2 PEDRO 3

1Munasqa hermanosníy, kaywanqa iskay cartastaña qankunaman apachimuykichej. Iskaynin cartaspi yuyarichishaykichej yachasqaykichej imasmanta, llimphu sonqowan imatapis yuyanaykichejta munaspa. 2Munani yuyarikunaykichejta Diospa ajllakusqan profetaspa unay nisqankumanta, Salvaj Señorninchejpa kamachisqasninmanta ima, mayqenkunatachus apóstoles kamachisorqachej, chaymanta. 3Ñawpajta kayta yachaychej: Qhepa p'unchaykunapi asipayajkuna jamonqanku, aychankoj sajra munayninman jina kawsaspa. 4Nenqankutaj: Maytaj Cristoj jamusaj nisqanri? Ñawpa tatasniyku wañusqankumantapacha kunankamaqa tukuy ima, qallariypi jina imaynachus karqa, pachallampuni kakushan, nispa. 5Paykunaqa yachashaspa, mana yachajman tukunku, qonqapunkutaj qallariypi cielopis, kay pachapis Diospa nisqannejta ruwasqa kasqankuta, maypachachus Diosqa kay pachata yaku ukhumanta rikhuricherqa chaypacha. 6Chay yakullawantaj chaypacha runasqa yakoj p'ampasqan chinkarqanku. 7Kunanqa Diospa chay nisqannejllatataj cielopis, kay pachapis ninapi q'olachisqa kanankupaj waqaychasqa kanku juicio p'unchaykama. Chaypachaqa Diosqa mana cheqan kajman jina kawsaj runasta juzgaspa, chinkarparichenqa. 8Munasqa hermanosníy, ama qonqaychejchu kayta: Señorpajqa uj p'unchay waranqa watas jina, waranqa watastaj uj p'unchay jinalla. 9Señorqa jamusaj nisqanta mana qonqanchu, imaynatachus wakin yuyanku qonqapusqanta, ajinata. Manachayqa Dios pacienciakun tukuy qankunapaj, manataj munanchu pipis juchanrayku chinkayman rinanta. Astawanqa Pay munan tukuy runas Diosman kutirikunankuta. 10Señorpa jamunan p'unchayqa chayamonqa uj suwa jina. Chaypachataj, cielopis manchayta t'ojyaspa chinkarenqa, tukuy kaj chhikataj ninawan q'olaykusqa kanqa. Kay pachapis, tukuy imasnintin kantumanta tukuchisqa kanqa. 11Ajinata tukuy ima nina larwaypi tukuchisqa kananta yachaspa, astawanraj juchamanta t'aqasqa, cheqan kajman jina kawsanaykichej tiyan. 12Ajinata Señorpa jamunan p'unchayta suyaspa, chay jamunanta aswan usqhayta chayachimunkichej. Chay p'unchaypi cieloqa nina larwaypi tukukonqa, tukuy imastaj chay sinch'i k'ajaypi unuyaponqanku. 13Noqanchejrí suyashanchej mosoj cielota, mosoj jallp'atawan, Dios ruwasaj nisqanman jina, maypichus cheqan kawsaylla kanqa, chayta. 14Chayrayku munasqa hermanosníy, chay imasta suyaspaqa, atisqaykichejta kallpakuychej Diospa ñawpaqempi mana juchayoj, mana k'amina, Paywan allimpi kawsakushaj tarisqa kanaykichejpaj. 15Chantá yuyarikuychej, Señorninchejpa paciencianqa runas salvasqa kanankupaj kasqanta. Ajinallatataj munasqa hermanonchej Pablopis qhelqamusorqachej, Dios payman yachayta qosqanman jina. 16Sapa carta qhelqasqampi chay imasmanta parlan. Chay qhelqasqasnimpitaj wakin imasqa mana usqhayta entiendenapaj jina kanku. Chay imasta pisi yachayniyoj, creeypi pisi kallpayoj runasqa q'ewinku, jinallatataj Diosmanta Qhelqasqapi waj imastapis, paykuna chinkachisqa kanankupaj. 17Chayrayku munasqa hermanosníy, chay imasta ñawpajmanta yachaspaña, allinta qhawakuychej. Pajtá chay sajrata ruwajkunawan pantayman apachikuwajchej, ajinamantataj sinch'i sayasqa kayniykichejmanta urmawajchej. 18Astawampis wiñaychej Diospa qhasilla k'acha yanapaynimpi, jinallataj Salvawajninchej Señor Jesucristota rejsiypiwan. Payqa may jatunchasqa kachun kunampis, wiñaypajpis. Ajina kachun.

will be added

X\