2 PEDRO 2

1Ñawpa tiempopi israelitas ukhupi llulla profetas rikhurerqanku. Ajinallatataj qankuna ukhupipis llullata yachachejkuna rikhurenqanku. Paykuna pakayllamanta, chinkayman apaj yachachiykunata paykunallamanta yachachenqanku, Tukuyta Kamachej Señorta qhesachaspa, pichus preciowan paykunata ranterqa, chayta. 2Ashkhastaj paykuna jina millayta kawsanqanku, chay millay kawsajkunaraykutaj runas sajrata rimanqanku cheqan kajpa contranta. 3Paykuna qolqemanta wañurisqa kaspa, qankunamanta qolqeykichejta ch'uskisonqachej wakichisqanku imaymana parlaykunawan. Paykunapajrí castigoqa unaymantaña wakichisqa kashan, chinkachisqa kanankutaj patallankupiña kashan. 4Diosqa chay wakin juchallikoj angelespa juchasninkuta mana pampacharqachu, astawanqa paykunata ukhu pachaman wijch'uykorqa, ukhu pachapi presochasqa kanankupaj juicio p'unchay chayamunankama. 5Ñawpa runaspa juchasninkutapis manallataj pampacharqachu, maypachachus mana cheqan kajman jina kawsajkunata chinkacherqa jatun musphay parawan, chaypacha. Manachayqa cheqan kajta willaj Noeta waqaycharqa waj qanchis runastawan khuskata. 6Jinallatataj Sodomapi, Gomorrapi tiyakoj runastapis chinkachisqa kanankupaj juchacharqa, ninawan paykunata ruphachispa ushphaman tukunankukama. Ajinamanta yachacherqa mana cheqan kajman jina tiyakojkuna imapichus tukukunankuta. 7Jinapis cheqan runa Lotta chay wañuymanta ayqecherqa, pichus sonqompi mayta llakikorqa chay millayta ruwajkunaj sajra ruwasqasninkumanta, chayta. 8Chay cheqan runaqa paykuna ukhupi tiyakuspa, sapa p'unchay sonqompi mayta llakikoj, chay may sajra ruwasqankuta rikuspa, uyarispataj. 9Ajinata Señorqa cheqan kajman jina kawsajkunata ñak'ariymantapis librayta yachan, yachallantaj sajra runasta juicio p'unchaypi castigasqa kanankupaj qhepachiyta. 10Astawantaj castiganqa pikunachus aychankoj sajra munayninman jina kawsanku, chaykunata. Paykunaqa kamachejkunata pisipaj qhawanku. Mana manchachikuyniyoj may kasqankuta yuyakuspa, mana manchachikunkuchu sajrata rimayta janaj pachapi atiyniyojkunapajpis. 11Angelesqa aswan kallpayoj, atiyniyojtaj kaspapis, mana juchachaspa sajrata rimankuchu janaj pachapi chay atiyniyojkunapaj Señorpa ñawpaqempi. 12Chay runasrí mana yachasqanku imasmanta sajrata parlanku. Paykunaqa k'ita animales jinalla wañuchisqa kanankupaj churasqa kanku, ajinallatataj chinkachisqapuni kanqanku. 13Sajrata ruwasqankumanta sajra kajllawantaj pagasqa kanqanku. Paykunaqa misk'ichikunku, sapa p'unchay tukuy runaj rikunanta millay imasta ruwaspa. Chaykunaqa qankunawan khuska jatun mikhunaykichejpi mikhuspa, tantakusqaykichejta ch'ichichanku, kusikunkutaj qankunata ch'awkiyasqankumanta. 14Ñawisninkoqa khuchichakuywan junt'a kanku, juchallikuywantaj mana sajsakunkuchu. Mana sinch'ita sayaj runasta, sonqonkuta suwaspa, juchaman aysanku; sonqonkupis sajra imasta moq'eyman yachasqa. Paykunaqa maldecisqa kanku. 15Cheqan ñanta saqespa, Beorpa churin Balaampa pantasqa ñanninta rishanku. Payqa sajra kaj ruwasqanmanta qolqeta maytapuni jap'iyta munarqa. 16Juchanraykutaj k'amichikorqa mana parlaj chajnana china burrowan. Chay burroqa runa jina parlaspa, chay mana yuyayniyoj profetata yuyayninman kuticherqa. 17Chay yachachejkunaqa mana yakuyoj pujyu jina kanku, sinch'i para wayraj apaykachasqan phuyu jinataj. Paykunapajqa aswan tuti laqhayay wiñaypaj wakichisqa kashan. 18Chay runasqa qhasi manakaj jatunchakuna imasta parlaspa, aychaj millay munayninwan wajkunaj sonqonkuta suwanku juchaman urmachinankupaj. Chay runasqa kunallanraj pantay kawsaypi tiyakojkuna ukhumanta ayqekushanku. 19Wajkunaman ninku kacharichisqa kanankuta, paykunatajrí millay kawsaypa wata runasnin kanku, imaraykuchus atipachikoj runaqa atipajnimpa wata runanman tukun. 20Paykunaqa Señor Jesucristo Salvawajninchejta rejsisqankurayku, kay pachaj ch'ichi kawsayninmanta ayqerqanku. Chantá sichus watejmanta chay ch'ichi kawsaywan ch'ipaykuchikuspa atipachikunku chayqa, paykunaj qhepa kayninkoqa aswan mana allin kanqa ñawpa kayninkumanta nisqaqa. 21Paykunapajqa aswan allin kanman karqa cheqan ñanta mana rejsinankoqa, chayta rejsispaña Diospa qosqan santo kamachisqanmanta qhepaman kutiripunankumantaqa. 22Cheqamanta paykunapeqa runaspa nisqanku junt'akun: Alqoqa lansasqanta watejmanta mikhukapullantaj; mayllasqa khuchipis watejmanta t'urupi sunt'imullantaj, nispa.

will be added

X\