1 Chaypacha Gilgal llajtapi kasharqa Benjamín ayllumanta uj millay runa Seba sutiyoj; payqa Bicrij churin karqa. Chay Sebaqa tukuy aylluta oqharicherqa putututa waqachispa, nerqataj: «Noqanchejqa ni ima ruwananchej tiyanchu Jesejpa churin Davidwanqa. Israeltakuna, wasisniykichejman ripuychej,» nispa. 2 Israelmanta kaj tukuynin runakunaqa Davidta saqerparispa, rerqanku Bicrij churin Sebata qhatinankupaj. Judamanta kajkunatajrí Jordán Mayumanta Jerusalenkama jatun kamachiman sayasqallapuni kasharqanku. 3 Davidqa Jerusalenpi kamachinan wasiman kutipuspa; chay kamachinan wasita qhawajkuna chunka tanta warmikunanta, uj wasiman wisq'aykucherqa, soldadokunawan qhawachispa. Chaypitaj paykunata mikhuchillarqapuni; chaywampis manañataj ujtawan paykunawanqa puñuykorqachu. Ajinata chay warmikunaqa wisq'asqa qhepakorqanku, warmi sapakuna jina wañupunankukama. 4 Chantá jatun kamacheqa Amasata kamacherqa: –Judamanta kaj runakunata wajyamuy, kinsa p'unchaymantawantaj kaypi paykunawan kanayki tiyan, nispa. 5 Chantá Amasaqa Judamanta kajkunata tantamoj rerqa; chaywampis payman jatun kamachej nisqan p'unchaymanta astawan qheparikorqa. 6 Chaypacha Davidqa Abisaita nerqa: –Sebaqa Absalonmanta astawanraj uma nanayta qowasunman. Chayrayku soldadoykunata pusariykukuspa, qhepanta kachaykukuy; pajtataj llusp'iwasunman, wakin jark'achasqa llajtasta tarispa. 7 Sebata qhatej rerqanku Joabpa soldadonkuna, kamachina wasipi qhawajkuna quereteokuna, peleteokuna ima. Chantá chay aswan wapu kaj soldadokunapiwan, Jerusalenmanta llojserqanku Abisaiwan khuska. 8 Gabaonpi jatun chhanka chaynejpiña kashajtinkuri, Amasa paykunata taripaj llojserqa. Joabqa maqanakuna p'achan churasqa kasharqa, uj chumpiwan sumaj chumpisqa, uj ladompitaj espadayoj; thaskirejtinkamataj, espadan uraman sururparqa. 9 Chaypachataj Joabqa espadanta oqhariytawan chimpaykorqa Amasaman, sunkhanta paña makinwan jap'erqa much'aykunaj jina, tapurerqataj: –¿Walejchu risunki, wawqéy? nispa. 10 Amasatajrí mana qhawarikorqachu Joab makimpi espadata jap'ishasqanta. Jinallamanta Joabqa chaywan wijsanta khallarparerqa, tukuynin wijsantaj thallikamorqa. Joab mana ujtawan t'ojsejqachu. Amasa wañorpapujtin pacha. Chaymantataj Joabwan, wawqen Abisaiwan imaqa Bicrij churin Sebatañataj qhatiykorqnku. 11 Jinapi Joabpa ujnin kaj soldadonqa, Amasa wijch'urayasharqa, chayman qayllaykuspa, nerqa: –Pichus Joabman Davidmanwan kutisqa kajqa, Joabta qhatichun, nispa. 12 Chaykama Amasaqa chay ñan chawpipi yawarnin patapi sunt'ishallarqaraj. Jinapi tukuynin chaynejta rejkuna sayaykukuspa Amasata anchata qhawajtinku, chay soldadoqa ayanta ñan kantuman ithirichispa, qhataykorqa uj qhatanawan. 13 Ñan kantuman ithirichejtintaj, Joabwan tukuy rejkunaqa cheqanta rerqanku Sebata qhatiykunankupaj. 14 Sebaqa pasarqa Israel tukuy ayllukunanejta Abel-bet-maacá chaynejkama. Chantá Bicrij tukuy ayllukunan tantakuspa, llajtaman yaykorqanku paypa qhepanta. 15 Joabpa soldadonkunataj Abel-bet-maacaman chayaspa, llajtaj perqanmanta qayllampi jallp'ata qolluykorqanku, chaymantapacha llajtaman maqanakoj yaykunankupaj, tukuynin runakunataj perqata urmachiyta munaspa, tukuy imata ruwasharqanku. 16 Jinallamanta uj yachaysapa warmi llajtaj perqanmantapacha qhaparimorqa: –Uyariwaychej. Uyariwaychej. Mañarikuykichej Joabman willaripunawaykichejta chimpamunawanta, imaraykuchus paywan parlarikuyta munani, nispa. 17 Joab qayllajtintaj, chay warmeqa taporqa: –Qanchu Joab kanki? nispa. Paytaj kuticherqa: –Noqa Joab kani, nispa. Chay warmitaj kuticherqa: –Uyariy, noqa warmi kamachiyki parlasusqayta. Joabtaj kuticherqa: –Uyarishayki, nispa. 18 Chantá chay warmeqa nerqa: –Unayqa nej kanku: «Pillapis imallatapis yachayta munajqa Abel llajyapi tapurikuchun,» nispa. Ajinamanta ima parlaytapis tukuchej kanku. 19 Llajtaykoqa tukuymanta aswan allin kawsakoj llajta, mana wasanchaj llajta. Jinapis qanqa phiriyta munashanki Israelpa maman jina kaj llajtata. ¿Imaraykutaj chinkachiyta munanki Tata Diospa herencian llajtatari? nispa. 20 Joabtaj kuticherqa: –Chaytaqa mana yuyallanipischu. Mana noqaqa yuyanichu kay llajtata chinkachiyta nitaj phiriyta. 21 Chayqa mana jinachu, manachayqa Efraínpa orqonmanta chay Sebá sutiyoj runaqa oqharikun jatun kamachej Davidpa contrampi. Pusamuwaychej pay sapallanta, noqataj kay llajtamanta ithiripusaj, nispa. Chay warmitaj Joabman kuticherqa: –Kay perqamantapacha umanta wijch'umusqayku, nispa. 22 Chay ratopacha chay warmeqa rerqa llajtapi tukuynin runakunata yachayninwan umachaj, Sebaj umantataj qholuspa, Joabman wijch'uykorqanku. Chaypacha Joabqa pututunta waqacherqa soldadokunaqa llajtamanta jataripunankupaj, sapa ujtaj riporqanku wasinkuman. Joabtajrí jatun kamachiwan parlaj Jerusalenman riporqa. 23 Joabqa tukuy Israel ayllumanta soldadokunata kamachinampaj churasqa karqa, Joiadaj churin Benaiastaj quereteokunata, jinataj peleteokuna soldadokunata kamachisharqa. 24 Adoramqa runakunata llank'achinampaj churasqa karqa. Jatun kamachejpa qhelqerintaj Ahiludpa churin Josafat karqa. 25 Sevapis qhelqerillataj karqa, Sadocwan Abiatarwantaj sacerdotes karqanku. 26 Jair llajtamanta Irataj Davidpa sacerdotellantaj karqa.
