2 SAMUEL 10

1Mana ancha unayninmanchu amonitakunajpa jatun kamachejninku Nahas wañuporqa, paypa cuentanmantataj churin Hanún kamacherqa. 2Chaypacha Davidqa sonqompi nerqa: Noqaqa Nahaspa churin Hanunwan k'acha kasaj, imaynatachus tatan noqawan k'acha karqa, ajinata, nispa. Chayrayku yanapajninkunamanta wakinta kacharqa, tatan wañupusqanmanta Hanunta sonqochanankupaj. Davidpa kachasnin amonitakunajpa llajtankuman chayajtinkurí, 3chay amonitakunajpa kuraj kamachejninkuqa jatun kamachejninku Hanunta nerqanku: «Qan jatun kamachejniy, ¿yuyankichu David chay runakunanta kachamusqanta tataykej wañupusqanmanta qanta sonqochasunampaj? Payqa kachamun sumajta kay llajtata qhawaranankupaj, wateqanankupajtaj, chantá jamuspa llajtanchejta jap'inankupaj,» nispa. 4Chanta Hanunqa kamacherqa Davidpa kachasqankunata jap'inankuta, chanta sunkhankuta khuskanmanta k'uturpanakuta, p'achankunatapis siki patankunakama k'utunallakutaj, jinaspa kacharpayaporqa. 5Paykunaqa sinch'i p'enqasqa kasharqanku. Davidtaj chay yachaspa, kamachinkunata kacharqa: “Jericó llajtapi sunkhaykichej wiñanankama qhepakuychej, chaymantataj kutimpunkichej,” nispa. 6Amonitakunaqa yachakorqanku Davidqa paykunapaj phiñasqa kashasqanta. Chayrayku qolqewan mink'akorqanku iskay chunka waranqa soldadokunata Siriamanta, Bet-rehobpi kajkunamanta, chantá Sobapi kajkunamantawan. Mink'akullarqankutaj Maacamanta jatun kamachejpa waranqa soldadonkunata, Is-tobmantataj chunka iskayniyoj waranqata. 7Chayta yachaspa, Davidqa Joabta tukuynin soldadonkunatawan kacharqa. 8Amonitakunaqa llojsispa, kikin llajta yaykunapi maqanakunapaj wakichikorqanku. Chaykamataj arameo soldadokunaqa Sobamanta kajkuna, Rehobmanta kajkunapiwan, Is-tobmanta soldadokunawan, Maacamanta kajkuna soldadokunapiwan imaqa chay pampakunapi wakichikorqanku. 9Joabqa maypachachus ñawpajmanta jinataj qhepamantapis maqanakunankupaj muyuykusqankuta yachaspa, aswan sumachaj kaj soldadonkunata ajllaspa, arameokunawan maqanakunampajtaj wakichikorqa. 10Wakin soldadokunatataj wawqen Abisaipa kamachiyninman churarqa, amonitakunawan maqanakunampaj. 11Pay nerqa: «Sichus arameokuna noqata atipanayawanshakuman chayqa, jamuspa yanapawanki; sitajchus amonitakuna qanta atipanayashasunkuman chayqa, noqa jamuspa yanapasqayki. 12Kallpachakuy, suyuchejrayku, jinataj Diosninchejpa llajtankunarayku sinch'ita enemigonchejwan maqanakunachej. Tata Diostaj munasqanman jina ruwachun,» nispa. 13Joabqa, soldadonkunawan khuska arameokunawan maqanakoj rerqa, paykunataj Joabpa ñawpaqenta ayqerikaporqanku. 14Amonitakunataj arameokunamanta kaj soldadokuna ayqesqankuta rikuytawan, paykunapis Abisaipa ñawpaqenta ayqellarqankutaj, llajtankumantaj yaykurikaporqanku pakakunankupaj. Chantá Joabqa amonitakunawan manaña maqanakorqachu, Jerusalenmantaj kutiporqa. 15Arameokunaqa israelitakunawan atipachikusqankuta yachaspa, watejmanta tantakullarqankutaj. 16Hadad-ezerqa Éufrates mayu chimpapi kajkuna amareokunata wajyachimorqa, paykunataj Helamman jamorqanku. Hadad-ezerpa soldadonkunajpa kamachejninku Sobactaj nawpaqenkuta rerqa. 17Chay imakunata Davidman willajtinku, payqa tukuy israelitakunata tantaykorqa, Jordán mayuta chimpaspataj, Helamman chayarqa. Chaypitaj arameokunaqa Davidwan maqanakorqanku. 18Chay kutipipis arameokunaqa israelitakunajpa ñawpaqenkumanta ayqellarqankutaj. Chaypacha Davidqa tukuypi wañucherqa tawa chunka waranqa caballopi maqanakojkuna soldadokunata, jinallataj qanchis pachaj maqanakuna carretakunatapis phiriykullarqataj; chay jawaqa, arameo soldadokunajpa kuraj kamachejninku Sobac sutiyojtapis Davidqa chaypi wañuchillarqataj. 19Hadad-ezerta yanapajkuna jatun kamachejkunaqa israelitakunawan atipaykuchikusqankuta rikuspa, israelitakunawan allinyakorqanku, jinamanta israelitakunajpa kamachinkupi karqanku. Chaymantapachataj arameokunaqa amonitakunata yanapayta manchachikorqanku.

will be added

X\