2 TESALONICENSES 3

1Kunanqa hermanos, noqaykupaj mañapuwayku, Señorpa Simi Nisqan tukuynejpi uyarisqa kanampaj, jatunchasqataj, imaynachus qankuna ukhupi karqa, ajinata. 2Diosmanta mañapullawaykutaj, chay may sajra runasmanta waqaychasqa kanaykupaj, imaraykuchus mana tukuychu creenku. 3Señortajrí nisqanta junt'allampuni, Paytaj kallpachasonqachej, waqaychasonqachejtaj sajra kajmanta. 4Noqaykoqa mayta qankunamanta suyakuyku Señorpi. Tukuy ima kamachisqaykuta kunankama junt'ashankichej, jinataj qhepamampis junt'allankichejtaj. 5Señortaj sonqoykichejta Diospa munakuyninman aysachun, Cristoj jamuyninta pacienciawan suyanaykichejpaj. 6Kunanqa, hermanos, qankunata kamachiyku Señorninchej Jesucristoj sutimpi, t'aqakunaykichejta mayqen hermanopis mana trabajayta munajmanta, yachachisqaykuman jina mana kawsakuyta munankuchu, chaykunamantapis. 7Qankunaqa allinta yachankichej, imatachus noqayku ruwarqayku, ajinallatataj qankunapis ruwanaykichej kasqanta, imaraykuchus qankunawan kashaspa, mana qhellaschu karqayku. 8Nitaj pejpa t'antantapis qhasimanta mikhorqaykuchu; astawanqa jump'i suruyta tuta p'unchay trabajarqayku, ama ni mayqenniykichejpaj llasa q'epi jina kanaykupaj. 9Atiykuman karqa qankunamanta imatapis mañakuyta kawsanaykupaj. Chaywampis mana imatapis mañakorqaykuchu, imaraykuchus munarqayku ruwasqaykuwan yachachiyta qankunapis kikinta ruwanaykichejpaj. 10Chayrayku qankunawan kashaspa, kayta kamacherqayku: Pichus mana trabajayta munajqa ama mikhuchunchu, nispa. 11Cheqamanta, uyariyku wakinkuna qankuna ukhupi pantasqata purisqankuta, mana imapi trabajaspa, astawampis wajkuna trabajakojta mana saqespa. 12Chay jina kajkunataqa kamachiyku, k'amiykutaj Señor Jesucristoj sutimpi, tukuy sonqo trabajaspa mikhunankupaj ganakunankuta. 13Qankunataj hermanos, ama sayk'uychejchu allin kajta ruwaspa. 14Sichus pipis kay cartapi nisqaykuta mana kasunman chayqa, nipuychej qhella runa kasqanta, amataj paywan tantakuychejchu, ajinamanta p'enqakunampaj. 15Chaywampis, paytaqa ama enemigopajchu jap'iychej, astawanqa hermanota jina k'amiykuychej. 16Sonqo tiyaykuyta qoj Señorqa qankunaman allin kawsakuyta qochumpuni tukuy imapi. Señortaj tukuy qankunawan kachun. 17Noqa Pablo, kikin makiywampuni qhelqaspa, napaykuykichej, yachanaykichejpaj noqajtapuni kay carta kasqanta. Ajinata qhelqani. 18Señorninchej Jesucristoj qhasilla k'acha yanapaynin tukuy qankunawan kachun.

will be added

X\