1 Sunempi tiyakoj warmej wawanta Eliseo kawsaricherqa, chay warmiman Eliseoqa nisqa: “Tata Dios nin,kay suyupi manchay kananta, chayrayku qanwan, tukuy aylluykiwan ima kaymanta ripuychej, maymanchá munankichej, chayman,” nispa. 2 Chanta warmeqa tukuy ayllunwan ima, Diospa willajnin nisqanman jina, Filistea suyuaman riporqa, chaypitaj qanchis watata tiyakamorqa. 3 Qanchis watamanta jinataj, warmeqa Filistea suyumanta kutimporqa. Chayamuytawantaj, payqa jatun kamachejpaman rispa, wasinta, jallp'antawan kutichipunanta mañakorqa. 4 Jatuna kamachejqa Diosmanta willaj Eliseoj kamachin Guehaziwan parlasharqa: “Willaway ari, Eliseoj sumaj ruwasqanmanta,” nispa. 5 Chantá Guehazí jatun kamachejman willashajtin, Eliseo imaynatachus wañusqamantaña uj warmej wawanta kawsarichisqanmanta. Chayllaman chay warmi rikhurimorqa; jatun kamachejman chimpaspataj, mañakaporqa wasinta, jallp'antawan kutichipunankuta. Chantá Guehazí jatun kamachejta nerqa: –Wiraqochi kamachejníy, kaymin chay warmeqa, kaytaj Eliseoj kawsarichisqan chay wawapis, nispa. 6 Chanta jatun kamachejqa chay warmita taporqa, paytaj tukuy imata willarqa. Chaymantataj jatun kamachejqa ujnin kaj yanapajninta kamacherqa: Kay warmiman tukuy imanta, jallp'ampa poqosqanmanta valornintawan kutichichipuy, maypachachus riporqa, chaymantapacha kunankama, nispa. 7 Chay qhepatataj Eliseoqa Damascoman rerqa. Chaypacha Siria suyuta kamachej Ben-adad onqosqa kasharqa, paymantaj willarqanku: “Diospa willajnin kayman chayamun,” nispa. 8 Chantá jatun kamachejqa, kamachin Hazaelta nerqa: –T'inkata apariykukuspa, Diospa willajninwan tinkumuy, Tata Diostataj paynejta tapuripuway: “Kay onqoyniymanta qhaliyapusajchu chayrí manachu?” nispa. 9 Hazaelqa Damascomanta aswan sumachaj imakunata tawa chunka camellokunaman chajnaykukuspa, Eliseota taripaj rerqa. Eliseo kasharqa chayman chayaspataj, nerqa: Siria suyuta kamachej Ben-adadqa, qanta tatanta jina qhawasunki, pay qanta tapusunaypaj kachamuwan: Kay onqoyniymanta qhaliyapusajchu, chayrí manachu? nispa. 10 Eliseotaj nerqa: Qhaliyapullanki, nispa nimullay. Chaywampis Tata Diosqa ñapis willawanña, cheqamanta wañupunanta, nispa. 11 Chantá Diospa willajnenqa Hazaelta qhawallarqapuni, Hazaelpa uyan p'enqaymanta pukayarinankama. Jinataj Eliseoqa waqayta qallarerqa. 12 Hazaeltajrí payta taporqa: –Wiraqochíy, imaraykutaj waqashankiri? nispa. Paytaj kuticherqa: Israelitakunata mana allinta ruwaspa ñak'arichinaykita yachaniña: Perqawan muyurichisqa llajtankunata ninawan kanaykunki, waynakunata wañuchinki, wawankutapis ch'allparanki, onqoj warmikunaj wijsankutapis khallaranki, nispa. 13 Hazaeltajrí nerqa: ¿Kay kamachiyki, imataj kasqari? Noqaqa alqo jinalla kani. ¿Imaynata noqa chay jinata ruwaymanri? nispa. Eliseotaj nerqa: Ñapis Tata Diosqa rikuchiwanña, qanqa Siria suyupi jatun kamachej kanaykita, nispa. 