1 Saúlpa ayllunmanta kajkunawan Davidpa ayllunwan maqanakoqa unayta karqa. Davidqa aswan atiyniyojman tukusharqa, Saulpamanta kajkunatajrí pisiyapusharqanku 2 Hebron llajtapi David tiyakushajtin wawankuna kaykuna karqanku: Jezreel llajtayoj Ahinoampi kuraj churin Amnón. 3 Carmel llajtayoj Nabalpa viudan Abigailpa churin Quileab, Gesur llajtaj jatun kamachin Talmaipa ususin Maacaj churin Absalón. 4 Haguitpa churin Adonías karqa; Abitalpa churin Sefatías; 5 Eglaj churintaj Itream. Kay tukuy wawakunan karqanku Hebron llajtapi David tiyakushajtin. 6 Saúlpa ayllunwan, Davidpa ayllun maqanakuy kashajtinmi, Abnerqa aswan atiyniyojman Saúlpa ayllumpi tukusharqa. 7 Saulpata tiyapusqa uj tanta warmin Rizpa sutiyoj, Ajaj ususin. Abnertaj chay warmiwan puñuykakapusqa. Chayraykutaj Is-bosetqa Abnerta k'amispa, nerqa: –¿Imaraykutaj tataypa warminwan puñuykakaporqankiri? nispa. 8 Abnertaj Is-boset k'amisqanmanta phiñakuspa, kuticherqa: –¿alqochu kasqani ruwasqaymanta mana pagoyoj kanaypaj? Noqaqa sumajta yanaparqani tatayki Saúlpa ayllunta, wawqenkunata, kawsaqenkunatawan ima. Davidpa makinmampis mana jaywaykorqaykichu. ¿Qantaj juchachawankimanchu kasqa kay warmimanta? 9 Kunanqa Tata Dios sinch'ita jasut'iwachun manachus Davidwan ruwayman Tata Diospa nisqanman jina chayqa. 10 Saúlpa ayllunmanta kamachinanta qhechuspa, Davidta churachun Israel ayllupi, jinataj Judá ayllupipis jatun kamachej kanampaj, Dan llajtamanta Beerseba llajtakama. 11 Is-bosettaj mana uj simillatapis Abnerman kutichiyta aterqachu, manchachikusqanrayku. 12 Chantá Abnerqa Davidman willacherqa: –«¿Pejpatataj kay suyuri? Noqawan uj tratota ruwana. Noqa atisqayta ruwasaj tukuy Israel ayllu qanman kutimpunampaj,» nispa. 13 Davidtaj kuticherqa: «Walej kanman qanwan tratota ruwananchej, kay nisusqayta ruwanayki kajtenqa, jamuwaspaqa, pusamunawaykipuni tiyan Saúlpa ususin Micalta.» 14 Chay jawa, Davidqa kachallarqataj Is-bosetman kayta willanankupaj: «Kutichipuway warmiy Micalta, paytaqa pachaj filisteokunajpa jisp'ananku ch'ulunta kuchuspa orqorqani.» 15 Chantá Is-bosetqa kamacherqa Laispa churin Paltielmanta warmin Micalta qhechunankuta. 16 Paltieltaj warmimpa qhepanta waqaspa rerqa Bahurim llajtakama. Chaypitaj Abnerqa Paltielta kamacherqa kutipunanta, jinataj payqa kutiporqa. 17 Aswan qhepanejta, Abnerqa parlarqa Israelpa kurajninkunawan: «Ñawpajmantaña qankunaqa David jatun kamachiykichej kananta mask'ashankichej. 18 Kunanqa Davidta jatun kamachejniykipaj churaychej, imaraykuchus Tata Diosqa nerqapuni paynejta kacharichinanta Israel suyuta filisteokunajpa makinkumanta, jinataj tukuy enemigonkumantapis.» 19 Abnerqa parlallarqataj Benjamín ayllumanta kajkunawan. Chaymantataj rerqa Hebronkama Davidman willamunampaj, Israel ayllu jinataj Benjamín ayllumanta kajkunapis imachus ruwanayashasqankuta. 20 Abnerqa iskay chunka runakunawan Hebronman chayarqa, David kasharqa, chayman. Davidtaj paypaj, chay runakunampaj ima sumaj mikhuyta wayk'ucherqa. 21 Chantá Abnerqa Davidta nerqa: –Kunanqa rinay tiyan tukuy Israel ayllumanta kajkunata tantamoj qanwan uj tratota ruwanankupaj, jinamanta qan paykunata kamachinaykipaj munasqaykiman jina, nispa. Chantá Davidqa Abnerta kacharpayarqa, paytaj kusisqa riporqa. 