1 Kaykunamin Davidpa qhepa kaj parlaykusqanqa: «Jesejpa churin David, pitachus Diosqa mayta jatuncharqa, pitachus ajllakorqa Jacobpa Diosnin, Israelpi misk'i takiyninkunata takij, kay jinata nin: 2 »Tata Diospa Espíritun noqanejta parlan; nisqanqa simiy puntapi kashan. 3 Israelpa Diosnin nerqa; Israelpa Waqaychajnin niwan: “Sichus pipis runasta kamachenqa cheqan ruwaywan, sitajchus Diosta manchachikuspa kamachenqa chayqa, 4 payqa sut'iyaymanta llojsimoj inti jina, mana phuyuyoj cielopi k'anchaynin jinataj, para pasayta qhorata wiñachej lliphipej jina kanqa.” 5 Chayrayku mirayneyqa Diospi sinch'i sayasqa kashan. Paymin noqawan uj wiñay tratota ruwarqa, sumaj cheqan ruwasqata, sumaj sayachisqatataj. Payqa tukuy sajra imakunamanta salvawanqa, tukuy imatachus munasqaytataj ruwapuwanpuni. 6 Tukuy sajra ruwaj runakunatajrí khishkas jina wijch'usqa kanqanku, mayqentachus mana pipis makinwan jap'iykunchu, chay jina. 7 Jap'iykunankupajqa hosewan, chayrí k'aspiwan jap'inanku tiyan, ninaman wijch'uykunankupaj tukuynin q'olanankama,» nispa. 8 Davidpa aswan wapu kaj soldadonkunaj sutinkoqa kaykuna kanku: Hacmonita Is-boset, payqa kinsa kaj aswan wapu soldadokunamanta kamachejnin karqa; uj kutipi pusaj pachaj runakunata lanzallanwan wañuracherqa. 9 Qhepantaj, ajojita Dodoj churin Eleazar karqa, paypis chay kinsa aswan wapu kajkunamanta ujnin kaj karqa. Paykunaqa Davidwan kasharqanku filisteokuna maqanakupaj tantasqa kashajtinku. Chaypitaj paykunalla maqanakoj sayaykorqanku, chay waj israelitakunataj ayqerikaporqanku. 10 Kay Eleazarqa mana iskayrayaspa maqanakullarqapuni, filisteokunata wañuracherqa, makin espadanman k'askaykunankama. Chay p'unchaypeqa Tata Diosqa filisteokunata Eleazarwan atipasqata atipaykucherqa. Chaymantataj soldadokunaqa Eleazarpa qhepanta jamorqanku chay enemigonkoj imakunasninta jap'ikapunallankupaj. 11 Kinsa kajtaj ararita Agej churin Sama karqa. Filisteokuna maypachachus Lehi llajtapi tantakorqanku, lenteja tarpusqa kasharqa, chay campopi chaypachaqa, israelitakunaqa ayqerqanku paykunamanta. 12 Samatajrí chay tarpusqa chawpipi sayaykukuspa, paykunata jark'arqa, jinamanta filisteokunata atipaykorqa. Tata Diosqa chay p'unchay filisteokunata Samawan atipasqata atipaykucherqa. 13 Uj kuti, cosecha tiempopi, kinsa chunka wapu soldadokunamanta kinsa ukhu Davidwan parlaj rerqanku Adulam nisqa chhanka jusk'upi. Filisteokunamanta soldadokunataj Refaim Vallepi jarasqa kashajtinku. 14 Davidqa chhanka jusk'upi kasharqa, maypachachus filisteokunajpa uj t'aqa soldadonku Belenpi kasharqanku chaypacha. 15 Jinapi Davidqa yakumanta ch'kisqanrayku nerqa: «Imaynapichus pillapis yakuta jaywariwanman, Belén llajta punkupi kashan, chay pujyumanta,» nispa. 