2 REYES 23

1Chantá jatun kamachejqa Judá suyumanta, Jerusalenmantawan tukuynin kurajkuna paywan tantakunankuta kamacherqa. 2Chaymantataj jatun kamachejqa, Judamanta runakunawan, Jerusalenpi tiyakojkunawan, Diosmanta willajkuwan, sacerdotekunawan, suyumanta tukuyninwan, wawakunapis, jinallataj machu runakunapis Tata Diospa Templonman rerqanku. Chaypitaj jatun kamachejqa paykunaj uyarinankuta, Templopi tarisqanku qhelqata ñawirerqa. 3Chantá jatun kamachejqa sayanta qayllapi sayaspa, Tata Diospa uyarinata tratota ruwarqa, Tukuy sonqomanta Tata Diosta kasuspa purinankuta, kamachisqanta junt'anankuta, nisqanta ruwanankuta ima. Tukuy runakunataj tratota junt'anankuta nerqanku. 4Chantá kamachej Josiasqa kuraj kaj sacerdote Hilciasta, paypa qhepampi kaj sacerdotekunata, punkuta qhawajkunata ima kamacherqa, Tata Diospa Templonmanta orqhonankuta Baalta, Aserata sutiyoj diosta chantá janaj pachapi ch'askakunata yupaychanapaj imachus ruwasqa karqa, chaykunata. Chaykunataqa Jerusalenmanta jawaman orqhospa, Cedrón Vallepi ruphaykucherqa, ushphastataj Betelman aparqa. 5Chantá Judá suyuta kamachejkuna, orqo pata altarkunapi inciensota q'oshñichinankupaj churasqanku sacerdotekunata wijch'orqa. Orqo patapi altarkunaqa, Judamanta tukuy llajtakunapi, Jerusalenpi, chanta muyuynimpi ima karqa. Jinallataj Baalman, intiman, killaman, ch'askakunaman, janaj pachapi kaj chhika lliphejkunaman ima inciensota q'oshñichej sacerdotekunatapis wijch'ullarqataj. 6Tata Diospa Templonmanta Asera lantitapis Jerusalenmanta jawaman, Cedrón wayq'oman wijch'ucherqa. Chaypitaj ushphaman tukunankama ruphaykucherqa, ushphatataj wajchaspa aya p'ampana cheqaman qhallirpayarqa. 7Tata Diospa Templompi lantita yupaychaspa, qharipura khuchichakojkunaj wasinkutapis urmacherqa. Chaykunapi warmikunaqa Asera lantipaj p'achakunata awaj kanku. 8Tukuynin Judá suyumanta sacerdotekunata wajyacherqa. Chantá Gueba llajtamantapacha Beerseba llajtakama tukuynin orqo patapi altarkunata millachikunaman tukucherqa, maykunapichus sacerdotekuna inciensota q'oshñichej kanku, chaykunata. Urmachillarqataj llajtata kamachej Josuejpa punkun chaynejpi, llajtaman yaykuna lloq'ennejpi kasharqanku kaj altarkunata. 9Orqo pata altarkunapi sirvij sacerdotekunaqa, Jerusalenpi Tata Diospa altarninman mana riyta aterqankuchu; chaywampis sacerdote masinkunawan mana levadurayoj t'antata mikhullaj kanku. 10Jinallatataj Josiasqa Ben-hinom Vallepi ruphachina cheqata millachikunaman tukuchillarqataj, amaña pipis qhari wawanta, chayrí warmi wawanta chaypi Molocman ruphachispa jaywanampaj. 11Juda suyuta kamachejkuna intita yupaychanapaj t'aqasqanku caballokunatapis chinkachillarqataj. Chaykunaqa Tata Diospa Templonman yaykunapi karqanku. Chaykunataj Natán-melecpa wasin chaynejpi jallch'asqa karqanku. Jinallataj jatun kamachej Josiasqa intej carretankunantapis ninaman enqhaykorqa. 12Payqa Judá suyuta kamachej Ahazpa wasin patapi altarkunatapis urmacherqa. Tata Diospa Templompa iskaynin pationkunampi, Manasespa altarkuna ruwasqantapis ñut'uman tukuchispa, Cedrón wayq'oman wijch'uchimorqa. 13Ajinallatataj kamachej Josiasqa Jerusalén chimpa orqo patapi altarkunata millachikunaman tukucherqa. Olivoyoj Orqoj pañannejpi kaj altarkunapis millachikunaman tukuchillarqataj. Chaykunata jatun kamachej ruwachisqa sidoniokunajpa millachikuna lantinku Astoretpaj, moabitakunajpa millachikuna lantinku Quemospaj, Amonpa millay lantinku Milcompajwan, chaykunata. 14Chay lantikunata jatun kamachej p'akirarqa, Aseraj lantinta urmacherqa, maypichus karqanku, chayman jinataj runa tulluta junt'aykucherqa. 15Betelpi karqa, chay altartapis ajinallatataj ruwarqa; Nabatpa churin Jeroboampa ruwasqan altarta, orqo patapi karqa, chaytawan phirispa ninawan ruphaykucherqa. Chaykunawan israelitakunata juchallicherqa. Jinallataj Asera diospa lantintapis ruphachillarqataj. 16Josias Betelmanta kutirimushaspa, orqo patapi covachakunata rikorqa. Chayman runata kachaspa, runa tulluta orqhochimorqa, altarkuna ch'ichipaj qhawasqa kanampaj chay patapi runa tulluta ruphacherqa. Ajinata Diospa willajnimpa sut'inchasqan junt'akorqa. 