaj. 39 Chaywampis ñawpa tatasninchejqa Moisesta mana kasuyta munaspa, payta qhesacharqanku, sonqosninkupitaj Egiptoman kutiripuyta munarqanku. 40 Chayraykutaj Aaronman nerqanku: Dioskunata ruwapuwayku ñawpaqeykuta rinankupaj; Egiptomanta orqhomuwarqayku, chay Moisesqa imanakunchus, mana yachaykuchu, nispa. 41 Chantá paykunaqa waka uña lantita ruwakorqanku. Uywasta wañuchispataj, chay waka uña ruwasqankuman jaywarqanku, chay ruwasqanku lantej sutimpitaj fiestata ruwaspa, kusikorqanku. 42 Chayrayku Diosqa paykunamanta t'aqakuspa, saqerqa patapi kaj ch'askasta yupaychanankuta, imaynatachus profetaspa qhelqasqankupi nin: Israelitas, Noqamanchu uywasta wañuchispa jaywawarqankichej, tawa chunka watasta//ch'in pampapi kashaspa? 43 Qankunaqa astawampis Molocpa toldontaraj apaykacharqankichej, Refán nisqa diosniykichejpa ch'askantawan. Chay lantista qankunallataj ruwakorqankichej, chaykunata yupaychanaykichejpaj. Chayrayku nacionniykichejmanta presota apachisqaykichej, Babilonia llajtamantapis aswan karumanraj, nispa. 44 Ñawpa tatasninchejpaj karqa Diospa trato ruwasqanmanta Toldo ch'in pampapi, mayqentachus Dios kamacherqa Moisés ruwananta maychus rikusqanman jina, chay. 45 Chay toldota ñawpa tatasninchej herenciata jina jap'ikuspa, aswan qhepaman Josuewan aparqanku nacionesmanta qhechusqanku jallp'aman, mayqenkunatachus Dios qharqorqa ñawpa tatasninchejpa ñawpaqenkumanta, chaypitaj karqa Davidpa tiemponkama. 46 Davidqa Dioswan allin ñawiwan qhawachikuyta tarispa, Paymanta mañakorqa uj Templota ruwajta saqenanta Jacobpa Diosnimpaj. 47 Chantá Salomonqa uj wasita Diospaj sayaricherqa. 48 Chaywampis patapi kaj Diosqa mana runaj makisninwan ruwasqa wasipichu tiyakun, imaynatachus profetapis nin: 49 Janaj pachaqa kamachina tiyanay, kay pachataj chakisniyta churanay. Ima laya wasitataj ruwapuwankichejri? Chayrí, maynejpitaj samarikusajri? 50 Manachu kay tukuy imasta makiy ruwarqa? nin Señorqa. 51 Estebanqa nillarqataj: Qankunaqa k'ullukoj runas, mana creej runas, mana uyarikojtaj kankichej. Chayrayku Espíritu Santoj contrampi churanakunkichejpuni, ñawpa tatasniykichej jina. 52 Mayqen profetatataj ñawpa tatasniykichej mana qhatiykacharqankuchu ñak'arichinankupaj? Paykunaqa ñawpajmantapacha Cheqan Kaj jamunanta willashajkunata wañuracherqanku. Kunanrí, qankunañataj jap'ichispa, Payta wañucherqankichej. 53 Qankunaqa angelesnejta leyta jap'ishaspapis, manapuni kasorqankichejchu, nispa nerqa Estebanqa. 54 Jatun juntapi kamachejkunaqa Estebanpa parlasqanta uyarispa, maytapuni sonqosninkupi phiñarikorqanku, kirusninkuta k'arurakunankukama. 55 Estebanrí Espíritu Santowan junt'a karqa, janaj pachata qhawarispataj, Diospa jatun kaynimpa k'anchayninta rikorqa; Jesustapis rikullarqataj Diospa pañampi sayashajta. 56 Estebantaj nerqa: Qhawariychej, janaj pachata kichasqata rikushani, Runaj Churintataj Diospa pañampi sayashajta, nispa. 57 Chantá sinch'ita qhaparispa, ninrisninkuta llup'aykorqanku, tukuyninkutaj ujllata Estebanman correykorqanku. 58 Llajtamanta jawaman orqhospataj, rumiswan ch'anqaykorqanku. Chay ch'anqajkunataj p'achasninkuta qhawanampaj saqerqanku uj runa Saulo sutiyojman. 59 Chay jinata ch'anqaykushajtinku Estebanqa, Diosmanta mañakuspa, nerqa: Señor Jesusníy, espirituyta jap'ikapuy, nispa. 60 Qonqoriykukuspataj, sinch'ita qhaparerqa: Señor, ama paykunata juchachaychu kay ruwasqankumanta, nispa. Chayta niytawantaj, wañuporqa.
