2 SAMUEL 14

1Saruiaj churin Joabqa yacharqa jatun kamacheqa manchaytapuni Absalonta watukusqanta; 2chayrayku, Tecoa llajtamanta uj sumaj yuyaysapa warmita pusachimorqa. Nerqataj: «Llakiyniyoj warmiman tukuy, luto p'achatataj churakuy, amataj perfumewan jawikunkichu; piniyki wañusqanmanta may unayñapis llakisqa kashawas jina. 3Chaymantataj jatun kamachejpaman rispa, kay imatachus nisqayki, chay kikinta nimunki,» nispa. Joabtaj yachacherqa imatachus chay warmeqa jatun kamachejman ninanta. 4Chantá Tecoamanta warmeqa jatun kamachejpaman rispa, ñawpaqempi pampakama k'umuykuspa, nerqa: –Yanapariway ari, jatun kamachejniy, nispa. 5Jatun kamacheqa taporqa: –¿Imataj qhatirisunkiri? nispa. –Paytaj kuticherqa: Noqaqa, qosay wañupusqanrayku warmi sapa kani. 6Kay kamachiykejtaqa iskay churinkuna karqa. Paykunaqa campopi maqanakusqanku, mana pipis t'aqaj kajtintaj, ujnin kaj chay ujninta maqaspa wañurparichisqa. 7Kunantaj tukuy ayllukunay contraypi oqhariykukuspa, munanku pichus wawqenta wañuchejta jaywanayta, wañuchisqanmanta wañuchinankupaj, pay sapallan chayaqeta jap'inan kasqanrayku. Mana wawayoj qhepakunayqa mana imallachu paykunapajqa, qosay mana piniyoj qepakujtin, kay pachapi manaña sutinta pipis apaj kanqachu. 8Chantá jatun kamacheqa chay warmiman kuticherqa: –Ripullay wasiykiman; noqa qampa llakiyniykimanta yachasaj, nispa. 9Chay warmitajrí kuticherqa: –Jatun kamachejniy, sichus pipis juchachasqa kanqa chayqa, noqa aylluywan ima juchachasqa kasqayku; manataj qan jatun kamachejniychu nitaj kamachiyniykipis juchayojchu kanqa, nispa. 10Jatun kamachejtaj kuticherqa: –Pichus contraykipi imata ruwayta munajtaqwa, kayman pusamuwanki, manañataj ujtawan imanasonqachu, nispa. 11Chay warmirí nillarqataj: –Jatun kamachejniy, Tata Diosmanta mañay, ama aylluy astawan llakiyta yapanawanta vengakuspa, ujnin kaj wawaytawan wañuchispa. Jatun kamachejtaj, nerqa: –Tata Diospa sutinrayku jurani: Wawaykitaqa mana pipis imananqankuchu, nispa. 12Chay warmitaj nillarqapuni: –Jatun kamachejniy, mana jina kaspa uj ujsitutawan nirikusqayta uyariway, nispa. –Jatun kamachejta nerqa: –Parlallay, nispa. 13Chantá warmeqa nerqa: –Jatun kamachejniy, Diospa ayllumpa contrampi ¿imaraykutaj qan kay jinallatataj ruwayta munashankiri ? Chay nisqaykirayku qanllataj juchayoj rikhurinki, pichus wijch'usqa wawaykita mana kutimpunanta saqespa. 14Tukuypis wañunanchejpuni kashan; imaynatachus yaku pampaman jich'ajkojtin mana ujtawan oqharikuyta atikunñachu ajinata. Diosqa mana pitapis wañuchinchu, manachayqa pichus wijch'usqa kaj kutimunanpaj, imatapis ruwan. 15Wiraqochíy, ajinamanta noqa jamorqani kayta qanman nisoj runakuna manchachiwasqankurayku; chayraykumá kay kamachiyki parlaykusorqa: Ichapis jatun kamachejqa mañakusqayta uyariwanman, nispa. 16Jatun kamachejniy, uyariwanki chayqa, Diospa jallp'anmanta wawaytawan noqatawan chinkachiyta munajmanta waqaychawasqayku. 