2 REYES 18

1Elajpa churin Oseas Israel suyuta kinsa watataña kamachishajtin, Ahazpa churin Ezequias Juda suyuta kamachiyta qallarerqa. 2Kamachiyta qallarishaspa, iskay chunka phishqayoj watayoj karqa, Jerusalenmantapachataj iskay chunka jisq'onniyoj watata kamacherqa. Mamanqa Zacariaspa ususin, Abi karqa. 3Ezequiasqa Tata Diospa munasqanman jina cheqanta ruwarqa, imaynatachus ñawpa tatan David ruwarqa, ajinata. 4Payqa orqo patapi waj dioskunata yupaychana altarkunata thuñerqa, rumimanta lantikunata p'akerqa, k'ullumanta ruwasqa lantikunapis llant'arparerqa. Jinallataj Moisespa broncemanta ruwasqan kataritapis p'akillarqataj, imajtinchus israelitakunaqa chay katarita diosta jina qhawaspa inciensota q'oshñicherqanku. Jinataj broncemanta katarita Nehustán, nispa suticharqanku. 5Ezequiasqa Israel suyoj Tata Diosninmanta jap'ikorqa. Judá suyuta tukuy kamachejkunamanta mana ujwampis pay jinaqa karqachu, ni qhepata, nitaj ñawpajtapis. 6Ezequiasqa Tata Diosta kasuspapuni purerqa, manataj Paymanta karunchakorqachu. Payqa Tata Dios Moisesman qosqan kamachiykunata tukuyninta kasorqa. 7Tata Diostaj paywampuni karqa; mayllamampis rejtin, allimpuni rerqa. Ezequiasqa Asiria suyuta kamachejpa contrampi oqharikorqa, manañataj payta kasorqachu. 8Jinallataj filisteokunawan maqanakuspa, Gaza llajtapi chanta chay llajtaj mojonnin chaypi atipaykorqa. Chanta qhawana torrenkunata, phatu perqawan muyuykuchisqa llajtakunata thuñiykorqa. 9Ezequías tawa watataña kamachishajtin, Elajpa churin Oseaspis Israel suyuta qanchis watataña kamachishajtin, Asiria suyuta kamachej Salmanasar Samaria contrampi rispa, soldadonkunanwan muyuykorqa. 10Kinsa watapi llajtata jap'erqanku; chay karqa Ezequías sojta watataña kamachishajtin, Israel suyuta kamachej Oseaspis jisq'on watataña kamachishajtin. 11Chantá Asiria suyuta kamachejqa, israelitakunata presota jina Asiria suyuman aparqa, chaypitaj paykunata Halahman, Gozán Mayu kantupi Haborman, Media llajtayojkunajpa llajtankuman ima, churarqa. 12Israelitakunawan chay karqa Tata Diosninkoj simi nisqanta mana kasusqankurayku, aswampis Paypa trato ruwasqanta p'akisqankurayku. Imatachus Tata Diospa kamachin Moisés paykunaman kamachisqanta mana uyarikorqankuchu, nitaj ruwarqankuchu. 13Ezequias Judá suyuta chunka tawayoj watataña kamachishajtin, Asiria suyuta kamachej Senaquerib Judá suyumanta tukuynin phatu perqawan muyuykuchisqa llajtakunata jap'erqa. 14Chantá kamachej Ezequias Laquis llajtaman uj runata kacharqa, Asiria suyuta kamachejman ajinata nichispata: “Noqaqa pantaykuni. Ama noqawan maqanakoj jamuychu, noqataj pagasqayki, mashkhatachá niwanki, chayta,” nispa. Chantá Asiria suyuta kamachejqa Judá suyuta kamachej Ezequiasman nerqa: Jisq'on waranqa jisq'on pachajniyoj kilo qolqeta, jisq'on pachaj jisq'on chunkayoj kilo qoritawan pagaway, nispa. 15Chayrayku Ezequiasqa Tata Diospa Templonmanta, chanta wasimpi tukuy waqaychasqa qolqeta qorqa. 16Jinallataj Ezequiasqa Tata Diospa Templompa punkunkunamanta, jinallataj, sayantakunamantawan qorita orqhochispa, Asiria suyuta kamachejman qorqa. Punkuta, sayantakunata ima pay kikin qorita llikhayachispa mayt'uykuchisqa. 17Jinapis Asiria suyuta kamachejqa, jatun kamachej Ezequiaspa contrampi kamachejkunata kachaykorqa: Tartanta, Rabsarista, Rabsacesta chantá ashkha soldadokunatawan. Laquismantapacha Jerusalenta jap'ej rerqanku. Jerusalenman chayaspataj pata estanqueman yaku pusanaj larq'a chaynejpi, awasqata t'ajsana cheqaman ñan rejpi jaraykukorqanku. 18Chantá Ezequiasta wajyacherqanku, paytaj mana rerqachu, manachayqa Hilciaspa churin mayordomon Eliaquimta, qhelqerin Sebnata, kamachejpa yanapajnin Asafpa churin Joatawan kacharqa. 19Chantá Asiriamanta soldadokunata kamachej, nerqa: –Ezequiasman ajinata niychej: Asiriamanta jatun kamachej nisunki: “¿Imapitaj qanqa atienekushankiri? 