2 REYES 3

1Jatun kamachej Josafat, Juda suyuta chunka pusajniyoj watataña kamachishajtin, Ahabpa churin Joram Israel suyuta kamachiyta qallarerqa. Samaria llajtamanpacha Israel suyuta chunka iskayniyoj watata kamacherqa. 2Payqa mana Tata Diospa munasqanman jinachu purerqa. Mana tatan, maman jinapunichu ruwarqa, imaraykuchus payqa tatan rumimanta ruwachisqan Baalpa lantinta wijch'orqa.. 3Chaywampis Nabatpa churin Jeroboam imata ruwaspachus israelitakunata juchallicherqa, chaykunamanta manapuni t'aqakorqachu. 4Chaypacha Moab suyuta kamachej Mesaqa ashkha ovejakunayoj karqa. Payqa Israel suyuta kamachejman pachaj waranqa ovejakunata, pachaj waranqa sumaj millmasapa corderokunatawan impuestota jina pagaj. 5Maypachachus jatun kamachej Ahab wañuporqa chaypacha, Moab suyuta kamachejqa Israel suyuta kamachejpa contrampi oqharikorqa. 6Chayrayku jatun kamachej Joramqa Samariamanta llojsispa, Israelmanta tukuynin soldadokunata tantaykorqa. 7Chanta Juda suyuta kamachej Josafatman willajkunata kacharqa: “Moab suyuta kamachej noqaj contraypi oqharikun. Noqawan khuska Moabmanta jatun kamachejwan maqanakoj riwajchu?” nispa. Josafattaj kuticherqa: “Imarayku mana. Noqa, jinataj soldadoykuna, caballoykunapis qanta yanapanaykupaj kashayku,” nispa. 8Chanta Josafat tapullarqataj: “Maqanakoj mayqen ñantataj risunchejri?” nispa. Kutichispataj, Joram nerqa: “Edompa ch'in pampannejta risunchej,” nispa. 9Chantá Israelmanta, Judamanta, Edommanta, kinsantin kamachejkuna purirerqanku. Qanchis p'unchaytaña ch'in pampaman rej ñanninta muyuykuspa purisqankumantaña, soldadokunapaj chanta uywakunapaj ima yaku pisiykorqa. 10Chayrayku Israel suyuta kamachej nerqa: –Ay, Tata Diosqa kinsantin kamachejkunata Moabitakunaman jaywaykunawanchejpaj kayman pusamuwasqanchej? nispa. 11Josafattajrí nerqa: –Manachu kaypi Diosmanta willaj tiyan, paynejta Tata Diosta tapukunapaj? nispa. Chanta Israel suyuta kamachejpa soldadonkunata kamachejmanta ujnin nerqa: –Safatpa churin Eliseo kaypi kashan; payqa Eliaspa kamachin karqa, nispa. 12Chantá Josafat nerqa: Pay Diospa nisqanta willawasunchej, nispa. Chaypachapacha kinsantinku, Israel suyuta, Judata chanta, Edom suyuta kamachej ima Eliseoman rerqanku. 13Chantá Eliseo Israel suyuta kamachejta nerqa: –Noqa qanwan ni ima ruwanay kanchu? Riy ari tataykej willajninkunata, mamaykej willajninkunatawan tapukamuy, nispa. Israel suyuta kamachejtaj kuticherqa: –Mana, imaraykuchus Tata Diosmin kay kinsantiykuta tantaykuwayku moabitakunaman jaywaykunawaykupaj, nispa. 14Chantá Eliseo nerqa: Tukuy Atiyniyoj Tata Diospa sutinrayku jurani, pichus uyarishawan, chayrayku: Manachus Juda suyuta kamachej Josafatta jatumpaj qhawayman chayqa, mana qantaqa uyariykimanchu, nitaj qhawarillaykimampischu karqa. 15Jinapis arpata tocaj runata pusamuwaychej, nispa. Tocashajtintaj, Tata Dios Eliseoman jamorqa. 16Eliseotaj nerqa: Tata Diosqa ajinata nin: Kay vallepi ashkha qochakunata allaspa ruwaychej, 17imaraykuchus Tata Diosqa ajinata nin: Mana wayrata, nitaj paratapis rikunkichejchu; chaywampis kay valleqa yakuwan junt'a kanqa. Chaymantataj qankuna, wakaykichejkuna, jinataj tukuy uywaykichejkuna ima ujyankichej. 18Kayqa Tata Diospaj ni imapis kashanchu, imajtinchus Payqa moabitakunatapis atipaykuyta yanapasonqachej. 19Qankunaqa phatu perqawan muyuykuchisqa llajtakunata, sumaj llajtakunatawan raqayman tukuchinkichej, sumajta poqoj sach'ankutapis k'uturankichej, yaku pujyunkutapis ch'akichinkichej, tukuy sumaj poqoj jallp'ankutapis rumiwan junt'aykuchinkichej, nispa. 20Jinataj karqa, q'ayantin tutamanta, uywa ñak'asqata jaywana chayta jina, Edom chaynejmanta yaku chayamuspa, tukuy allasqankuman junt'aykorqa. 21Chaykamataj Moabitakunaqa, kinsantin kamachejkuna paykunawan maqanakoj jamushasqankuta yachaytawan, tukuy maqanakuyta atejkuna, waynakuna, machu runakunapis tantaykukorqanku. Chanta suyunkoj jap'iynimpi mojon karqa, chayman sayaykamorqanku. 22Chanta Moabitakunaqa tutamanta jatarispa qhawarqanku, rikoqankutaj pukayasqata, imaraykuchus tutamanta intej k'anchasqanwan yakoqa pukayarisqa. Chayta rikuspa yawarta rikushasqankuta yuyarqanku. 23Chanta ninakorqanku: “Jaqayqa yawar ari; kamachejkunachari paykunapura maqanakuspa wañuchinaykukunku. Jina chayqa, Moab llajtayojkuna, jakuchej paykunaj imankuta oqharikampusunchej, nispa. 24Israelitakunajpa jarankuman chayajtinkutajrí, israelitakuna oqharikuspa, ujllata moabitakunawan maqanakoj sayaykorqanku. Ayqekushajtinkutaj, israelitakunaqa qhatiykuspa, ashkhata wañucherqanku. 25Llajtakunata raqayman tukucherqanku; tukuynin sumaj jallp'akunaman rumita junt'aykucherqanku. Tukuynin yaku pujyukunatapis ch'akicherqanku; sumaj poqoj sach'akunatapis k'uturarqanku. Quir-haréset llajtallata mana thuñerqankuchu, chaywampis warak'awan maqanakojkuna muyuykuspa chay llajtata jap'ispa urmacherqanku. 26Moab suyuta kamachejqa maqanakupi atipaykushasqankuta rikukuspa, espadawan maqanakuyta yachajkunamanta qanchis pachaj soldadonkunata tantaykorqa, Edom suyuta kamachejpa contranta maqanakoj rinampaj, nitaj aterqachu. 27Chantá Moab suyuta kamachejqa, kuraj kaj churinta, paypa cuentampi kamachinan karqa, chayta wañuchiytawan perqa patapi ruphachispa diosninman jaywarqa. Chay jawa israelitakunaj contrankuta sinchita phiñakorqanku. Chayrayku chaymanta karunchakuspa, israelitakunaqa llajtankuman kutimporqanku.

will be added

X\