17Jatun kamachejniy, noqa suyashani, imatachus ninawaykita, sonqoy tiyaykunampaj. Qanqa Diospa angelnin jina, yachanki imachus allin, mana allin kasqantapis. Tata Diostaj qanwampuni kakuchun, nispa 18Chanta jatun kamacheqa kuticherqa: –Imatachus tapusqanta ama llullakusta cheqanta willaway, nispa. –Warmitaj kuticherqa: –Jatun kamachejniy, parlarillay, nispa. 19Jinataj jatun kamacheqa taporqa: –¿Manachu kay tukuy imataqa Joab umachaykusunki? nispa. Warmitaj kuticherqa: –Qan jatun kamachiyniyrayku jurani, chay nisqaykeqa cheqampuni kasqanta. Qampa yanapajniyki Joabpuni kachamuwarqa, payllataj yachachiwarqa kay tukuy imakunata qanman nisunayta. 20Chay tukuyta kamachiyki Joab ruwarqa mana allin kajta allinyachiyta munaspa. Chaywampis, qan jatun kamachejniy sumaj yachayniyoj kanki; Diospa angelnin jina tukuy imachus llajtanchejpi kashasqanta yachanki. 21Chaypacha jatun kamacheqa Joabta nerqa: –Ñapis imatachus ruwanayta niniña. Rispa, wayna Absalonta kutichimuy, nispa. 22Chantá Joabqa pampakama, k'umuykuspa, jatun kamachejta bendecirqa: –Jatun kamachejniy, kunan yachani qan, khuyawasqaykita, imaraykuchus nisusqayta ruwashanki, nispa. 23Jinamanta Joabqa, Guesur llajtaman rerqa Absalonta Jerusalenman pusamunampaj . 24Jatun kamachejtajrí kamacherqa Absalonqa wasinman cheqanta ripunanta. Chayrayku Absalonqa wasinman riporqa, manataj jatun kamachejpaman yaykorqaqchu. 25Absalonqa, chaki puntanmanta uma puntankama ima munay junt'asqa karqa, tukuynin Israel ayllu ukhupi pay jina alajitoqa, sumaj uyarisqa runa jina mana karqachu. 26Chujchanta sapa wata tukukuypi k'utukoj ancha jatun kasqanrayku. Chujchanqa iskay kilo kurajta pesaj. 27Absalonpataqa kinsa churinkuna tiyarqa, ususintaj ujlla karqa, Tamar sutiyoj, may alajitapuni karqa. 28Iskay watata Absalonqa Jerusalenpi tiyakorqa, manataj jatun kamachejta watukoj riyta atejchu. 29Chantá Absalonqa Joabta wajyacherqa paypa sutimpi jatun kamachejta watumunampaj. Joabtajrí mana munarqachu riyta. Uj kutitawampis Absalonqa nillarqataj jatun kamachejman rinanta, chay kutipipis Joabqa manallataj rerqachu. 30Chantá Absalonqa kamachinkunata nerqa: –Qhawaychej, Joabpa jallp'anqa noqaj jallp'aywan tinkuypi kashan, cebada chajrayoj. Rispa, cebadanman ninata jap'iykuchimuychej, nispa. Absalonpa kamachinkunantaj rispa, Joabpa cebada chajranman ninata jap'iykuchimorqanku. 31Chaymantami Joabqa Absalonpa wasinman rispa, payta taporqa: –¿Imaraykutaj kamachiykikuna chajrayman ninata jap'iykuchinkuri? nispa. 32Absalontaj kuticherqa: –Wajyachimorqayki kayman jamunaykita jatun kamachejman kachasunaypaj, niripunawaykipaj: ¿Imapajtaj Guesur llajtamanta kutichimuwarqanki? Noqamantaqa aswan walej kanman karqa chayllapi qhepakunay, nispa. Jatun kamachejwan tinkuytapuni munani; sichus imapi juchayoj kayman chayqa, wañuchiwachun, nispa. 33Chanta Joabqa jatun kamachejman rispa, Absalonpa nisqanta willamorqa, jatun kamachejtaj payta wajyacherqa. Absalonqa jatun kamachejpa ñawpaqenman yaykuspa pampakama k'umuykukorqa. Jatun kamachejtaj Absalonta much'aykorqa.

will be added

X\