2 REYES 7

1Chantá Eliseo nerqa: Tata Diospa nisqanta uyariychej: –Ajinata Tata Diosqa nin: “Q'aya p'unchay kunanta jina Samaria llajta punkupi, uj arroba jak'u uj qolqellapi vendekonqa, iskay arroba cebadapis uj qolqellapitaj,” nispa. 2Jatun kamachejpa yanapajnintajrí Diospa willajninta nerqa: –Sichus Tata Dios janaj pachata kicharinman chaypis, nisqaykeqa mana kanmanchu, nispa. Eliseotaj kuticherqa: –Qanqa kikin ñawiykiwan rikunki. Jinapis mana chaymanta mikhunkichu, nispa. 3Chaypachallataj Samaria llajtaj punkumpi tawa lepra onqoyniyoj runakuna kasharqanku. Chaykunataj paykunapura ninakorqanku: –Imaraykutaj noqanchej kaypi kashanchej wañupunata suyaspari? 4Sichus llajta ukhuman yaykusunman chayqa, yarqhaymanta wañusunchej; kay kikimpi qhepakusun chaypis, wañullasuntaj. Siriokunajpa jarankuman jaku rinachej. Sichus mana wañuchiwasun chayqa, kawsasunchej; wañuchiwasun chaypis, wañupusunchej, nispa. 5Jinataj ch'isiyajtinkama Siriamanta soldadokunajpa jarankuman rerqanku. Siriokunajpa jarankuman chayanankupajtaj, mana pipis chaypi kasqachu. 6Ajina karqa, imaraykuchus siriokunajpa jarankupi Tata Dios uyarichisqa ashkha soldadokunajpa purisqankuta jina, ashkha caballokunata, carretakunata ima. Chayta uyarispa siriokuna nerqanku: “Israelitakuna kachaykamushawanchej hititakunata, Egiptomanta kamachejkunatawan mink'akuspa noqanchejpa contranchejpi jamunankupaj,” nispa. 7Chayrayku paykunaqa ama wañuchisqa kanankupaj tutayaykamojtinkama ayqekusqanku, pachallampi saqerpayaspa toldonkuta, caballonkukunata, burronkukunata ima, . 8Leprawan onqosqakuna siriokunaj jarankuman chayaspa, uj toldoman yaykuspa mikhorqanku, ujyarqanku ima. Chaymantataj qolqeta, qorita, p'achakunatawan apakuspa, pakaykamorqanku. Chanta kutimuspa, uj toldomanñataj yaykorqanku, jinallataj tukuy kaj chhikata orqhospa pakaykamullarqankutaj. 9Chanta paykunapura ninakorqanku: –Manasina allintachu ruwashanchej. Kunan p'unchay sumaj kashan kayta willanapaj, noqanchejtaj ch'inlla kashanchej. Sichus sut'iyamunankama suyasun chayqa, noqanchej juchayoj rikhurisunchej. Jaku ari, jatun kamachejman willamunachej, nispa. 10Paykunataj llajtaman kutiytawan, llajta punkupi qhawaj soldadokunata wajyaspa, willarqanku: –Noqaykoqa siriokunajpa jarankuman rerqayku, chaypi mana pipis kasqachu. Runaj parlasqallampis mana uyarikunchu. Pachampi caballokunalla, burronakupiwan watasqa kashanku, jarankupis imaynachus karqa, jinapacha saqerpayasqa kashan, nispa. 11Chanta punkuta qhawajkunaqa chayta uyariytawan, qhaparispa jatun kamachejpa kamachinan wasipi kajkunaman willarqanku. 12Jatun kamachejtaj tutapacha jatarispa kamachejkunata nerqa: Noqa nisqaykichej siriokuna imatachus noqanchejta ruwayta munashasqankuta. Paykuna yachanku noqanchej mikhunamanta yarqhasqa kashasqanchejta. Chayrayku toldonkumanta llojsispa maynejllamanchá pakaykakamunku. Ichapis nishanku: “Paykuna llajtamanta llojsimojtinku, kawsashajllata jap'isunchej, chantataj llajtaman yaykusunchej,” nispa. 13Chantá ujnin kaj kamachej nerqa: –Kashankuraj chaykunamanta phishqa caballokunapi kachana, imachus kashasqanta yachanankupaj. Imajtinchus llajtapi qhepakojkunaqa wañullanqankutaj, imaynatachus ashkhaña wañunku, jinallatataj, nispa. 14Chanta jatun kamachejqa iskay carretata caballokunantinta siriokunajpa jarankuta qhawamunankupaj, kacharqa: Rispa, imachus kasqanta allinta qhawamuychej, nispa. 15Paykunataj qhawaspa, Jordán mayukama rerqanku, tukuy ñampitaj p'achata wijch'urasqata, waj imakunatapis t'akarasqata rikorqanku. Siriamanta soldadokuna usqhayta ayqesqankupi tukuy imankuta t'akarasqanku. Chanta kachasqakuna kutimuytawan, imatachus rikusqankuta jatun kamachejman willarqanku. 16Chayta uyarispa runakunaqa llajtamanta llojsimuspa, siriokuman rerqanku. Tukuy imatataj apakamporqanku. Chanta Tata Diospa nisqanman jina uj arroba jak'u uj qolqepi vendekorqa, iskay arroba cebadapis uj qolqellapitaj vendekorqa. 17Jatun kamachejqa paypa yanapajninta llajta punkuta qhawanampaj churarqa; runakunatajrí imata jina llojsispa, payta sarurparerqanku, punku yaykunapitaj pay wañorqa. Chaytaqa Diospa willajin sut'inchasqa, maypachachus jatun kamachej payta watukoj risqa chaypacha. 18Diospa willajnin jatun kamachejman sut'inchasqa: Samaria llajtaman yaykuna punkumpi q'aya kunanta jina uj arroba trigo jak'u uj qolqellapi vendekonqa, iskay arroba cebadapis uj qolqellapitaj, nispa. 19Eliseoj nisqanmantaj jatuna kamachejpa yanapajnenqa kay jinata kutichisqa: “Sichus Tata Dios janaj pacha wintanakunata kicharinman chayqa, qampa nisqaykiman jinachu kanman?” nispa. Eliseotaj kutichisqa: “Chaytaqa kunan ñawiykiwan rikunki. Chaywampis chaymanta mana mikhunkichu,” nispa. 20Jinapunitaj karqa: Runakuna k'iskinakuspa llajtaj punkumpi payta sarurparerqanku, jinapitaj wañuporqa.

will be added

X\