22 Joabtajrí, Davidpa soldadonkunawan ima purisqankumanta chay kikinpuni chayamusharqanku, tukuy imakunata maqanakupi qhechumusqankuta aparisqa. Abnerqa manaña Davidwanchu Hebronpi kasharqa; payqa David kacharpayajtinkama ripusqa. 23 Tukuy soldadonkunawan khuska chayamojtinkama, Joabman willarqanku Nerpa churin Abnerqa jatun kamachejwan kasqanta, chantá David kacharpayajtin ripullasqanta. 24 Chaypacha Joabqa jatun kamachejman, nerqa: –¿Imatataj kayta ruwankiri jatun kamachejniy? Abnerqa qanman parlaj jamusqa, qanrí ripojta saqellasqanki. 25 Manachu yachakunki, Nerpa churin Abnerqa qanta ch'awkiyasoj jamususqanta, wateqasojtaj, maymanchus risqaykita, tukuy ruwasqakitapis yachanampaj, nispa. 26 Jinapi Joabqa Davidwan parlasqanmanta llojsiytawan, Abnerta mask'achejta kacharqa, Davidpa mana yachasqallanta. Mask'ajkunatajri Sirá nisqa pujyumanta Abnerta kutichimorqanku. 27 Hebronman Abner chayamojtinkama, Joabqa llajta punkumanta wajnejman pusarqorqa sapallankupi parlanankupaj, chaypitaj wijsampi t'ojsispa wañurparicherqa, wawqen Asaelta wañuchisqanmanta vengakuspa. 28 Davidtajrí chayta yachaytawan, nerqa: «Noqawan, Israelitakunawampis Nerpa churin Abner wañusqanmantaqa Tata Diospa ñawpaqempi, mana juchayojchu kayku. 29 Tata Dios Joabta aylluntawan kay juchamanta ñak'arichichun. Ayllumpi kallachumpuni yawar apay onqoywan, lepra onqoywan, chayrí wist'u chaki kaywan onqojkuna; wañuchisqa kachunku, chayrí yarqhaymanta ñak'arichunku.» 30 Joabwan, Abisaiwan Abnerta wañuchirqanku, Gabaón maqanakupi wawqenku Asaelta wañuchisqanrayku. 31 Chaymantaqa David kamacherqa Joabta, paywan kaj runakunanta ima: «P'achaykichejta llik'irakuspa, qhashqa p'achata churakuychej, waqaychejtaj Abner wañusqanmanta,» nispa. Jatun kamachej Davidtaj ayaj qhepanta rerqa. 32 Abnertaqa Hebrón llajtapi p'amparqanku . Abnerpa ayan p'ampashajtimku, Davidqa mayta waqarqa, tukuy runakunapis waqallarqankutaj. 33 Chaypacha Davidqa kay aya takiyta takerqa: «¿Abner, imaraykutaj mana yuyayniyoj runa jina wañunayki karqari? 34 Makiykeqa mana watasqachu karqa, nitaj chakiykipis cadenasqachu karqa. Imaynatachus runa wañuchejkunaj makinkupi wañunku, ajinallatataj qampis wañorqanki.» Chanta tukuy runakuna Abnermanta waqallasharqankupuni. 35 Chanta tukuynin Davidman jamuspa, imallatapis mikhurikunanta nerqanku. Davidtajrí juraspa, paykunata nerqa: –Tata Dios sinch'ita jasut'iwachun, manaraj ch'isiyamushajtin t'antata, chayrí imallatapis mikhuyman chayqa, nispa. 36 Tukuy chayta yachaspa, allinmi nerqanku, jatun kamachejpa tukuy ruwasqantaj allimpuni paykunaman rijch'arqa. 37 Chay p'unchaypi tukuy israelitakunaqa cheqamanta yacharqanku, jatun kamachej Davidqa Nerpa churin Abnerpa wañusqanmanta mana juchayoj kasqanta. 38 Chantá jatun kamacheqa yanapajkunanta nerqa: –Qankuna yachankichej jina, Israel ayllu ukhupi uj kuraj kamachej, jatun qhawasqa runa wañupusqanta. 39 Diospa churasqan jatun kamachej kani chaypis mana kallpayoj jina kashani, Seruiaj churinkuna chay millayta ruwasqankurayku. Tata Diosqa chay juchankuman jina kutichipuchun ruwaj runamanqa.