14 Chanta Hazaelqa jatun kamachejninman kutiporqa. Reytaj taporqa: Ima nisunkitaj Eliseori? nispa. Paytaj kuticherqa: Qhaliyapullanqa nisunki, nispa. 15 Q'ayantenqa uj phulluta joq'ochaykuspa, chaywan Ben-adadpa uyanta qhataykorqa. Jinapitaj reyqa wañorqa, cuentampitaj Hazael jatun kamachej jina tiyaykorqa. 16 Ahabpa churin Joram Israel suyuta phishqa watataña kamachishajtin, Josafatpa churin Joram Juda suyupi kamachiyta qallarerqa. 17 Kamachiyta qallarishaspa, kinsa chunka iskayniyoj watayoj karqa, Jerusalenmantapacha pusaj watata kamacherqa. 18 Joranqa, Israel suyuta kamachejkuna jina, jinataj Ahabpa ayllun jina Diosta mana kasuspa purerqa, imaraykuchus Ahabpa ujnin ususin paypa warmin karqa. Joramqa manapuni Tata Diospa munayninman jinachu ruwarqa. 19 Chay tukuywampis Tata Diosqa mana Juda suyuta chinkachiyta munarqachu, kamachin Davidta munakusqanrayku. Tata Diosqa Davidman nisqa, mirayninmanta kamachinampaj tiyaykoj kanallantapuni. 20 Joram kamachishajtin, Edom suyumanta kajkuna jatun kamachejta churakuspa, Juda suyoj contrampi oqharikorqanku. 21 Chantá Joramqa tukuynin soldadonkunanwan, carretakunanwan ima Sairman rerqa. Edomitakunaqa ñapis paykunata muyuykusqankuña, Joramtajrí, carretapi maqanakoj soldadokunata kamachejkunata ima, tutan maqanakuspa, edomitakunajpa chawpinkumanta llojsikamporqanku. Chaywampis Jorampa soldadonkunan wasinkuman ayqellarqankutaj. 22 Ajinata edomitakunaqa Juda suyoj makinmanta kacharichikorqanku, kunankamataj ajina kashan. Chaypachallataj Libnamanta kajkunapis Juda suyoj makinmanta kacharichikorqanku. 23 Joram kamachishaspa tukuy ima ruwasqan, chantá waj ruwasqan ima, Juda suyuta jatun kamachejkuna ruwasqankumanta willaj qhelqapi qhelqasqa kashan . 24 Joram wañupojtintaj, ñawpa tatan Davidpa llajtampi p'amparqanku, paypa cuentanmantataj churin Ocozías kamacherqa. 25 Ahabpa churin Joram Israel suyuta chunka iskayniyoj watataña kamachishajtin, Jorampa churin Ocoziasqa Juda suyuta kamachiyta qallarerqa. 26 Ocozias kamachiyta qallarishaspa, iskay chunka iskayniyoj watayoj karqa, Jerusalen llajtamantapachataj uj watata kamacherqa. Paypa mamantaj Israel suyuta kamachej Omrijpa ususin Atalía sutiyoj karqa. 27 Ocoziasqa Ahabpa ayllunwan aylluchakusqanrayku, paykuna jinallataj ruwarqa. Chayrayku imatachus ruwasqanqa mana Tata Diospa munasqanman jinachu karqa. 28 Ocoziasqa Ahabpa churin Joramwan ujchakorqa Siria suyuta kamachej Hazaelpa contrampi maqanakoj rinankupaj. Siriamanta soldadokunatajrí Joramta wañuy patapi saqerparerqanku. 29 Chayrayku jatun kamachej Joramqa Jezreel llajtaman kutimorqa, k'iriykusqankumanta jampinankupaj. Ajina onqosqa kasqanrayku Juda suyuta kamachej Ocozias Jezreelman payta watukoj rerqa.
