1 Davidqa watejmanta Israel ayllumanta kinsa chunka waranqa ajllasqa soldadonkunanta tantaykullarqataj. 2 Jinaspataj Juda suyupi chay Baalá llajtamanta purirerqanku Davidwan, tukuy runakunanwan, Diospa arcanta apamunankupaj. Arcaqa Tukuy Atiyniyoj Tata Diospa sutinta oqharispa mañakuna, Payqa arcapi querubinkuna chawpipi tiyakushan. 3 Orqo patapi kasharqa Abinadabpa wasin chaymanta Tata Diospa arcantaqa mosoj carretaman churaykorqanku. 4 Abinadabpa churinkuna Uzawan, Ahiowan Tata Diospa arcanta apaj carretata pusayserqanku. Ahiotaj ñawpaqenta risharqa. 5 Chaykama Davidwan, tukuy israelitakunawanqa Diospa ñawpaqenta risharqanku, tukuy kallpankuwan takispa, tususpa ima. Tocasharqankutaj arpakunata, guitarrakunata, panderokunata, qenakunata, platillokunata ima. 6 Jinallapi Naconpa Eran nisqa, chayman chayamuspa, Uzaqa Tata Diospa arcanta makinwan jap'erqa, bueyekuna misk'ajtinku arca mana urmananpaj. 7 Chaypacha Tata Diosqa Uzapaj phiñakorqa, chay arcata mana manchachikuspa jap'iykusqanmanta. Diosqa chay kikimpi Uzata wañurparicherqa. Uzaqa Diospa arcan qayllapi wañusqa choqakorqa. 8 Chantá Davidqa ujinayarqa, Tata Dios chay jinata Uzata wañurparichisqanrayku. Chayrayku chay cheqata Peres-uzá sutiwan suticharqa, chay sutiwantaj kunankama kashan. 9 Chaypacha Davidqa Tata Diosta sinch'i manchachikuspa, nerqa: «¿Imapajtaj yuyallaymampis Tata Diospa trato ruwasqan arcata wasiyman apaytari?» nispa. 10 Diospa trato ruwasqan arcata Davidqa manaña llajtanman apayta munaspari, kamacherqa Gat llajtamanta Obed-edompa wasinman apanankuta. 11 Diospa trato ruwasqan arcaqa Obed-edompa wasimpi qhepakorqa kinsa killata. Tata Diostaj payta, aylluntawan samencharqa. 12 Chantá Davidman willarqanku Tata Diosqa Obed-edompa wasimpi arcan kasqanrayku ayllunta, tukuy paypa kapuynintawan saminchasqanta. Chantá Davidqa rispa, jatun kusiywan Obed-edompamanta Tata Diospa arcata llajtanman apakamporqa. 13 Tata Diospa arcanta apamojkunaqa sapa sojta thaskijtinku, Davidqa uj torota, uj wira corderotawan ñ'akaspa Tata Diosman jaywarqa. 14 Davidqa linomanta unkhu p'achawan p'achallisqa risharqa, Tata Diospa ñawpaqempi tukuy kallpanwan tusurispa . 15 Davidwan, tukuynin israelitakunawanqa Tata Diospa arcanta apasharqanku may kusiywan qhaparispa, cornetakunata waqarichispataj. 16 Tata Diospa arcan Davidpa llajtanman chayajtin, Saulpa ususin Micalqa wasin ventananmanta qhawarimuspa, kamachej Davidta tusushajta, phinkiykachashajtataj Tata Diospa ñawpaqempi rikorqa. Chayta rikuspa, Micalqa sonqompi Davidta pisipaj qhawarqa. 17 Tata Diospa arcantaqa, chaypajpuni wakichisqan toldo ukhuman churarqanku. Chanta Davidqa Tata Diospa ñawpaqempi q'olacherqa uywa ñak'asqakunata jinataj allinyakunapaj jaywanatawan. 18 Chaykunata jaywayta tukuspañari, Davidqa tukuy israelitakunata Tukuy Atiyniyoj Tata Diospa sutimpi bendicerqa. 19 Jinapi David chaypi kajkunaman, mikhunankupaj qorqa sapa ujman uj t'antata, uj chhikan aycha kankata, palma poqoymanta t'antata, chantá uva k'isata ima. Chaymantataj tukuyninku wasinkuman kutiporqanku. 20 Chantá David ayllumasinta saminchanampaj kutipojtin, Saúlpa ususin Mical payta taripaj llojsimuspa, nerqa: –¿Mana p'enqayniyoj runa, jatun kamachej kashaspa chay imillaspa rikunankuta sikiyki rikhurisajta tususqaykeqa qampajqa allinchu? nispa. 21 Davidtajrí Micalman kuticherqa: –Arí, tusorqani, Tata Diosta yupaychaspa tusorqani. Payqa ajllawarqa tataykej cuentanmanta jinataj tukuy aylluykejmanta ima, Israel ayllunta kamachinaypaj. Chayrayku Tata Diospa ñawpaqempi tusullasajpuni. 22 Jinapis astawanraj kunanmanta nisqaqa ruwasaj, ninki jina noqapaj p'enqay kasqanta; chaywampis chay sipaskunaqa pikunamantachus parlanki, chaykuna allimpaj qhawawanqanku. 23 Saúlpa ususin Micalqa wañupunankama mana uj wawatapis rejserqachu.
