2 REYES 24

1Joacim kamachishajtin, Babilonia suyuta kamachej Nabucodonosor Judá suyoj contrampi maqanakoj jamorqa chanta Joacim atipaykorqa. Judá suyoqa kinsa watata kamachej Nabucodonosorpa makimpi karqa. Chay kinsa wata pasaytataj Josiasqa, kamachej Nabucodonosorpa contrampi oqharikorqa. 2Chantá Tata Diosqa Joacimpa contrampi suwa runakunata kachaykamorqa: Caldeokunamanta, siriokunamanta, moabitakunamanta, amonitakunamantawan. Chaykunata kachamorqa Juda suyuta tukuchinankupaj, Paymanta willajkunanejta nisqanman jina junt'akunampaj. 3Juda suyuta ajina llakiykuna qhatirerqa, Diospuni ajinata kananta nisqanrayku. Tata Diosqa Judá suyuta ñawpaqenmanta wijch'uyta munarqa, kamachej Manasés tukuy imaymanata ruwaspa juchallisqanrayku. 4Chayrayku Tata Diosqa Judá suyuta manapuni qhespichiyta munarqachu, imajtinchus Manasés, Jerusalenpi ashkha mana juchayojkunata wañuchichisqa. 5Joacim kamachishaspa tukuy ima ruwasqan, waj imakunata ruwasqampiwan Juda suyuta kamachejkunaj ruwasqankumanta willaj qhelqapi qhelqasqa kashan. 6Joacim wañupojtintaj, churin Joaquín paypa cuentanmanta kamacherqa. 7Chaymantapacha Egipto suyuta kamachejqa manaña ujtawampis llojsimorqachu, imaraykuchus Babilonia suyuta kamachejqa paypata kajta Egipto mayumantapacha Éufrates mayukama jap'ikapusqa. 8Joaquin chunka pusajniyoj watayoj kashaspa, Judá suyuta kamachiyta qallarerqa. Jerusalenmantapacha kinsa killallata kamacherqa. Mamanqa Jerusalenmanta Elnatanpa ususin Nehusta karqa. 9Payqa manapuni Tata Diospa munasqanman jinachu ruwarqa, manachayqa tatan jinallataj ruwarqa. 10Pay kamachishajtin, Babilonia suyuta kamachej Nabucodonosorpa soldadonkunan, Jerusalén llajtata jap'inankupaj muyuykorqanku. 11Jerusalen llajtata jap'inankupaj soldadokuna muyuykusqankutawan, kamachej Nabucodonosor chayamorqa. 12Chantá Juda suyuta kamachej Joaquim, mamanwan, kurajninkunanwan, soldadokunata kamachejkunampiwan Babilonia suyuta kamachejman k'umuykorqanku. Babilonia suyuta kamachejtaj, paykunata presocharqa. Chay karqa, Nabucodonor Babilonia suyuta pusaj watataña kamachishajtin. 13Nabucodonosorqa Tata Diospa Templonmanta, chanta jatun kamachejpa wasinmanta valorniyoj imakunata orqhospa apakaporqa. Jinallataj Israel suyuta kamachej Salomón Templopaj qorimanta tukuy ima ruwachisqanta p'akirarqa. Ajinata Tata Diospa nisqan junt'asqa karqa. 14Chantá Jerusalén llajtapi tukuy tiyakojkunata, kurajkunata, wapu soldadokunata, fierro takajkunata, tukuy imata ruwajkuna jap'ispa presota jina aparqa. Judá suyupeqa sinchi wajcha runakunallata saqerqa. 15Jinallataj Nabucodonosorqa Joaquinta, mamantawan, paypa warminkunantawan, soldadonkunata kamchejninkunantawan, chanta manchay respetowan qhawasqa runakunatawan preso jina apallarqataj Chay tukuyta Jerusalenmanta Babiloniaman aparqanku. 16Apallarqataj qanchis waranqa maqanakupaj wapu soldadokunata, tukuy imata ruwayta yachajkunamanta, fierrota takayta yachajkunamanta waranqata apallarqataj. Babilonia suyuta tukuyninkuta Babiloniaman aparqa. 17Chanta Nabucodonosorqa, Joaquinpa cuentanmanta sullk'a tatan Mataniasta Juda suyuta kamachinampaj churarqa. Mataniastaqa Sedequías, nispa suticharqa. 18Sedequias kamachiyta qallarishaspa iskay chunka ujniyoj watayoj karqa. Jerusalenmantapachataj chunka ujniyoj watata kamacherqa. Mamanqa Libnamanta Jeremiaspa ususin Hamutal karqa. 19Sedequiasqa manapuni Tata Diospa munasqanman jinachu ruwarqa, aswampis tatan Joacim jina ruwarqa. 20Chayrayku Tata Diosqa Jerusalenpa chanta Juda suyoj contrampi ima phiñakorqa, Paypa ñawpaqenmantataj paykunata wijch'orqa. Chantá Sedequiasqa Babilonia kamachejpa contrampi oqharikorqa.

will be added

X\