1 Josias kamachiyta qallarishaspa, pusaj watayojllaraj karqa, Jerusalenmantapachataj kinsa chunka ujniyoj watata kamacherqa. Mamanqa Boscat llajtamanta Adaíaj ususin Jedidá karqa. 2 Josiasqa Tata Diospa munasqanman jina cheqanta ruwarqa, ñawpa tatan Davidpa ruwasqanta ruwaspa purerqa, mana lloq'eman, nitaj pañaman laduyaspa. 3 Josías chunka pusajniyoj watataña kamachishaspa, Mesulampa allchhin Asaliajpa churin kamachejpa qhelqerin Safanta Tata Diospa Templonman kachaspa, nerqa: 4 –Kuraj kaj sacerdote Hilciasman rerqoy, ninkitaj: Runakuna Tata Diospa Templonman qolqe apamusqankuta, punku qhawajkuna jap'isqanku chay qolqeta oqharimunanta. 5 chantá Tata Diospa Templonta allinchachejkunaman qochun, paykuna Templota allinchaspa llank'ajkunaman paganankupaj. 6 k'aspi llajllajkunaman, albañilkunaman, waj imakunata ruwajkunaman ima. Jinallataj Tata Diospa Templonta allinchanankupaj kurkuta, ch'eqosqa rumitawan chay qolqewan rantichunku. 7 Chay qolqemanta amataj paykunamanta cuentata mañachunchu, imaraykuchus paykunaqa allin sonqoyoj runakuna kanku, nispa. 8 Chantá kuraj kaj sacerdote Hilciasqa qhelqeri Safanman nerqa: Tata Diospa Templompi Diospa kamachiyninmanta qhelqata tarini, nispa. Hilciastaj Safanman jaywarqa, paytaj ñawirerqa. 9 Qhelqeri Safantaj rispa, tukuy imata ruwasqanmanta jatun kamachejman willarqa: –Kamachiykikunaqa Tata Diospa Templompi tukuynin qolqe tantasqankuta, Templota allinchajkunaman jaywankuña, nispa. 10 Chantá qhelqeri Safanqa kamachejman willallarqataj: Kuraj kaj sacerdote Hilcías kay qhelqata jaywawarqa, nispa. Chantá Safanqa jatun kamachejpa uyarinanta chay qhelqata ñawirerqa. 11 Jinapi chay qhelqamanta ñawirisqanta uyarispa, jatun kamachejqa p'achanta llik'irakorqa. 12 Chanta chaypachapachita jatun kamachejqa, sacerdote Hilciasman, Safanpa churin Ahicanman, Micaiaspa churin Acborman, qhelqeri Safanman, kamachin Asaiasmanwan kay jinata kamacherqa: 13 –Rispa, Tata Diosta tapuriychej noqarayku, runakunarayku chanta tukuynin Judá suyurayku ima, kay tarisqa qhelqapi imatachus nisqanmanta. Imaraykuchus Tata Diosqa noqanchejpa contranchejpi sinch'i phiñasqa kashan. Ñawpa tatanchejkunaqa manamin kay qhelqapi imatachus nisqanta kasuta ruwarqankuchu, chayman jina ruwanankupaj, nispa. 14 Chantá sacerdote Hilciasqa Ahicamwan, Acborwan, Safanwan, Asaiaswan ima, Diospa willajnin Hulda sutiyoj warmita watukoj rerqanku. Payqa Salumpa warmin karqa, Salumtaj Ticvaj churin karqa, Harhaspa allchhintaj. Harhasqa Diospa Templompi p'achakunata jallch'anampaj churasqa karqa. Huldaqa Jerusalenpi, mosoj wasikuna tiyan, chaynejpi tiyakorqa. Chantá paywan parlarqanku. 15 Huldataj paykunaman nerqa: –Israelitakunajpa Tata Diosnin kay jinata nin: Rispa, kachamusoj runaman kay jinata willamuychej: 16 Ajinata Tata Diosqa nin: Judá suyuta kamachej tukuy imatachus qhelqapi ñawirerqa, chay tukuynin llakiyta kay llajtaman, jinataj kaypi tiyakojkunaman apachimusaj. 17 Paykunaqa Noqata qhesachawaspa, waj dioskunaman inciensota q'oshñichinku; tukuy imaymanata ruwaspataj Noqata phiñachiwanku. Phiñakuyneyqa kaypi tiyakojkunaj contrampi k'ajarenqa, manataj thasnusqachu kanqa. 18 Judá suyuta kamachej, Diosta tapojta kachamusojman, kay jinata ninkichej: Israelitakunaj Tata Diosnin ajinata nin: Kay qhelqapi imatachus nisqayta uyarinaykipaj sonqota churasqaykirayku, 19 sonqoykita wawayachispa ñawpaqeypi k'umuykusqaykirayku, chanta p'achaykita llik'irakuspa waqasqaykirayku, Noqapis uyariyki, nispa Tata Diosqa nisunki. 20 Chayrayku kawsanaykikamaqa kay llajtata sinchi llakiywan ñak'arichisqayta mana rikunkichu, nispa. Paykunataj kutispa jatun kamachejman kikinta willamorqanku.
