1 Chaymanta Davidqa filisteokunata atiparqa, tukuy jallp'ankuta qhechuspa atiyninman churarqa. Qhechullarqataj Meteg-amá nisqa cheqatapis filisteokunaj makinkumanta. 2 Ajinallataj moabitakunata atipallarqataj. Paykunataqa pampaman winkuchispa, q'aytuwan tupucherqa: Pikunachus q'aytuwan iskay tupusqa ukhupi kajkunaqa wañuchisqa karqanku, uj tupusqa ukhupi kajkunataj kawsarqanku. Ajinamanta chay kawsajkuna moabitakunaqa Davidpa makimpi karqanku, paymantaj impuestota pagarqanku. 3 Davidqa atipallarqataj Hadad-ezerta; payqa karqa Rehobpa churin, Sobaj suyu jatun kamachejnin. Davidqa Hadad-ezerta atiparqa Éufrates Mayu chaynejman jallp'anta watej jap'ikapoj rishajtin. 4 Chaykunamanta Davidqa presocharqa waranqa qanchis pachajniyoj caballopi maqanakoj soldadokunata, jinataj chakillapi purej soldadokunamantataj iskay chunka waranqata. Jinataj carretakunata qhatataj, chay caballokunaj chakinmanta ankunta p'itirarqa; pachaj carretapaj jinalla caballokunata puchucherqa. 5 Chaymantaqa Damascomanta arameokuna chayamorqanku Sobaj jatun kamachejnin Hadad-ezerta yanapaj. Davidtajrí arameokunatapis atipallarqataj, paykunamanta iskay chunka iskayniyoj waranqata wañuchirqa. 6 Chaymantataj Damasco llajtapi Davidqa soldadonkunata churarqa; jinamanta arameokunapis paypa makimpi karqanku, impuestotataj pagaj kanku. Ajinata ari, Tata Diosqa Davidtaqa mayman maqanakoj rejtimpis yanapallarqapuni. 7 Chaymanta Davidqa Hadad-ezerpa soldadonkunata kamachejninkoj qori escudonkunata qhechuspa, Jerusalenman apakaporqa. 8 Ajinallatataj Hadad-ezerpa Bétah llajtamanta, Berotai llajtamantawan ima ashkha bronceta apakaporqa. 9 Hamat llajtaj jatun kamachej Toi uyarerqa Davidqa jatun kamachej Hadad-ezerpa soldadonkunata atipasqanta. 10 Chayrayku churin Joramta jatun kamachej Davidta napaykuchejta kacharqa qolqemanta, qorimanta, broncemantawan ruwasqa imakunatawan apachispa: –Allimpuni Hadad-ezerta maqanakupi atiparqanki, nispa. Imaraykuchus Toipis Hadad-ezerwan maqanakushallarqataj . 11 Chantá Davidqa tukuy apamusqankuta Tata Diosman qoporqa, waj suyumanta apamusqankumanta qolqeta qorita ima chaykunatawan khuska korqa, chaykunataqa tukuy atipasqa suyukunamanta apamorqanku: 12 Siriamanta, Moabmanta, Amonmanta, filisteokunamanta, jinataj amalecitakunamantapis. Sobaj jatun kamachej Rehobpa churin Hadad-ezermanta qhechusqantapis Diosman qollarqataj. 13 Davidqa may uyarisqa karqa. Arameokunata atipasqanmanta kutimushaspataj, Kachi Qochapampa nisqapi, wañuchillarqataj chunka pusajniyoj waranqa edomitakunata. 14 Chaymantaqa qhawaj soldadokunata churallarqataj tukuy Edom jallp'aman, edomitakunataj Davidpa kamachinkunanman tukorqanku. Ajinamanta Davidqa mayman risqampipis Tata Diospa yanapayninwan atipallarqapuni . 15 Davidqa tukuy Israel suyupi cheqan kajta ruwaspa kamacherqa. 16 Soldadonkunata kamachejqa Saruiaj churin Joab karqa; Ahiludpa churin, Josafattaj Israel suyoj qhelqerin karqa. 17 Ahitobpa churin Sadoc, chantá Abiatarpa churin Ahimelec imaqa sacerdotekuna karqanku. Seraiastaj Davijpa qhelqerin karqa. 18 Joiadaj churin Benaiataj quereteokunaj, peleteokunaj kamachejninku karqa. Davidpa churikunataj sacerdotekuna karqanku.
