2 SAMUEL 17

1Chay qhepata Ahitofelqa Absalonta nerqa: –Saqeway chunka iskayniyoj waranqa runakunata ajllanayta, kunan ch'isipacha Davidpa qhepanta llojsinaypaj. 2Pay llawch'iyasqa pisi kallpa kashajtin kaymanta jinalla chayaspa manchariykuchisaj, paywan kashaj runakunantaj ayqerikaponqanku. Wañuchisajtaj jatun kamachejllata. 3Chaymantataj chay tukuy runakunata qanwan allinyachisqayki; imaynatachus uj warmi qosawan allinyakun ajinata. Qanqa uj runaj wañunallanta mask'anki, tukuynin runakunapajqa mana ima llakiypis kanqachu, nispa. 4Ahitofelpa yuyaychasqanqa Absalonman, jinataj Israelitakunajpa kurajninkunamampis sumaj rijch'arqa . 5Chaywampis Absalonqa kamachillarqataj arquita Husaita wajyanankuta, imachus yuyasqanta ninampaj. 6Husai chayamojtintaj, Absalonqa payta nerqa: –Ahitofelqa kay jinata yuyan. ¿Ruwasunmanchu chayta, chayrí amachu? ¿Qan ima ninkitaj, niwayku ari? nispa. 7Husaitaj kuticherqa: –Kay kutipi Ahitofelpa yuyaychasqanqa mana walejchu. 8Qanqa yachanki tatayki, chay runakunan ima kallparara wapu kasqankuta, kunantaj imaynatachus onzamanta uñankunata qhechojtinku phiñarikun, jinatachari phiñas kashanku. Chay jawaqa tataykeqa maqanakuyman yachasqa, runakunanwan khuskataj mana uj ch'isitapis puñushanchu. 9Kunampis uj chhanka jusk'upichari pakakushan, chayrí may cheqanejpichus. Chay jawari ñawpaj kutipi runakunaykimanta wañurasqankuta uyariytawankama, wakinkunaqa yuyanqanku atipachikusqankuta. 10Aswan phiña león jina runakunapis sinch'ita iskayrayanqanku, imaraykuchus tukuy Israel ayllupi yachanku tatayki jina soldadokunapis wapu kasqankuta. 11Kunanqa yuyaychaykiman tukuynin israelitakunata Danmantapacha Beerseba llajtakama qanwan tantakunankuta, tukuy tantakuspaqa mama qocha kantupi t'iyu jina mana yupay atina kanqanku, qan kikiykitaj maqanakupi paykunata kamachiwaj. 12Jinamanta tataykiwanqa maqanakoj wakiykusunchej, maypichá tarpasun, chaypi. Imaynatachus chhulla pampaman urmamun ajinata paykunawan maqanakuj yaykusunchej; ajinata payta soldadonkunata ima tukuyninta wañuchisunchej. 13Sichus mayqen llajtapipis pakakunman chayqa, tukuy israelitakuna lasota apasqayku chay llajtaj perqanta uthuñispa tukuy rumikunanta qharastaspa wayq'oma junt'achisqayku, chaypi mana uj rumillapis puchunankama, nispa. 14Absalón, tukuy israelitakuna imaqa yuyarqanku Husaipa nisqanqa aswan allin kasqanta, Ahitofelpa yuyaychasqanmanta nisqaqa. Tata Diosqa nisqaña Ahitofelpa yuyasqanqa mana ruwakunanta, Absalonpa patanman llakiyta apachimunampaj. 15Jinapi Husaiqa sacerdote Sadocman, Abiatarman ima willarqa. Absalonman, jinataj Israelmanta kurajkunamampis Ahitófel imatachus yuyaychasqanta, jinallataj papis imatachus yuyaychasqanta ima. 16Jinamanta nerqa usqhayllata jatun kamachej Davidman willamunankuta. Ama chay ch'in pampaspi puñunanta, manachayqa Jordán mayuta chimpananta, payta jinataj soldadonkunata ama wañuchinankupaj . 17Jonatanwan, Ahimaaswanqa En-roguelpi kasharqanku, imaraykuchus llajtaman jaykushajtinku runa mana rikunanta munarqankuchu. Chantá uj warmi kamachi rispa, willamorqa paykunaman, chay ratopachataj paykunaqa jatun kamachej Davidman willaj kachaykukorqanku. 18Chaywampis uj waynuchu paykunata rikuspa, Absalonman willaykamorqa. Chanta Jonatanwan, Ahimaaswanqa usqhayta rispa, chayarqanku Bahurim llajtapi uj runaj wasinman chayarqanku, pakaykukorqankutaj patiompi kaj, pujyuman. 19Chay wasiyoj warmintaj pujyoj siminman uj mantawan qhataykuspa, chay patanman trigota churaykorqa. Manataj pipis repararqachu. 20Chantá Absalonpa runankuna chayaspa, chay warmita taporqanku: –¿Maypitaj kashanku Ahimaaswan, Jonatanwanri? nispa. Chay warmitaj kuticherqa: –Kayninta mayunejman rerqanku, nispa. Chaypacha Absalonpa runakunanqa mask'amorqanku, mana tarispataj Jerusalenman kutiporqanku. 21Chay runakuna ripusqankutawantaj, Ahimaaswan, Jonatanwanqa pujyumanta llojsiytawankama, usqhayta rispa Davidman willamorqanku: Usqhayta mayuta chimpaychej, imaraykuchus Ahitofelqa contraykichejpi chay jinata umachan, nispa. 22Chantá Davidqa tukuy runakunanwan usqhayta Jordán mayuta chimparqanku. Q'ayantin paqarintaj Jordán mayuta mana chimpaspaqa ni ujpis qhepakorqachu. 23Ahitofelqa Absolón yuyaychasqanta mana kasusqanta rikuspa, burronta sinchaykuytawan, llajtampi wasinman riporqa. Wasimpi tukuy kajta allinchaywan, sipirparikorqa. P'ampamorqankutaj ayanta tatampa covachanman. 24Davidqa Mahanaim llajtaman chayarqa, chaykamataj Absalonqa Jordán mayuta tukuynin soldadonkunawan chimparqa. 25Absalonqa soldadokuna kamachejta ismaelita Itraj churin Amasata churarqa, Pay Joabpa cuentanmanta kamachinampaj. Itraqa Nahaspa ususin Abigailwan casarakusqa, paypa Joabpa maman Seruiá ñañan karqa. 26Absalonqa Galaad jap'iypi israelitakunawan khuska jarakorqa. 27David Mahanaim llajtaman chayarqa chaypacha, Nahaspa churin Sobí payta taripaj llojsimorqa; pay karqa Amonpi Rabá llajtamanta. Jinallataj Lodebar llajtamanta Amielpa churin Maquir, chantá Galaadpi Rogelim llajtamanta Barzilaipis Davidta taripaj llojsimullarqankutaj. 28Paykuna apamorqanku phullukunata, yurukunata, mankakunata, jinataj trigota, cebadata, jak'uta, cebada jank'ata, jabaskunata, lentejakunata, 29abeja misk'ita, ñojñuta, waka quesota, oveja quesota ima.Chaykunata David jinataj paywan rejkuna mikhunankupaj, paykunaqa yuyasqanku: Ch'in pampamanta chayamuspaqa sayk'usqa, yarqhasqa, yakumanta ch'akisqataj chayamonqanku, nispa.

will be added

X\