20Qanqa nishanki: Manaqakupaj sumaj wakichisqa kashani, ashkha soldadoykunapis tiyan, nispa. Chayqa yanqhallata parlay. ¿Imamanta jap'ikuspataj contraypi oqharikushankiri? 21Qanqa Egipto yanapananmanta jap'ikushanki. Egiptoqa p'akisqa soqosu jina, pichus chaypi atiykurikojtaqa makinta t'ojsispa pasarparin. Egipto suyuta kamachej Faraonqa ajinamin paymanta jap'ikojkunapajqa. 22Sichus niwankichejman: Noqaykoqa Tata Diosnillaykumanta jap'ikuyku, nispa chayqa, noqa tapuriykichej: ¿Manachu orqokuna patapi altarkunata Ezequías urmachispa kamacherqa, Juda suyupi chantá Jerusalempi tiyakojkuna, Jerusalenpi kaj altarllapi Diosta yupaychankichej? nispa. 23Kunanqa Asiria suyuta kamachej wiraqochiywan uj tratota ruwaychej: Noqaqa iskay waranqa caballokunata qosqayki, sichus iskay waranqa caballokunapi rinankupaj runata tariwaj chayqa. 24Imaynatataj qan atiwaj sayaykuyta kamachejniypa kaj soldadonkunampa mana kasuta ruwana kamachillanmampisri? Qanqa Egiptomanta carretakunata, caballokunata jap'iyta suyashanki. 25¿Manachu noqapis Tata Dios kachamuwajtin, jamushani kay suyuta chinkachinaypaj? Tata Diosmin noqata niwarqa: Riy, chay suyuta chinkachimuy,” nispa. 26Chantaqa Hilciaspa churin Eliaquimwan, Sebnawan, Joawan ima kamachejta nerqanku: Ama jina kaspa, noqaykumanqa arameo simipi parlawayku, imaraykuchus noqayku chayta yachayku. Ama hebreo simipi parlaychu, imajtinchus perqa patapi kashaj runakuna uyarishanku, nispa. 27Asiria suyumanta soldadokunata kamachejrí nerqa: –Wiraqocheyqa mana qankunaman, nitaj kamachejniykichejman willanallaypajchu kachamuwan. Kay perqa patapi kashanku, chaykunamampis willanaypaj kachamullawarqataj. Paykunapis qankunawan khuska jatun jisp'ayninkuta mikhukaponqanku, jinallataj yaku jisp'ayninkutapis ujyakaponqanku, nispa. 28Chantá soldadunata kamachejqa sayariytawan, hebreo simipi jatunmanta qhaparispa nerqa: 29Asiria suyumanta jatun kamachejpa nisqanta, tukuy uyariychej: “Jatun kamachej ajinata nisunkichej: Ezequíaswan ama q'otiyachikuychejchu. Payqa makiymanta manapuni kacharichisuyta atisonqachejchu. 30Sichus Ezequias nisonqachej: “Tata Diosllamanta jap'ikunachej, pay yanapawasunchej. Asiria suyuta kamachejqa mana kay llajtata jap'enqachu, nispa” chayqa, 31ama payta uyariychejchu. Asiria suyuta kamachej, ajinata nin: Noqawan allinyakuychej, noqamantaj k'umuykamuychej. Ajinata ruwankichej chayqa, sapa ujniykichej uva sach'aykichejmanta, higo sach'aykichejmantataj mikhunkichej; sapa ujtaj kikin pujyuykichejmanta yakuta ujyankichej. 32Chantá qankunata uj sumaj jallp'aman pusasqaykichej, qankunaj jallp'aykichej jinallamantaj. Chaypeqa tiyan trigo, uva huertakuna, olivo sach'akuna, aceite, abeja misk'i ima. Chaypi sumajta tiyakunkichej, manataj wañuchisqachu kankichej. Ezequiastaqa ama uyariychejchu; Tata Diosqa kacharichiwasunchej, nispalla payqa qankunata q'otiyashasunkichej. 33Mayqen suyoj diosnintaj, llajtanta Asiria suyuta kamachejpa makinmanta kacharichiyta aterqari? 34Hamatpatawan, Asfatpatawan, maypitaj diosninkukuna kashan? Maypitaj kashan Sefarvaimpata, Henajta, Ivajtawan diosninkukunari? Paykunaqa Samariata makiymanta kacharichiyta aterqankuchu? 35Tukuynin suyukunaj diosninkukunamanta, mayqentaj makiymanta llajtanta kacharichiyta aterqari? Imaraykutaj yuyankichej Tata Diosqa makiymanta Jerusalenta kacharichinantari? nispa. 36Chantá runakunaqa mana imatapis kuticherqankuchu, imaraykuchus jatun kamachej kamachisqa: Ama imatapis kutichinkichejchu, nispa. 37Chantá Hilciaspa churin kamachejpa mayordomon Eliaquim, qhelqerin Sebnawan, kamachejta yanapajnin Joapiwan p'achankuta llik'irakuspa, kamachej Ezequiasman jamorqanku, Asiria soldadokunata kamachejpa nisqanta willanankupaj.

will be added

X\