2 SAMUEL 11

1Chay qhepan wata paray mi'ta, jatun kamachejkuna maqanakuman llojsij kanku, chay tiempopi, Davidqa maqanakuman kacharqa Joabta, yanapajninkunata, chantá tukuy soldadokunatawan. Paykunaqa amonitakunata maqanakupi atipaykorqanku, Rabá llajtatataj muyuykorqanku ajap'inakupaj. Davidtajri Jerusalenllapi qhepakorqa. 2Uj tardepirí, Davidqa puñusqanmanta jatarispa, kamachinan wasi altos patapi puriykachasharqa, chanta jinallamanta rikorqa uj k'achita warmita mayllakushajta. 3Chaypacha Davidqa, pichus chay warmi kasqanta tapojta kacharqa, chay tapumojkunataj nerqanku Eliampa ususin, hitita Uriaspa warmin Betsabé kasqanta. 4Chaypacha Davidqa kamacherqa chay warmita pusamunankuta. Chantá paywan puñuykorqa, chaymantataj warmeqa wasinman riporqa. Chay warmitaj chaypachallaraj killa yawarninmanta llimphuchakushasqa. 5Chantá chay warmi wijsallisqa rikhurispa, Davidman willacherqa: –Qampajmin onqoj kashani, nispa. 6Chayta uyarispa, Davidqa kamacherqa Joabman, hitita Uriasta kachamunanta paywan palarinampaj. Joabtaj Uriasta payman kachamorqa. 7Chayamojtintaj Davidqa taporqa, Joab jinataj soldadokunapis imaynachus kashasqankumanta, jinataj maqanaku imaynachus rishasqanta. 8Chaymantataj Uriasta kamacherqa wasinman rispa warmiykiwan puñukamuy. Kamachinan wasimanta Urías llojsejtinkamataj, jatun kamachejqa uj sumaj mikhuyta t'inkata jina payman apacherqa . 9Uriastajrí wasinman ripunantaqa, kamachina wasi punkupi chay ch'isi qhawaj soldadokunawan khuska puñorqa . 10Davidman willajtinku Urías wasinman mana ripusqanta, Davidqa payta taporqa: ¿Imaraykutaj wasiykiman mana puñoj ripurqankichuri? nispa. 11Chanta Uriasqa Davidman kuticherqa: –Tata Diospa arcan, Israelmanta jinataj Judamanta soldadokunapis ch'awramanta ruwasqa ramadas urallapi kashanku, jinallatataj Joabpis, kamachiykunapis q'ara pampallapi puñushanku. ¿Noqataj riymanchu kasqa wasiyman mikhoj, ujyaj, warmiywan puñukamojtaj? Qanrayku jurani: Mana chaytaqa ruwasajchu. 12Chantá Davidqa Uriasta kamacherqa: –Kunantawan qhepakuyraj, q'ayalla kachapusqayki, nispa. Ajinamanta Uriasqa Jerusalenpi q'ayantinkama qhepakorqa. 13Davidtaj mikhuyta jinataj ujyanata machaykuchinankama qorqa . Ch'isiyaykuytañataj Uriasqa llojsiporqa; chaywampis kamachina wasita qhawaj soldadokunawan puñukaporqa, manapunitaj wasinman rerqachu. 14Davidqa q'ayantin paqarin Joabman uj cartata ruwaspa, Uriaswan apacherqa. 15Chay cartapitaj nerqa: «Uriasta ñawpaj puntapi sinch'i maqanaku kashan, chayman churaychej, chantá sapanta saqerpariychej chaypi wañuchinankupaj,» nispa. 16Jinataj maqanakunankupaj chay llajtata muyuykojtinkoqa, Joabqa enemigonmanta aswan wapu soldadokuna maypichá kasharqanku, chayman Uriasta churarqa. 17Llajtata jark'ajkunamanta soldadokuna lojsimuytawan, Joabpa contrampi maqanakorqanku, chaypitaj wañorqanku wakin soldadokuna, chaykunawan khuskataj Uríaspis wañullarqataj. 18Chantá Joabqa Davidman tukuy imaynachus maqanakupi rishasqanta willacherqa. 19Chay kachanmantaj kay jinata yachaykucherqa: «Maypachachus jatun kamachejman maqanakumanta willaykojtiykikama, 20ichapis jatun kamachejqa phiñakuspa, tapusunkiman: ¿Imaraykutaj anchata llajtaman qayllaykorqankichejri? ¿Manachu yachankichej paykunaqa perqa patamanta tukuy imata choqamusqankuta? 21¿Pitaj Jerobaalpa churin Abimelecta wañucherqa? ¿Manachu uj warmilla perqa patamanta uj kutana rumita choqamuspa, Tebespi payta wañurparicherqari? ¿Imaraykutaj ari perqaman anchatapuni qayllakorqankichej? nispa chaypacha, qan kutichinki kay jinata: “Hitita Urías kamachiykipis wañullantaj,”» nispa. 22Chay kachaqa Davidman chayaspa, willarqa tukuy imakunatachus Joab kamacherqa willananta. 23Chay kachataj Davidta nerqa: –Chay llajtamanta llojsimoj soldadokuna noqaykuwan anchata maqanakorqanku; chaywampis noqaykoqa llajta punkukama ithiricherqayku. 24Chaypachataj perqa patamanta runakunaqa flechankuta soldadokunaqa contrankupi kacharimuspa, wakinta wañucherqanku; wañullantaj Urías hititapis. 25Davidtaj chay kachaman kuticherqa: –Niy Joabman ama chhikata llakikunanta; maqanakupeqa mana yachanchijchu mayqen wañunanta. Chayrayku llajtaj contrampi astawan sinch'ita maqanakuchun jap'inankama. Qantaj kallpachaykuy, nispa. 26Chantá Uriaspa warmenqa qosan wañupusqanta yachaytawan, lutulorqa. 27Chay lutukosqan pasajtinñari, Davidqa kamacherqa kamachinan wasiman pusamunankuta, paywantaj casaraykorqa. Chantá uj qhari wawata paqarichikorqa. Tata Diospajri Davidpa chay jina ruwasqanqa mana allinchu karqa.

will be added

X\