2 SAMUEL 5

1Chaymanta qhepata Israelmanta tukuy ayllukuna Hebronpi tantakuspa, Davidwan parlarqanku: «Noqaykoqa yawar masiyki kayku. 2Cheqamanta, Saúl jatun kamachejniyku kashajtimpis, qampuni Israelitakunataqa maqanakukupi kamachej jina pusaykacharqanki. Chay jawaqa Tata Dios nisorqa: Qanqapuni tukuy Israel aylluyta michinki, kamachinkitaj,» nispa. 3Chaypacha Israelmanta tukuy kurajkuna rerqanku Hebronman jatun kamachej Davidwan parlaj, Tata Diospa ñawpaqempi, chay kuraj runakunawan, payqa uj tratota ruwarqa. Israel suyupi jatun kamachej kanampaj umanta aceitewan jawirqanku. 4Kamachiyta qallarishajtin Davidqa kinsa chunka watayoj karqa, tawa chunka watataj kamacherqa. 5Judá aylluta Hebronmanta qanchis wata sojta killayojta kamacherqa, chaymantataj Jerusalenpi kamacherqa Israel aylluta jinataj Judá ayllutapis kinsa chunka kinsayoj watata. 6Chay qhepatataj jatun kamachej Davidqa soldadonkunawan khuska Jerusalenman rirqanku maqanakoj, chaypi tiyakojkuna jebuseokunawan. Chay jebuseokunataj mana yuyarqankuchu David chay llajtaman yaykuspa jap'ikapunanta; chayrayku alqhokachakuspa nerqanku: «Qanqa mana kay llajtataqa j'apikapuyta atinkichu; ciegokuna suchukuna ima, mana yakuchimusonqankuchu,» nispa. 7Chaywampis Davidqa Sión pukarata atipaspa jap'erqa; chayrayku kunankama Davidpa Llajtan nisqa kashan. 8David chay kutipi nisqa: «Pichus jebuseokunata wañurachej yaykojqa, yaku larq'anta yaykuspa wañurachimuchun chay ciegokunata jinataj suchukunata ima, sinch'ita chejnikuni,» nispa. Chaymantapachataj nej kanku: «Ni ciegokuna nitaj suchukuna temploman yaykuyta atinkuchu,» nispa. 9Chaymantataj Davidqa pukara kamachinan wasipi tiyakaporqa, chay llajtatataj Davidpa Llajtan, nispa suticharqa. Muyuyninmantaj Milo chaynejmantapacha ukhu ladoman perqaykucherqa . 10Tukuy Atiyniyoj Tata Diosqa paywan kasqanrayku, Davidqa astawanpuni kallpachakusharqa. 11Chayrayku Tiro sutiyoj suyuta kamachej Hiramqa kacharqa runakunanta parlapayamunankupaj; chay jawa kachallarqataj carpinterokunata, jinataj rumi ch'eqojkunatapis. Paykunaqa cedro kurkukunata apaspa, Davidpa kamachinan wasita ruwarqanku. 12Ajinamanta Davidqa cheqamanta yacharqa Tata Dios payta Israel suyupi jatun kamachej kanampaj churasqanta, llajtanta munakuspa suyuntapis jatunyachisqantawan. 13Hebronmanta Jerusalenman jampusqanmantaña, Davidqa waj warmikunawan casarakullarqataj, wakinwantaj tantakullarqa, chay warmikunapitaj astawan churinkuna jinataj ususinkunapis kallarqankutaj. 14Jerusalenpi paqarikojkuna kaykuna karqanku: Samúa, Sobab, Natán, Salomón, 15Ibhar, Elisúa, Néfeg, Jafía, 16Elisamá, Eliadá, Elifélet ima. 17Maypachachus filisteokuna uyarerqanku Davidqa Israel ayllupi jatun kamachejpaj churasqa kasqanta chaypacha, tukuyninku Davidwanta maqanakunankupaj tantaykukorqanku. Davidtajrí chayta yachaspa, pukaraman riporqa. 18Chaypacha filisteokunaqa astawan ñawpajman rispa, Refaim pampaman junt'aykorqanku. 19Chayraykutaj Davidqa Tata Diosta taporqa: –¿Filisteokunawan riymanchu maqanakoj? ¿Paykunawan maqanakojtiyrí, yanapawankimanchu atipayta? nispa. Tata Diostaj kuticherqa: –Arí, rillay maqanakoj; Noqa, yanapasqayki atipanaykipaj, nispa. 20Chantá Davidqa, Baal-perazimman rispa, filisteokunata atipaykorqa. Chayrayku David nerqa: «Tata Diosqa ashka yakujina enemigoykunata ñawpaqeymanta chinkarpachin,» nispa. Chay cheqatataj Baal-perazim sutiwan suticharqa. 21Chay jawari filisteokunaqa lantinkunata saqerpayarqanku, Davidwan, soldadonkunawantaj chaykunata apakaporqanku. 22Chaywampis filisteokunaqa watejmanta Refaim pampaman junt'aykamullarqankutaj. 23Watejmanta Davidqa Tata Diosta tapullarqataj, Paytaj nerqa: –Ama paykunawan maqanakoj qheqanta riychu, manachayqa chay bálsamo sach'akunanejman chayaytawan, muyuykuspa qhepallankumanta maqanakoj yaykunki. 24Maypachachus uyarinki sach'akuna patapi runapis purishanman jinata chaypacha, maqanakoj yaykunki, imaraykuchus chay niyta munan Noqa Tata Diosqa ñawpaqeykita rishasqayta filisteokunajpa soldadonkuta wañurachispa. 25Davidqa Tata Diospa nisqanman jina ruwaspa, filisteokunata atipaykorqa Gabaón llajtamantapacha Guézer llajtakama.

will be added

X\