17Chantá Josias taporqa: –Rikushani chay, pejpa covachantajri? nispa. Llajtayojkunataj kuticherqanku: –Kay covachaqa, Diospa willajnin Judamanta jamorqa, chaypachata. Betelpi altar patapi imatachus ruwasqaykita, pay sut'incharqaña, nispa. 18Chantá Josias kamacherqa: –Saqellaychej, ama Diospa willajnimpa tullunkunanta t'ojpiychejchu, nispa. Ajinapi chay tullunkunata, jinataj Samariamanta jamoj Diospa willajnimpa tullunkunantapis waqaycharqanku. 19Jinallataj Josiasqa Samariapi, chantá tukuynin llajtakunapi, orqo patapi kaj altarkunata thuñillarqataj. Imaynatachus Betelpi altarkunata ruwarqa, ajinallatataj thuñerqa. Israel suyuta kamachejkuna waj diosta yupaychana artarkunata ruwaspa Diosta phiñachisqanku. 20Chantá orqo patapi altarkunamanta sacerdotekunata chay altarkunallapitaj wañuchicherqa. Chay altarkuna patallapitaj runa tullutapis ruphaykucherqa. Chaymantataj Jerusalenman kutiporqa. 21Chantá jatun kamachej tukuy israelitakunata kamacherqa: “Tata Diosniykichejpa sutimpi Pascua raymita ruwaychej, kay trato ruwasqa qhelqapi nisqanman jina,” nispa. 22Israel suyuta juezkuna kamacherqanku, chaymantapacha mana ujtapis kay jina Pascuata ruwasqankuchu, ni Israel suyuta kamachejkuna kamachishajtinku, nitaj Judá suyuta kamachejkuna kamachishajtinkupis. 23Jatun kamachej Josías chunka pusajniyoj watataña kamachishajtin, Jerusalenpi Tata Diospa sutimpi Pascua raymita ruwarqanku. 24Ajinallatataj Josiasqa layqakunata, aysirikunata wijch'urqa. Jinallataj Judá suyupi, Jerusalenpiwan wasi lantikunata, tukuy imaymana millay yupaychanakunatawan tukuyninta chinkacherqa, Diospa Templompi kuraj kaj sacerdote Hilcías tarisqan qhelqapi nisqanta junt'anampaj. 25Mana ujpis ñawpajta pay jina karqachu, Tata Diosman tukuy sonqonwan, tukuy almanwan, tukuy kallpanwan ima kutirikojqa. Josiasqa Moisespa tukuy kamachisqanta junt'arqa. 26Chay tukuywampis, Tata Diosqa Judá suyupaj phiñasqallapuni kasharqa, jatun kamachej Manasés mana allinta ruwasqanwan Payta phiñachisqanrayku. 27Chayrayku Tata Diosqa nerqa: “Judá suyumanta kajkunata ñawpaqeymanta wijch'usajpuni, imaynatachus israelitakunata wijch'orqani, ajinata. Ajllakusqay Jerusalén llajtatapis qhesachasaj, jinallataj templotapis qhesachasaj. Noqa nerqani, kay wasipi sutiy yupaychasqa kananta chayta,” nispa. 28Josías kamachishaspa tukuy ima ruwan, waj imakunata ruwasqampiwan Judá suyuta kamachejkunaj ruwasqankumanta willaj qhelqapi qhelqasqa kashan. 29Josias kamachishajtin chaypachata, Egipto suyuta kamachej Faraón Necao Éufrates mayu qayllaman Asiria suyuta kamachejta yanaparej llojsimorqa. Jatun kamachej Josiastajrí paywan maqanakoj rerqa. Necaotaj Josiasta rikuspa Meguidopi wañucherqa. 30Soldadonkunanta kamachejkunataj jina wañusqata Meguidomantapacha Jerusalenman carretapi aparqanku, chaypitaj kamachejkunaj covachankupi p'ampaykorqanku. Judá suyumanta kajkunataj Josiaspa churin Joacazta jawispa tatampa cuentanmanta kamachinampaj tiyaykucherqanku. 31Joacaz kamachiyta qallarishaspa, iskay chunka kinsayoj watayoj karqa, Jerusalenmantapachataj kinsa killallata kamacherqa. Mamanqa Libnamanta Jeremiaspa ususin Hamutal karqa. 32Paytajrí ñawpa tatankunan jina, manapuni Tata Diospa munasqanman jinachu ruwarqa. 33Chantá Faraón Necaoqa Hamat jap'iypi, Ribla llajtapi Josiasta presota jap'erqa, amaña Jerusalenpi kamachinampaj. Kamachillarqataj Judá suyumanta kajkuna impuestota paganankuta kinsa waranqa kinsa pachajniyoj kilo qolqeta, kinsa chunka kinsayoj kilo qoritawan. 34Chay jawataj Faraón Necaoqa Josiaspa churin Eliaquimta Joacazpa cuentanmanta kamachejta churarqa, sutintataj wajta suticharqa: Joacim, nispa. Joacaztataj Egiptoman aparqa, jaqaypitaj wañuporqa. 35Joacimqa qolqeta, qoritawan Faraón nisqanman jina pagarqa. Chayta junt'anampajtaj jallp'ata tasacherqa, chayman jina runamanta qolqeta, qoritawan orqhonampaj, sapa ujmanta jallp'anman jina, Faraón Necaoman qonampaj. 36Joacim kamachiyta qallarishaspa, iskay chunka phishqayoj watayoj karqa. Jerusalenmantapachataj chunka ujniyoj watata kamacherqa. Mamanqa Rumamanta Pedaiaspa ususin Zebuda karqa. 37Joacimqa manapuni Tata Diospa munasqanman jinachu ruwarqa, payqa ñawpa tatankunan jinallataj ruwarqa.

will be added

X\