1 Manases kamachiyta qallarishaspa, chunka iskayniyoj watayoj karqa. Jerusalen llajtamantapacha phishqa chunka phishqayoj watata kamacherqa, mamantaj Hepsiba sutiyoj karqa. 2 Payqa manapuni Diospa munasqanman jinachu ruwarqa, imajtinchus israelitakunaj ñawpaqenkumanta Dios wijch'orqa, chay runakunaj ruwasqankuta jinallataj millayta ruwarqa. 3 Tatan Ezequías orqokuna patapi waj diosta yupaychana altarkunata thuñisqanta, watej ruwachillarqataj. Baal sutiyoj diospaj altarkunata ruwarqa, jinallataj jatun kamachej Ahas jina,Asera lantita ruwallarqataj. Jinataj janaj pachapi kaj chhika ch'askakunaman qonqorikuspa, yupaycharqa. 4 Manasesqa Tata Diospa Templompipis altarkunata ruwachillarqataj. Chay templomanta Tata Dios nisqa: Noqaqa Jerusalenpi llajtapi yupaychasqa kasaj, nispa. 5 Diospa Templompa iskaynin pationkunampipis janaj pachapi tukuy ch'askakunapaj altarkunata ruwacherqa. 6 Churintapis ninapi ruphachispa dioskunanman jaywarqa. Sajra espiritukunata wajyanaman qokorqa, jinallataj suerteta qhawayman, aysiriman, layqerioman ima. Ajinata Tata Diospa rikunanta millaytapuni ruwasqanwan, Diosta sinch'ita phiñacherqa. 7 Asera sutiyoj diospa lantinta ruwaspa, Tata Diospa Templompi sayaykucherqa. Chay wasimanta Tata Diosqa Davidman, chanta churin Salomonman nisqa: Kay Templopi sutiy wiñaypaj yupaychasqallapuni kanqa, imaraykuchus tukuynin Israel ayllumanta Jerusalenta ajllakuni. 8 Ñawpa tatankuman qosqay jallp'amanta, Israel aylluyta manaña wijch'usajchu, sichus paykuna tukuy kamachisqayta, kamachiy Moisespa kamachisqantawan kasonqanku chayqa, nispa. 9 Paykunarí mana uyarikorqankuchu. Manasesqa israelitakunata astawan millayta ruwaspa purinaman apaykorqa, Tata Diosqa israelitakunajpa ñawpaqenkumanta waj llajtayojkunata wijch'orqa, chaykunmantapis astawanraj. 10 Chayrayku Tata Diosqa paymanta willajkunanejta israelitakunaman nerqa: 11 Judamanta kamachej Manasesqa may jina millaytapuni ruwarqa. Paymanta ñawpajta amorreokuna karqanku, chaykunamantapis astawan millaytapuni ruwarqa. Judá suyumanta kajkunata lanti ruwasqanta yupaychachispa juchallicherqa. 12 Chayrayku Noqa Israel suyoj Tata Diosnenqa nini: Kunanmin Jerusalenta chanta Judá suyutapis sinch'ita ñak'arinaman churasaj. Chayta pillapis uyarejtenqa, t'ukuspa titipacha kanqa. 13 Jerusalenta Samariata jina, jinataj Ahaspa ayllunta jina ñak'arichisaj. Imaynatachus kharka chuwata khituraspa, mayllaspataj k'umpunchej, ajinata llimphuta ruwasaj. 14 Aylluymanta kawsashaj qhepajkunata saqerparisaj; enemigonkojpa makinkumantaj jaywaykusaj, paykunata suwanankupaj, q'arallata mana imayoj sayachinankupaj. 15 Chayta ruwasaj Noqaj ñawpaqeypi tukuy imaymana millayta ruwasqankuwan anchataña phiñachiwasqankurayku, ñawpa tatankukuna Egiptomanta llojsimusqankumantapacha kunankama, nispa. 16 Chay jawa Manasesqa ashkha mana juchayojkunata wañuchicherqa, Jerusalenpi yawar mayu purinankama. Chayqa wajlla karqa Tata Diospa ñawpaqempi, Juda suyumanta kajkunata imata ruwaspachus juchallicherqa, chaymanta nisqaqa. 17 Manasés kamachishaspa tukuy ima ruwasqan, waj imakunata ruwasqan, jinataj juchallisqan imaqa, Judá suyuta kamachejkunaj ruwasqankumanta willaj qhelqapi qhelqasqa kashan. 18 Manasés wañupojtintaj, wasimpi huertan ukhupi p'amparqanku, Uza sutiyoj huertampi. Cuentanmantataj churin Amón kamacherqa. 19 Amonqa kamachiyta qallarishaspa iskay chunka iskayniyoj watayoj karqa. Jerusalenpitaj iskay watata kamacherqa; mamanqa Jotbamanta Haruzpa ususin Mesulamet karqa. 20 Imaynatachus tatan Manasés ruwarqa, ajinallatataj Amonpis mana Tata Diospa munasqanman jinachu ruwarqa. 21 Tatampa ruwasqanta jina paypis ruwallarqataj; chayrayku tatampa yupaychasqan lankikunata paypis yupaychallarqataj, chaykunamantaj qonqorikorqa. 22 Ñawpa tatankuknampa Tata Diosninkuta yupaychayta saqerparispa, mana Tata Diospa munasqanta ruwaspachu purerqa. 23 Uj kuti yanapajkunallantaj paypa contrampi oqharikuspa, jatun kamachej Amonta kamachinan wasipi wañucherqanku. 24 Chantá Judá suyumanta kajkunaqa jatun kamachej Amonta wañuchejkunata tukuyninkuta wañucherqanku, cuentanmantataj churin Josiasta jatun kamachejta jina tiyaykucherqanku. 25 Amón kamachishaspa tukuy ima ruwasqan, jinataj waj imakunata ruwasqampiwan Judá suyuta kamachejkunaj ruwasqankumanta willaj qhelqapi qhelqasqa kashan. 26 Chantá Amonpa ayanta Uza nisqa huertapi p'amparqanku, cuentanmantataj churin Josías kamacherqa.