16 Chantá chay kinsantin wapu runakunaqa filisteojkunajpa jarankuman yaykuspa, yakuta orqhomorqanku, Belén llajtaman yaykuna pujyumanta, Davidman apanankupaj. Davidman jaywajtinkutajrí, payqa mana ujyaqachu, manachayqa pampaman jich'arparerqa, Tata Diosman ofrendata jina jaywaspa. 17 Pay nerqa: «Tata Dios jark'awachun kay yakuta ujyanamanta. Ujyayman chayqa, kay runakunajpa yawarninkutapis ujyashayman jina kanman, imaraykuchus kay yakutaqa kawsayninkuta wañuyman churaspa apamorqanku,» nispa. Chayrayku mana ujyayta munarqachu. Chaytaqa chay kinsa wapu runakuna ruwarqanku. 18 Saruiaj churin Joabpa wawqen Abisaiqa chay kinsa chunka runakunajpa kamachejninku karqa. Uj kutipeqa maqanakoj sayaykorqa, lanzanwantaj kinsa pachaj runakunata wañuracherqa. 19 Ajinamanta chay kinsa chunka runakuna ukhupi may uyarisqa karqa, kamachejninkutaj karqa; chaywampis manapuni chay kinsa wapu kajkunamanqa jap'ikorqachu. 20 Cabseel llajtamanta uj runa kallarqataj Joiadaj churin, Benaía sutiyoj; chaypis wapu runa kaspa, t'ukuna imasta ruwarqa. Moabmanta Arielpa iskaynin churinkunata pay wañucherqa. Uj kutitaj, maypachachus rit'isharqa chaypacha, urayk'orqa uj t'oqoman, chay ukhupitaj uj leonta wañucherqa. 21 Wañuchillarqataj uj jatunkaray egipcio runata, lanzanwan may wakisqa kashajtin. Benaiaqa k'aspillawan chimpaykuspa, chay lanzanta qhechurparerqa egipcioj makinmanta, chay kikin lanzallanwantaj wañurparicherqa. 22 Joiadaj churin Benaiaqa chayta ruwaspa, may uyarisqa karqa chay kinsa chunka runakuna ukhupeqa. 23 Paykuna ukhupi aswan uyarisqa karqa; chaywampis manapuni chay kinsa wapu kajkunaman jap'ikorqachu. Davidtaj payta churarqa jatun kamachi qhawaj soldadokunawan. 24 Kinsa chunka wapu runakunaqa, kaykuna karqanku: Joabpa wawqen Asael, Belenmanta Dodoj churin Elhanán; 25 Harod llajtamanta Samá, Elicawan; 26 Bet-pélet llajtamanta Heles; Tecoa llajtamanta Iquespa churin Ira; 27 Anatot llajatamanta Abiezer; Husah llajtamanta Sibecai; 28 Ajoj llajtamanta Salmón; Netofá llajtamanta Maharai; 29 Baanaj churin Héleb, chaypis Netofallamantataj karqa; Benjamín jallp'a Guibeamanta Ribaijpa churin Itai; 30 Piratonmanta Benaías; Gaas Mayumanta Hidai; 31 Arbamanta Abí-albón; Bahurinmanta Azmávet; 32 Saalbonmanta Eliahbá, jinataj Jasenpa churinmanta Jonatán; 33 Araritamanta Samá; Sararpa churin Ahiam, paypis araritallataj karqa; 34 Maacamanta Ahasbaipa churin Elifélet; Silomanta Ahitofelpa churin Eliam; 35 Carmel llajtamanta Hezrai; Arbitamantataj Paarai, 36 Soba llajtamanta Natanpa churin Igal; Gat llajtamanta Bani; 37 Amonmanta Selec; Beerotmanta Naharai, payqa Saruiaj churin Joabpa yanapajnin karqa; 38 Jatirmanta Irawan, Garebwan; 39 hitita Uriaspiwan. Tukuyninkupi kinsa chunka qanchisniyoj karqanku.
